Ижын ӧсъёссэ усьтӥз «Технотроника» центр

Удмурт Дунне
By Удмурт Дунне Сентябрь 24, 2015 12:32

Шаерысьтымы предприятиос кулэясько туала технологиосты валась специалистъёслы. Егитъёс угось, бадӟым уждун сьӧры уйиськыса, палэнэ кошкыны дырто — озьы шаермылы IT-специалистъёс уг тырмо.

Азьланяз но тазьы ик луиз ке, туала технологиосты кутон ласянь трослы бере кылёмы. Информатизацияя но связья агентство та ужпумез син шораз возе. Андрей Прокошев пусйиз:

— Валтӥсь интые потэ математика: бадӟым саклык висъяно та предметэз ӟеч валась пиналъёслы — соослы луонлык кылдытоно та удысъя тодон-валанъёссэс муромытыны. Та кичӧлтонэн вазиськимы ни элькунысьтымы Дышетонъя но наукая министерствое. Отысь специалистъёс дасяло нимысьтыз программа: соя чакламын школаосын математикаез, физикаез, информатикаез мургес дышетыны.

Пиналъёсты будэтон-дасян мытэмын ни: кылем арняе Ижын ӧсъёссэ усьтӥз «Технотроника» центр. Нылпиос отын туала технологиосын тодматскозы: цифровой, сетевой, инженерной, компьютерно-мультипликационной но уно мукет системаосын. Та центрын луоз туалалэсь туала техника, ар ӵоже отын тодон-валанъёссэс муромытозы 3 сюрс пала пиналъёс — школаын дышетскисьёс но, студентъёс но.

Таӵе центрез усьтон — специалистъёсты дасянын нырысетӥез вамыш, шуиз Андрей Прокошев. Ог 2-3 ар ортчыса, Ижын кылдоз IT-лицей. Отчы кутозы Удмуртиысь пӧртэм городъёсысь, ёросъёсысь 7-тӥ классэз йылпумъям но лицее пырыны конкурс пыр ортчем пиналъёсты. Соосты дышетозы туала технологиосты ӟеч валась дышетӥсьёс. Проектэз быдэстонлы кулэ луоз 300 миллион манет, чакламын федерал бюджетысь уксё кыскыны. Россиысь Дышетонъя но наукая министерство та кичӧлтонлы ӟеч дунъет сётӥз, юрттыны но оскытӥз.

Та лицей сяна, шаерысьтымы куд-ог школаос али ик басьтӥськозы ни пиналъёсты информатикалы мургес дышетон борды. 2017-тӥ арозь та курс пыр потэм школьникъёслэн лыдзы 1 сюрс 600 лыдъяськоз.

«УД»

 

Удмурт Дунне
By Удмурт Дунне Сентябрь 24, 2015 12:32
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<