Кызьы возёно астэ мурт коллективын?

Удмурт Дунне
By Удмурт Дунне 22 сентября, 2015 13:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

сараматова

Школаез йылпумъямез бере егит муртлэн выль улонэз кутске: дышетсконэз азьланьтон, мурт коллективе шедён. Кызьы астэ шонер возёно?

Сизьым секунд

Психологъёс шуо: адями сярысь нырысетӥ мылкыд кылдэ сое адӟем дырысен 7-8 секунд ӵоже. Собере со мылкыдэз воштыны шуг ни. Ӵемысь адями син шоры нырысь уродэн пуксе. Асьмеос уго дышемын ни котьма шоры оскытэкгес учкыны, котьмалэсь шексэ утчаны. Озьы ке но алама мылкыдэз воштыны луоно, шуэ Ижысь «Психолог плюс» центрысь специалист Владимир Якимов.

— Котькуд коллективын одно вань: азьветлӥсь, серекъятӥсь-серекъясь, тышкано мурт но тышкась. Со котькуд коллективлэн азинскон законэз, — вера Владимир Якимов.- Студентъёс но солдатъёс пӧлын та рольёс нырысетӥ нуналъёсы ик кылдо. Та ласянь тужгес секыт йӧтэ гуртысь потэмъёслы. Городъёс уго соку ик асьсэды вылӥгес пукто, ӟеченгес лыдъяло. Соин но атасъяськыны, гуртысь нылпиосты шымыръяны кутско. Но гуртоослы котьку тодазы возёно: городскойёс — сыӵе ик адямиос, соослэн но ляб но кужмо палъёссы вань. Соин ик гуртын будэмын шуыса кепырано ӧвӧл.

— Зэм, возьдаськонэз вормыны куддыр туж секыт, — итӥське психолог Наталья Тугашова. — Кепыран ик быдтэ егитъёсты: тодэмзэс возьматыны-вераны но уг дӥсьто, асьсэзыз ултӥяны но сёто. Соин сэрен но шаерысьтымы вузъёсын но училищеосын дышетскисьёс пӧлысь одӥг куиньмос люкетэз гуртоос дышетсконзэс кушто.

Мукет яке ваньмыз кадь?

Мар кароно, ӝоже медад кыльы шуыса? Владимир Якимов но Наталья Тугашова дэмлало:

  •  Кин но со туж аспӧртэм дӥсяське.

Мон мукет, мон тӥ кадь ӧвӧл, шуыны выре. Но ӵапак аспӧртэм дӥсяськемъёс нырысь ик син шоры йӧто, соосты ик исаны ӧдъяло. Таӵе адӟон вылад медаз вуы шуыса, учконо, кызьы дӥсясько котырысь адямиос. Костюмен ветло ке, костюм басьтоно. Сыӵе луонлык ӧвӧл ке, астэ ке но чаклано: йырсиед сынамын, дӥсед утялтэмын-миськемын медло.

  • Коллективе сюрем бере нырысетӥ нуналъёсаз адямиос пӧлы кариськыны тыршоно.

Серемес учыре медад сюры. Шаплыос уго одно ик синйылтозы. Соослы «шудон» кулэ, сотэк соослы мӧзмыт.

  • Общежитие — со сыӵе ик армия.

Татын дедовщина шуон нылъёс но, пиос но пӧлын одно ик луоз. Соин ик азьвыл ик малпаськоно: косэмзыя улэмед потэ я уг? Медаз гинэ жуге, вань куронзэс быдэсто шуыны — капчи. 2-тӥ курс бере ултӥясьёс узгес шеде ни, вылды. Но 2 арез но чиданы кулэ ук. Ялан тыш сиемед уг поты ке, пунэмзэ берыктыны быгатоно. Юн луэмдэ возьматӥд ке, асьсэос ик палэнскозы но уз йӧтылэ ни. Нош жугемзэс чалмыт чидад ке, ялан кизэс вуттозы.
Общежитиын улэмед уг луы ке, выж квартирае.

OLYMPUS DIGITAL CAMERA

Нырысетӥ вамыш лэсьтыны гинэ секыт. Пӧрме шуыса адӟиськод ке, эшшо но эшшо азьлань мынэм потыны ӧдъя.

  •  Уксё курыны ӧдъязы?

Нош малы тон коньдондэ сётыны кулэ? Со анай-атаедлэн ужам ужез, тон ачид копейка но ӧд дуры на. Озьы ик шуоно. Кужмысь каро ке, жугемзылы пумит султэмед уг луы ке, мукетъят сьӧрад кут атайдэ, агайдэ яке эштэ. Тон понна пунэмзэ огпол берыктӥзы ке, утисед вань шуыса, шӧдӥзы ке, уз йӧтылэ ни. Дурбасьтӥсед ӧвӧл ке, дышетӥсьёслы вера, полицие мын. Собере, котькуд дышетскон учреждениын психологъёс вань. Астэ ачид пуктыны уд быгатӥськы ке, соос юрттозы. Чалмыт гинэ эн улы — маза уз сётэ!

  • Дышетсконо калыкен огкыл шедьтыны.

Туж ӵемысь егитъёс асьсэ палась потэмъёсын эшъясько, 2-3 кузя возисько. Эшед вань ке, со туж умой. Озьы ке но коллективен тодматсконо. Возьдаськондэ зӥбыса но, адямиосын вераськоно. Кутсконо кельшись адями бордысен. Оло, тунсыкъяськонъёсты огкадесь? Со сярысь ик вераськыны ӧдъяно. Огкыл шедьтыны быгатӥды ке, коллективе но пыроды, асьтэлы но шулдыргес луоз.

  •  Пальышась адями борды сюлэм ачиз кыстӥське.

Синъёстэс музысь ӧд ӝутъялэ ке, кин тӥ доры матэктоз? Собере, секыт мылкыд муртъёслы но палаське. Адямиослы нимынызы вазиськыны тырше. Котькудӥзлы аслэсьтыз нимзэ кылыны кельше.

  • Кин ке серем каре ке, тӥ но пумитаз серектэ.

Куатаськиды ке, эшшо золгес серекъяны ӧдъялозы. Тыбырдэс шонер возе. Пельпумъёссэ вӧлъям адями бордысь кужым лыктэ, нош губырскемез шоры учкыса, малпан кылдэ: тазэ вӧсь карыны луоно, чидалоз.

  • Абдратыны луэ телефонысь чузъяськись крезьгурен гинэ но.

Котькудӥз гур быръе аслыз кельшымонзэ, мылкыдызлы тупасьсэ. Шулдыр гур быръё улонэз яратӥсь, интыязы пукыны быгатӥсьтэм адямиос. Абдрамон гур бырйисьёс — асьсэзыз возьматыны яратӥсьёс. Гурзэс ялан вошъясьёс — осконтэмгес адямиос. Классикаез яратӥсьёс — вылӥ культураез гажасьёс. Соин ик крезьгур бырйыкуды но, чаклалэ, кыӵе со чузъяськоз. Пелез вандӥз ке, кинлы меда со кельшоз?

  • Луоно сыӵе, кыӵе вань.

Выль коллективе сюрыса, адямиос куддыр асьсэзыз кызьы возьыны уг тодо. Одӥгъёсыз мултэс гольтрес вырыны ӧдъяло, мукетъёсыз куаразэс но поттыны уг дӥсьто, куинетӥосыз вормонъёсынызы ушъяськыны ӧдъяло. Но ваньмыз та палэнысен тумошогес адӟиське. Адями юромо кельшыны выре ке, кинлы яралоз меда? Калык пӧлын луоно сыџе, кыџе вань. Соку адямиос но котырад кыстӥськозы. Муртъёс шоры тушмонъёс шоры кадь учконо ӧвӧл. ӟеч синмын учкемдэ адӟыса, соос но небытгес луозы.

Нырысетӥ вамыш

— Возьдаськон монэ но ас вакытаз зол шуккиз, — вера Ижысь гурт удысъя академиын дышетскись Роман Вахрушев. — Коньдонме курисьёс сюризы. Кисыям копейкае но ӧвӧл шуэмелы оскытэк, огпол йырсазьме ыштытозь жугемзы но вань. Пеймыт луэм бере ураме потаны ик кышкасько ни вал. Но собере аслым шуи: малы мон асме ултӥяны сётӥсько? Спортзалэ ветлыны ӧдъяй. Группаын вераськыны кутски. Таиз тужгес секытэз вал. Ӟуч кылын кылпум но интыяз куддыр ӧз пуксьылы уго. Но сыӵе дыръя асме ик сереме уськытылӥ. Анекдотъёсты трос тодӥсько но соосын паймытъяны быгатӥсько бере, соос бордысен ик кутски. Адямиосты серекъятон, мылкыдзэс ӝутон — коллективез ас палад берыктонын нырысетӥ вамыш. Монэ кылзо шуыса, адӟи но, аслам но мылкыды ӝутӥськыны кутскиз. Кытчы ке группаен мыно ке, азьвыл палэнскисько вал. Бератаз малпаны ӧдъяй: мон висись ӧвӧл ук, малы нимазъяськисько? Зэм, ваньмыныз огкыл шедьтыны нокызьы но уг луы. Но адямилэсь мылкыдзэ юаны, юрттэт ӵектыны луэ. Ӟеч мылкыдъёстэ адӟыса, кин лекомоз меда? Эсьма, астэ кулэен шӧдыны кутскиськод. Туала арын возьдаськись луон модаын ӧвӧл ни. Зэм, астэ вормон понна куддыр туж трос дыр кулэ. Но мон туж шумпотӥсько кужмогес луэмелы. Армилэсь но, эсьма, уг кышкаськы ни.

Владимир Якимов но шуэ: нырысетӥ вамыш лэсьтыны гинэ секыт. Пӧрме шуыса адӟиськод ке, эшшо но эшшо азьлань мынэм потыны ӧдъя.

Удмурт Дунне
By Удмурт Дунне 22 сентября, 2015 13:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<