Туэ шаерамы 78 адями быдтэмын

Удмурт Дунне
By Удмурт Дунне Сентябрь 25, 2015 12:22
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

корепанова ымЭлькунысьтымы Следствиея управление туэ 98 процентсэ кышкыт йыружъёсты шараяны быгатӥз. Управлениысь кышкыт йыружъёсты эскеронъя 1-тӥ ёзэн кивалтӥсь Евгений Фёдоров вераз куд-ог учыръёс сярысь.

Эшез — пурт

25 арлы пытсэт сьӧры келямын Красногорск ёросысь 1979-тӥ арын вордскем Прозоров. Лушкаськемез понна трос пол кечат-вамат укно сьӧры шедьылэм воргорон та рад 2 адямиез вием. Кызьы?
Эрике потыса, пиосмурт вордскем палъёсаз бертӥз. Малпаз: выль сямен улыны кутскоз. Аслыз туган шедьтӥз. Но ортчемез маза ӧз сёты. Сое пытсэт сьӧрын сантэмаса возиллям шуыса супыльтонъёс гуртэ ӝог вӧлмизы. Валамон, та вераськонъёс Прозоровлы ӧз кельше. Кыл вӧлдӥсь пиосмуртэ пуртэн бышкалтӥз. Ӵошен улыны пумитъяськись туганзэ но ӧз жаля — кышномурт пурт улын быриз. Таин пиосмуртлэн вожпотонэз ӧз ортчы: нылмуртлэсь пунызэ быдтӥз, мунчозэ тарказ.

Кырсь ужзэ быдэстэмез бере Прозоров нюлэскы пегӟиз. Ватскон инты ӟеч быръем — нюро-куако интые огшоры гинэ уд пыры. Следовательёс тодо вал: Прозоров — ӟеч пӧйшурась, чорыгась. Озьыен, тэле уз йыромы, ыбылӥськыны, пӧйшурез вандыны киыз мынэ. Эш интыын котьку сьӧраз — пурт.

Югдурез утисьёс толэзь пала сикез котыръязы — йыртэмасез кырмыны ӧз быгатэ. Со вискын Прозоров ёросысь сиён-юонэн вуз каронъя магазинын лушкаське. Мурт машинаен Москва пала шонтэ. Йыраз эшшо одӥг кырсь малпанзэ бергатэ — пытсэт сьӧрын сое вӧсь карем пиосмуртэ виёно.

Ярам, Москвае пырон дорын Прозоровез кырмизы. Следовательёслы со шараяз: тушмонме сопал дуннее келяса, Донбассын ополченецъёсын ӵош ожмаськыны малпасько, пе, вал…

Сьӧсь!

Балезино черкогуртысь 1990-тӥ арын вордскем Русских весяклы шедиз пытсэт сьӧры. Йыр вандӥсьлэн улон гумырез ортчоз Соль-Илецкысь тюрьмаын. Та сяна, солы 2 миллион манет тыриськон тупатэмын.

Кышкыт учыр вал кылем арын 27-тӥ октябре. Балезино палъёсысь нюлэскысь шедьтэмын 12 аресъем Андрейлэн но солэн 11 аресъем Александра сузэрезлэн мугоръёссы. Следовательёс соку ик сак кариськизы черкогуртын улӥсь Русских пумысен. Угось со сокугес гинэ пытсэт сьӧрысь потэмын вал, пукемын нылашез эриктэмамез понна.

Андреез но Александраез педофил нюлэскы ческыт сиёнэн гочатэм. Нырысь-валысь пиналъёсты йырез шузимытӥсь суретсэ кыскыны косэм. Та бӧрсьы йыр вандӥсь сьӧд ужзэ быдэстэм: пияшез писпу борды керттылэм, нылашез сантэмам. Бӧрысь кыкназэс шарфикен кекатэм.

Эскерон мыныку, тодмо луиз: та пиналъёсты сяна, Русских мукет нылпиосты но эриктэмаса вуэм, шузимытӥсь суретъёсын соосты кужмысь кушласькыны косылэм…

22

Йыруж лэсьтӥсьёс йырзэс мыкыртозы ини инмар азьын.

«Час» дугдӥз

Ижысь Север кузпалъёс 2013-тӥ арын, законэз тӥяса, ужбергатон борды басьтӥськиллям. Быдэ вуымтэ нылъёсты мугорзэс вузаны кужмысь косылӥллям. Аспӧртэмлыко огазеяськонзэс «Нылкышно час» нималлям.
Семьялэн кузёез, 32 аресъем Александр, югдурез утисьёслы тодмо. Сое трос пол кырмылӥзы лушкаськемез понна. Ӵапак СИЗО-ын пукыкуз, Огородников фамилизэ со Север кариз. Эрике потӥз гинэ, нокытын ужасьтэм, дышетскисьтэм 23 аресъем Еленаен кузпалъяськиз, кырсь удыссэ мытӥз.

Мугорзэс вузаны мылкыд карисьёслы Северъёс ӧз ёрмылэ. Трос уксё поттыны ӧтись ялонзы гуртысь вуэм 14-18 аресъем апокъёсты капчиен гочатылӥз. Нылъёс ужаллязы 2 сменаен: нуназе но уйин. 1 час понна тыриськылӥз 2 сюрс манет. Талэсь ӝынызэ кузпалъёс асьсэлы басьтылӥзы.

Нылъёслы куронъёссы юнэсь вал. Кин ассэ умойтэм возе, 500-ысен 5 сюрс манетозь тыриське. Ужысь вазь кошкыны уг яра. Пиосмуртъёслы телефон номеръёсты сётъяно ӧвӧл. 1 воргоронлы 1 час дыр сётӥське. Талэсь кемагес ӝеганы уг яра. Штраф уг визьма ке, нылъёсты жуго. Тыш сюрылӥз таш-таш буяськымтэ, гольтрес дӥсяськымтэ понна гинэ но. Кинлэн ужысь кошкемез потэ, интыяз эшсэ вайыны кулэ.

Кузпалъёс ужзэс люкизы: кышномурт нылъёсты чебертӥськон салонъёстӥ, дӥсен вуз карон интыостӥ нуллӥз ке, пиосмурт ужан висказы кылдылӥсь керетонъёты сэрттылӥз, нылъёсты таксиен нуон-ваёнэз радъялляз. Паймоно кадь: тросэз анай-атайёс нылпизы ышем пумысен полицие куриськон ӧз гожъяллялэ. Озьыен, тодӥзы, маин выро нылъёссы.

Ар куспын «Нылкышно часэ» кугӟаз 20 дыды. Югдурез утисьёс та огазеяськонэз пытсазы кылем арын. Ӝутэм уголовной уж туэ гинэ йылаз-пумаз вуттэмын. Нылкышно но 2 таксист условной кыл кутон улэ кыскемын. Семьялэн кузёез 3 арлы пытсэт сьӧры шедиз.

Кильтро дӥсь ӧз юртты

Весяклы пытсэт сьӧры шедьыны быгатоз Алнаш ёросысь Гондыргуртысь 3 адямиез вием Михеев. Та вакытэ со пуке СИЗО-ын. Михеевез али эскеро психологъёс.

Туэ 15-тӥ августэ выжон уе ёросысь Юмъя гуртысь Михеев Гондыргуртысь 3 адямиез пуртэн вандӥз. Та бӧрсьы 31 аресъем пиосмурт, полиция со вылэ медаз малпа шуыса, машинаысьтыз питранъёссэ ӝогак воштӥз но Татарстан пала шонтӥз. Отчы машиназэ кельтыса, берытскиз Ижкаре. Лушкам 150 сюрс манетэныз кильтро дӥсяськиз, аслыз патер шедьтӥз. Но Ижысь огаз ульчаын сое кырмизы.

Корка эгырӟиз

Сарапулысь 39 аресъем Константинов 25 арлы пытсэт сьӧры келямын.

Пиосмуртлэн квартираысьтыз огаз комнатае интыяськиз семья. 10-тӥ мае выжон уе таос ӝӧк сьӧрын, курытсэ юыса, пукиллям. Пиосмуртъёс вискын керетон пуромем. Кузё кема малпаськымтэ — кузпалъёсты ӝог ӝуась суретэн пазям но вылазы тыл куштэм. Озьы 20 квартираем улон корка пеньлы пӧрмиз — 7 миллион манет тыр изъян лэсьтэмын. Кышномурт, ӵынэн ӵоксузьыса, кулӥз. Пиосмурт, толэзь курадӟыса, больницаын кулӥз.
Тылпу поттэмез бӧрсьы Константинов пегӟиз ёросысь Горбуново гуртын улӥсь агаез доры. Полицейскойёс — сьӧраз. Йыртэмась соослы озьы гинэ ӧз сётскы — полицейскойёсты корт бодыен коканы выриз.

Мурт уксёлы гочаз

Ижысь 33 аресъем Ятов кечат-вамат укно сьӧры пуксиз 23 арлы. Таяз но учырын сюлэм позырске: адями со ӧвӧл — сьӧсь!

Январь толэзе Ятов эшеныз но 38 аресъем сузэръёсын-кыктоосын город сьӧ-ры Ымусьтонэз пусйыны кошкиллям. Шулдыръяськиллям. Мукет нуналаз Иже шонтоно кариськиллям. Машинаын мыныкузы, Ятов нылкышноослэсь уксёзэс портыны ӧдъям. Куспазы керетон пуромем. Руль бергатӥсь пиосмуртлы ваньмыз та акыльтэм, лэся. Вотка ёросысь Июльское черкогурт доры вуыкуз, Ятовез но кыктоосты, машинаысь поттыса, кельтэм. Та бӧрсьы Ятов, вожпотонзэ кытчы карыны валатэк, нылкышноос вылэ омырске. Нырысь огезлэсь чыртызэ вандэ, собере — мукетызлэсь. Мугоръёссэс матысь шайвылэ питыртэ.

Кызьы следовательёс Ятовез кырмизы? Мурт уксёез яратэмез сое шарае поттӥз. Кышномуртъёслэн банк картаысьтызы уксёзэс октыны кутскем.

Йыруж уг сылмы

Ог 10 ар талэсь азьло лэсьтэм кырсь уж туэ гинэ сэрттэмын-пертчемын вал.

Законэз трос пол тӥяллям 2 вынъёс Ижын улӥзы, кыкназы но мурт ваньбурлы синмаськылӥзы. Но огпол таос вискытӥ сьӧд коӵыш ортчиз — керетыны ӧдъязы. Соку огезлэн воргоронлэн йыраз лек малпан лыктэ. Сое улонэ пыӵатон понна 4 тодмоезлэсь юрттэт куре.

Огзэ тодмозэ пиосмурт косэ туганэныз ӵош киное ветлыны. Полициын ужасьёс юазы ке, пе, кытын тӥ вал шуыса, валэктомы: учкимы «Бриллиантовый полицейский» киноез. Йыр вандӥсь та киноез азьлапал ик учкиз. Югдурез утисьёслэн кескич юанъёссылы рос-прос дасяськиз.

Кыкетӥ тодмозэ пиосмурт косӥз зарни шедьтыны но дӥсяны. Угось тодэ вал: выныз зарни зундэсъёсты-чигвесьёсты капыръяны ӟеч пӧрмытэ. Куинетӥез воргорон гочатӥз вынзэ шыпыт интые. Ӵапак отысен пиосмурт жалятэк быдтӥз тужгес матысь адямизэ.

Аръёс ортчемъя пиосмуртлэн кышноез чидамтэ — тодмоосызлы та сярысь сюлэмзэ усьтэм. Соосыз ини ӝегатскытэк вазиськиллям полицие.

Туннэ йыруж лэсьтӥсьёс пӧлысь огез улэп ӧвӧл ни. Кылемъёсыз вылэ ӝу-тэмын уголовной ужъёс. Йыр вандӥсьлэн кузпалыз условной кыл кутон улэ кыскемын. Угось со огназ будэтэ быдэ вуымтэ нылпизэ.

 

Удмурт Дунне
By Удмурт Дунне Сентябрь 25, 2015 12:22
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<