Пиналэз будэтыны люкетэ… телефон. Шуге-леке сюрыны тырме 1-2 секунд

Удмурт Дунне
By Удмурт Дунне 22 сентября, 2015 13:49
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

корепанова ымШаерысьтымы огез анай вылэ 125-тӥ статьяя — нылпиез кышкыт учырын огназэ кельтон — уголовной уж ӝутэмын. Эшшо 4 анаез югдурез утисьёс эскеро на. Россиысь нылпиослэсь правооссэс утёнъя уполномоченной Павел Астахов таӵе мумыослэсь кылзэс зол юаны куре.

Укноез ворсано

Та рад гужем кӧтвесь-кантэм вал. Зоро куазеныз сяна, паймытылӥз сюлэмез чепыллясь учыръёсыныз. Югдурез утёнъя министерствоысь быдэ вуымтэосын ужанъя ёзэн кивалтӥсь Вероника Малькова ивортӥз:

— Элькунамы гужем укноысь 8 пинал палдӥз. Шаерамы таӵе учыръёс ӵем пумиськылыны кутско тулысысен ик. Шулдыр куазь учыра гинэ, калык шумпотыса укнооссэ усьтэ. Тодазы но уг лыкты чакласькыны. Семьяын пичиос вань ке, укно котырысь вань пуконэз-ӝӧкез утялтоно. Нылпи отчы тубыны медаз пӧрмыты.

Та сяна, йырын возёно: нымы-кибыослэсь утись укно возъет (сетка) — кышкыт маке. Пинал отчы мугорыныз пыкъяське гинэ — лобӟе. Тани Ижысь Октябрь ёросысь 1 но ӝыны аресъем пияш укноетӥ ульчае питраз. Мумиз ӝамдэлы мукет комнатае потэм вылэм. Ярам, нырысетӥ этажын уло. Егит анай уг юы, уг калгы. Соин эмъясьёс вӧсь луэм тэшкылиез йӧнатӥзы но мумизлы берыктӥзы.

Ижысь Песочной урамысь 3-тӥ этажысь усиз аресъем пинал, озьы ик возъет борды зӥбиськыса. Зол шуккиськыса, больницае шедиз. Та бӧрсьы ик Ленин ёросысь огаз коркась питраз 2 аресъем покчи. Таизлэн йырыз зол вӧсь луиз.

Но тужгес йыр кур луэ, мукет учырез кылыса. 4 часын ӵукна Ижысь Коммунар ульчаысь 5-тӥ этажысь огаз коркась 3 аресъем пинал усиз. Бӧрдэм куаразэ кылыса, котыраз адямиос ӝог люкаськизы. Шаплы вуизы эмъясьёс но, полициын ужасьёс но. Анай-атаез гинэ тэшкылилэн кытчы ке ышиллям. Берло тодмо луиз: егит анай нылпизэ изьтэм но уй кафее шулдыръяськыны кошкем. Пиналлэн кӧтыз шуккиськиз, урдлыосыз тӥяськизы.
— Та учыръя 125-тӥ статьяя уголовной уж ӝутэмын, — вера Вероника Малькова. — Угось анай, нылпизэ огназэ кельтыкуз, тодэ вал: пичи мурт син куспын умойтэм учыре шедьыны быгатоз. Та статьяя ик мукетъёс вылэ 4 уголовной уж ӝутыны луысал на. Но ӧз ӝутэ, угось анай-атайёс нылпиоссэс кышкыт учыре юромо ӧз кельтэ. Пусъёно: шурдыт учыръёс ӟеч но, начар-юись семьяосын но огкадь пумиськыло.

Огез сюлэмез буйгатэ — покчиос ваньзы улэп кылемын. Но эмъясьёс лулӟыло: зол шуккиськемзы азьланяз «емышсэ» возьматытэк уз кыльы…

013605,птица,голубь,окно

Шаерамы гужем ӵоже 8 пинал укноысь усиз.

Машинае  ӧвӧл кельтоно

Нылпиос шуге-леке вуо, анай-атайёс соосты огназэс машинае кельтыку но. Алигес Хакасиын 9 толэзьем дыды быриз. Гурезь йылэ кельтэм машина ас кожаз шуре васькем. Мумиз-бубиз машина ӧсэз усьтытозь, пинал уг шока ни вал. Таӵе ик юзырес учыръёс пусъемын Санкт-Петербургын, Краснодар улосын…

Жаляса верано, Удмуртия но палэнэ уг кыльы. Югдурез утёнъя министерство ивортэмъя, шурдыт учыр пусъемын вал кылем арын. Июнь толэзе Ижысь Смирнов кузпалъёс 3 толэзьем пичильтоксылы басьяськыны машинаен потӥллям. Пизы изе вал. Соин ик анаен-атай, нокыӵе кариськытэк, огназы магазинэ кошкизы. Ульчаын +28. Машина пушкын эшшо но ӝокыт. 30 минут ортчыса, кузпалъёс вуизы. Но нуны уг шока ни вал. Машина вӧзтӥ ортчылӥсьёс бӧрдэм куараез ӧз кылэ, ӧз адӟе. Угось «корт вал» тып-тып пытсамын, укноосыз — сьӧд-сьӧдэсь…

Сюрес вылын кышкытлыклэсь утиськонъя инспекциын верало: туэ шаерамы таӵе учыръёс пусъемын ӧвӧл. Озьы ке но кылем арын луэм учыр анай-атайёслы визь пыртымтэ, шӧдске. Шоркарысь бадӟым вуз карон интыосы вамышты гинэ — я отысь, я татысь огназэс кельтэм пиналъёсты адӟыны луэ.

Кунамы, машинаын ӝо-каса, туэ улонысь кошкиз ини 15 пинал. Соин но Россиысь нылпиослэсь правооссэс утёнъя уполномоченной Павел Астахов сюрес вылын ветлонъя правилоосы ватсанъёс пыртыны куре. Кылсярысь, 6 арессэ тырмытымтэ пиналэз машинае огназэ кельтыны уг яра. Законэз тӥяд? 3-ысен 5 сюрсозь тыриськы. Та муген 2 пол инспекторъёс дӥне шедид? Анай-атай луон праводэ талано.

Уполномоченной та ласянь адӟем карыны куре Америкалэсь. Отын котькуд арнялы быдэ машинаын нылпи быре. Лыдъяллям: 15 ар куспын ог 600 пинал улонэныз люкиськем. Соин но, отысь полицейскойёс кие огпол гинэ шедьыса но, анай-атайёсты кечат-вамат укно сьӧры жалятэк интыяло.

Павел Астаховлэсь ӵек-тонъёссэ умоен пусйизы шаерысьтымы югдурез утисьёс но. Угось машина — кышкыт маке: отын вань бензин, вӧй, электрокужым. Озьыен, нылпиен син куспын кышкыт учыр луыны быгатэ. Ма, пинал шып пукиз ке но, мукет машина вылаз пырыны быгатоз яке воксё но машинаез эвакуаторен нуыса кошкозы.

Анай-атайёслэн сак кариськымтэенызы сэрен ик Ижысь Любовь Горюноваез корка азяз ик машина ӧжыт гинэ лёгаса ӧз кошкы. Руль бергатэ вылэм бускелезлэн 10 аресъем пиез. Таӵе ик учыр вал Пичи Пурга черкогуртын но. 4-5 аресъем пияш магазинысь анай-атайзэ витён сяменыз машинаен кошкыны ӧдъям, ӧжыт гинэ борддоре мырӟиськымтэ.

Компьютерен ӧвӧл шудоно

Кышкыт учыръёслэсь утён вылысь эмъясьёс пиналъёсты но, анайёссэс но сак эскерыса возё. Нылпи ваён юртысь мумы бертэ гинэ, дораз толэзь ӵоже арняяз огпол педиатр вуылэ. Талэсь ӵемгес кожалля эмсузэр. Ижысь 7 номеро больницаысь нылпи поликлиникаысь валтӥсь врачлэн воштӥсез Татьяна Брызгалова вера:

— Педиатр бадӟым саклык висъя нунылэн тазалыкезлы. Медсестра учке, нырысь ик, кызьы но маин нылпиез сюдо, мисько, изьто. Собере чакла: анайлэн пичильтоклы эмъюмъёсыз вань-а, кытын соос возисько, корка чылкыт-а, телевизорлэн, компьютерлэн шнуръёсыз-бышканъёсыз ӟеч-а утялтэмын но мукет. Ваньмыз та картае гожтэмын луыны кулэ.

Али педиатръёс, поликлиникае вуэм пиналъёсты эскерем сяна, нунал ӵоже ог 8-9 нылпиослэн доразы вуттӥсько. Паласькись висёнъёс аляку, та лыдпус 30-озь но ӝутӥське. Кин нылпизэ урод учке, таӵеос доры эмъясьёс лыкто ини быдэ вуымтэосын ужасьёсын ӵош.

— Жаляса верано, шурдыт учыръёс луыло, — веранзэ азьланьтэ Татьяна Дмитриевна. — 2 нылпи весяклы инвалид кылиз, анай-атаезлэсь лач-лач ватымтэ эмъюмъёссэ сиыса. Укноысь палдэм 4 пиналэз кема йӧнатоно луимы. Чаклай ини: вань та учыръёсын янгыш бадӟымъёс. Азьвыл аръёсы умойтэм учыръёс юись, начар семьяосынгес пумиськыло ке вал, али котькыӵе семьяе кышкыт адӟон пыралля. Угось юон-кыскон сяна, нылпиез сак будэтыны люкетыны ӧдъязы телефонъёс-планшетъёс.

Татьяна Дмитриевналэн кылъёсыныз амалтэк соглаш луоно.

Дэри ёросысь 6 толэзьем пинал шудон висказ ӝокаса кулэм. Мумиз нылпиезлы пакетысь шудонъёссэ кисьтэм но мукет комнатае кошкем. Пичильток пакетэз ымныр вылаз кыскем. Сое палэнтыны визьмыз но, кужмыз но тырмымтэ. Улон но кулон вискын векась тэшкыли анайлэн тодаз но ӧй вал ини Интернетын бугыръяськонъяз.

Кез ёросысь 30 аресъем нылмурт кудӟытӥсеныз эшъяськылӥз. Ӟенеликлэсь со ӧз куштӥськы нылпи ваемез бере но. Одӥг ӝытэ анай нунызэ нонтӥз но тыбыр вылаз выдтӥз. Озьы карыны уг яра шуыса, солэн тодаз но ӧй вал ини — юыны кошкиз. Нуны ӧскыса ӵоксузиз но кулӥз…

Нылпилы шуге-леке сюронлы 1-2 секунд тырме. Соин анай-атайлэн синъёссы котьку пичильток шорын луыны кулэ.

Туспуктӥз Александр Горбунов

Удмурт Дунне
By Удмурт Дунне 22 сентября, 2015 13:49
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<