Гай Сабитовлы сӥзем «Мон улонэз кырӟасько» научно-практической конференция ортчиз

Удмурт Дунне
By Удмурт Дунне Сентябрь 22, 2015 14:11
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
IMG_4952

Г. Сабитовлэн эмеспиез В. Ившин но ӵыжы-выжыез Т. Михайлова.

15-тӥ куарусёнэ Удмурт кун университетысь библиотекаын ортчиз удмурт кылбурчилы Гай Сабитовлы сӥзем «Мон улонэз кырӟасько» научно-практической конференция.

Шекспирез удмурт кариз

Ужрадэз дасязы Удмурт кун университет, Национальной библиотека, Историяя, кылъя но литературая Удмурт институт, Дышетонъя но наукая, Культурая но туризмъя, Нациосын ужан политикая министерствоос. Та конференцие пыриськизы шаерысьтымы но солэн палэнысьтыз дышетӥсьёс, студентъёс, тодосчиос, библиотекарьёс но Гай Сабитовлэн ӵыжы-выжыосыз. Ужрадын уно докладъёс лыдӟемын вал, выль потэм книгаен тодматскон ортчиз. «Океан поэзии и музыки Гая Сабитова» — 500 бамлэсь бадӟым издание, татчы пыремын кылбурчи сярысь тодэ ваёнъёс, гожтэтъёс, документъёс, Г. Сабитовлэн аслаз гожъямъёсыз. Книгаез вазенгес дасязы ни литературовед Зоя Богомолова но филология наукаосъя кандидат Роза Кириллова. Тунсыко докладъёсын усьтӥськиз, кыӵе вал кылбурчи, диктор, кылысь кылэ берыктӥсь Гай Сабитов. Кылсярысь, филология наукаосъя кандидат, критик Александр Шкляев веранзэ мытӥз эшлыко шарж бордысен:

— Огшоры пияш вал Гай,
Со пияш луиз агай,
Гай-агай луиз атай,
Гай-атай луиз бабай,
Собере луиз на ай
Кылбурчи — Сабитов Гай.

Александр Григорьевич верамъя, Г. Сабитов нырысь-валысь трос данъяз партиез, нош атай-песятай луэмез бере со творчествояз бадӟым вамыш азьлане лэсьтӥз но эшезлы М. Покчи-Петровлы сӥзем «Шунды но ӝужа но…» сонетъёсын тугоко гожтӥз. Собере удмурт литератураын сонет гожъязы Владимир Романов, Александр Белоногов.

— Г. Сабитовлэсь та произведенизэ лыдӟисьёс но, критикъёс но дунъязы, но со пыр-поч усьтэмын-валамын ӧвӧл на. Сонетъёс уло дауръёсын, котькуд вакытысь адями соосты мед лыдӟоз, одно ик мае ке аслэсьтыззэ шедьтоз, — шуиз А. Шкляев.

Филология наукаосъя кандидат, литературовед Вера Пантелеева кылысь кылэ берыктӥсь Гай Сабитов сярысь вераз:

— Г. Сабитов улӥз сыӵе вакытэ, куке кылбурчи луыны кулэ вал журналист но, переводчик но. Соиз но, таиз но Гай Сабитовичлэн умой пӧрмиз. 40 ар ӵоже со 100-лэсь уно произведениосты удмурт кылэ берыктӥз. Кылсярысь, А. Пушкинлэсь «Бахчисарайский фонтанзэ». У. Шекспирлэсь сонетъёссэ удмурт кылэ огназ берыктӥз. Бигер кылэз умой тодэменыз, асьме лыдӟисьёс доры вуттӥз М. Джалильлэсь но Г. Тукайлэсь ужъёссэс, кылсярысь, берлоезлэсь гинэ 24 кылбурзэ берыктӥз. Пусйыны кулэ, Гай Сабитовичлэн переводъёсыз туж шонер, чеберлыко но литературалэн вань куронъёсызъя быдэстэмын. Но туннэ нуналлы соос стилистика, кылэз шӧдон ласянь пыр-поч эскеремын ӧвӧл, — шуиз Вера Григорьевна.

сабитов

40 ар ӵоже со 100-лэсь уно произведениосты удмурт кылэ берыктӥз.

Атаез сярысь тодэ ваёнъёссэ мадиз кылбурчилэн пиез Сергей Сабитов. Веранзэ мытон азяз ик пусйиз: мыным атаелэн быгатонлыкъёсыз паласькиллямтэ, кыллы усто ӧвӧл, чебер вераськыны, кылбураны воксё уг быгатӥськы.

— Ми семьяямы куинь кузя нылпиос вал: Юрий, мон но Ольга сузэре. Анае Анна Яковлевна но атае Гай Сабитович милемды дышетыны сюлмаськизы. Юрий, МГУ-ысь журналистикая факультетэз йылпумъяса, Нижний Новгородысь радиоын ужаз, улонысь кошкиз ини. Мон йылпумъяй Ижысь механикая институтэз, математика, электроника котьку тунсыко пото вал. Ольга Гаевна — Удмуртиысь Верховной судысь судья. Пичи дырме тодам вайисько ке, син азям пуксе узыр библиотекамы. Атае яратылӥз эшъёсызлы, ӵыжы-выжыосмылы книгаос кузьманы, аслэсьтыз бичетъёссэ со одно ик кыӵе ке аспӧртэм автографен сётъялляз. Тодам лыкто эшъёсыныз И. Зоринэн, М. Покчи-Петровен, Б. Саушкинэн, Н. Шкляевен, Г. Корепановен пукылэм-вераськемъёссы. Мынам туннэ тау кареме потэ конференциез радъясьёслы, атаелэсь творчествозэ уд вунэтӥське, эскериськоды, дышетӥськоды но егитъёсты соин тодматӥськоды шуыса, — мылкыдзэ усьтӥз Сергей Гаевич.

Галина СЕМЁНОВА

Удмурт Дунне
By Удмурт Дунне Сентябрь 22, 2015 14:11
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<