Кин со бобо? Кыӵе тусыз удмурт элитаелэн?

Удмурт Дунне
By Удмурт Дунне 22 сентября, 2015 12:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

даралиБерлояз удмурт дискотекае ветлэме бере йырам малпан берганы кутскиз: кытын-о удмурт элита? Малы танцполын «пролетарийёс» гинэ экто?

Пролетарий но богема

Мон пролетарий шуисько огвыллем, огкадь тусо но ужась (дышетскись) калыкез. Кин ке но та массаосын кивалтэ ук! Нош сыӵе «мылкыд карисьёс» берло дыре уг адско.

Элита — со кивалтэтын но экономикаын валтӥсь интыосын пукись муртъёс. Озьыен, та кыл нырысь ик политикъёслы но бизнесменъёслы тупа. Соку удмуртъёслэн элитазы — со гурт администрациосысь адямиос но «Светлана» нимо огвыллем гурт магазинъёслэн кузёоссы. Зэм-а вань элита татчы ватскем? Чаклано ке, элита социумен кивалтыны, калыкез нодъяны кулэ. Марысьмар воштӥськонъёс луо ке — соосты нырысь ик синйылтэ элита. Уксёё но дышетскем муртъёс — огеныз мукетыз герӟаськемын.

Кин элита, нош кин ӧвӧл, дунъяны шуг. Кызетӥ даурлэн кутсконаз тодосчи Гаэтано Моска пусйылӥз: элита — соос, кин киын власть. Мукетыз тодосчи, Вильфредо Парето, мукет сямен лыдъяз: элитае пырыны кулэ тужгес но визьмоосыз, быгатӥсьёсыз, шаплыосыз.

«Богема» кыл герӟась-кемын улон амалэн. Эксцентричной, яркыт, ӵемысь уксётэк улон сям син азе пуксе. СССР дыръя богемаен нимало вал творческой интеллигенциез: писательёс, театралъёс, суредасьёс… Шор дауръёсы Богемиысь (Чехилэн улосэз) чиганъёсты нимало вылэм bohеmiens: тодӥськом, кызьыгес чиганъёсыд уло… Богема одно ик маргинальной, йӧспӧртэм луыны кулэ кадь. Озьы ке но туннэ нуналлы та дунъетъёс воштӥськемын.

богема

Богема одно ик маргинальной, йӧспӧртэм луыны кулэ кадь.

Уксё но визь

«Кырсь, миськымтэ богема» элитаен сураськиз но табере кивалтэ улон сямъёсын. Ӵапак тужгес но визьмо но кышкасьтэм муртъёс нырысьёсыз пӧлын басьто айфонъёс но йотафонъёс, мукет буясько но дӥсясько, дышето китай кылэз. Америкаысь социолог Дэвид Брукс дасо аръёс талэсь азьло выль классэз усьтӥз — со нимаське бобо (богемаысь буржуа). Соос уло таӵегес куронъёсъя:
1. Бадӟым уксё быдтыны луэ туж кулэ арбериослы гинэ.

Кылсярысь, дуно спорт арбериослы яке корка котырлы сюрс долларъёсты быдтыны — со ӟеч, нош икра-фуагра но эшшо огез чильк-вальк авто — шукыръяськон ини.

2. Мае ке басьтытозь, басьты сыӵезэ ик, но профессиональнойзэ. Супер велик, хайлайтер, книгаос — мед ваньмыз луоз «непопсовой», кыӵе ке сюбег удысын ужась муртъёслы тупась.

3. Ӟечлык чыры-пырыосын адӟиське. Огпол тодмо диджее вераз вал: дӥськутэд «сэкондысь» луыны быгатэ, нош носкиед одно ик самой дуноез но умоез, 3 сюрсэн. Сыӵе пияшъёс юо крафтовой сур но тушъёссэс азвесь «туш сынан сынъёсын» сынало.

4. Винтаж, калык сямъёс но огшоры гурт дизайн чилясь дворецъёслэсь устогес. Узыръёслы возьытгес ик узыр луэмзэс возьматыны, соин ик соос туж ярато «примитивной» ӝӧкъёсты-пуконъёсты, песяйёслэсь выж лёгетъёссэс, куосты но пулэсь шудонъёсты. Таиландысь юрт чеберъянъёс уз вае, нош Тибетысь вуттозы.

5. Туалаез вӧзын — киын лэсьтэмез. Кияд — макбук, сэргын — вуж фотоос но вашкала чыры-пырыос. Вот та вазаез кузьмаз вал киросанай, куштыны жаль. Котькытын хайтек гинэ — акыльтымон. Выль наушникъёс пыр бесерман крезь кылӥське.

6. Огшорыез — дуно. «Пролетарий» мыноз нюлэскы но ачиз кудымульы бичалоз, нош бобо со кудымульыез ик базарысь вить поллы дуноенгес басьтоз. Бобо тодэ огшорыезлэсь зэмос дунзэ. Эшшо со быръе огшорыез пӧлысь тужгес но умой огшорызэ.

7. Дуныз шоры уг учко. Учко арберилэн чебер, аспӧртэмлыко, капчи но туала луэмез, инкуазьлы тупамез шоры. Зэм но, ваньзэ басьто мылкыд понна. Мылкыд ке ӧвӧл, арбери сярысь номыр мадьыны ке… Соку со ширпотреб. Со уг тупа.

Бобо нырысь ик пыкъяське визь вылэ. Озьы ке но сое уксётэк син азе пуктыны уг луы. Та класс кылдэмын городын, со укыр туала но дыртэ улыны, соин ик солы кулэ машинаос, гаджетъёс, чеберманъёс. Огшоры пу интые — супер экобрусчатка, базар дӥсь интые — дизайнерен вуремез, силё куян интые — нимаз жаг куян мульдаос.

Буржуазилэн улон сямыз модае пыре. Учке гуртъёсыз: ваньзы кыӵе ке фин технологиосъя корка пукто. Шат та куатетӥез курон ӧвӧл? Асьме пересьёс тазьы ик пулэсь лэсьтӥськылӥзы. Маин бобо висъяське: профнастилэн но сайдинген со уз выры, со тужгес но усто экоматериалъёсты быръёз.

элита

Элита луон понна трос тодон-валан люкано, вӧзаз — коньдон.

Суро-пожо

Удмурт элита ассэ пролетариат но, бобо но кадь возе. Зэмос удмурт элита — со визьмо, дышетскем муртъёс. Таӵеосыз гинэ адямиос валало трендъёсты но соосъя обществоез тупатскыто. Элита возьматэ, мае нуллоно, кылзоно, кызьы корка пуктоно, кызьы нылпи будэтоно. Озьы ке но вань на мукетыз удмурт элита, уксёё муртъёс (Г. Москалэн теориысьтыз элита). Нош кызьы асьсэды возё та адямиос? Соос дӥсясько вуз карон юртъёсын, шерез утча удмурт дизайнеръёсты (ӵошатон вылысь: Эстониысь президентлэн кышноезлэн дэремъёсыз ялан сюро эстон дизайнлы сӥзем каталогъёсы).

Асьме актёръёслы, шоу нуисьёслы, кырӟасьёслы бобо классозь будоно но будоно ай. Умой-а та, урод-а, но ӵапак шоу-бизнесысь но визьмын ужан удысъёсысь адямиос — зэмос удмурт элита. Соос кивалто малпанъёсын, шӧмъёсын. Соос ик азьлане шонер сюрес возьматыны кулэ кадь.

В. Паретолэн теориезъя элита — со тужгес визьмо но адскымон муртъёс. Та адямиос медиа дуннетэк, Интернеттэк но газеттэк ӧй адскысалзы. Озьыен, ивор сётон но кылан-буран дуннеын бергась муртъёс — элита ик вань. Элитае сюро соос, кин мае ке лэсьтэ, воштэ, мукетъёссэ сьӧраз валтэ. Уксё сямен ик, бадӟым ресурслы пӧрме ивор. Информация вӧлмытон — улон ӧръёсты воштыны амал, со сётэ власть.

Мар огазея богемаез, элитаез но бобоез? Вань та сӥос кыстӥсько ог-огзы борды. Адямиослэн потэ элитае пыремзы, угось соосты кыске власть, трендсеттер луон, мукетъёсты улыны дышетыны луонлык. Кин кыстӥське богемае, солэн творчество пыр улонэз воштэмез потэ. Кин ке интеллектуальной элитае пыре, политикъёсын но ужбергатӥсьёсын ӵош обществолэсь улонзэ воштэ. Туала богема но элита улыны кутско бобо сямъёсын, угось, огласянь, уг поты узырлыксэс возьматэмзы, мукет ласянь, уксёзы вань ик.

Удмурт элита пумысен малпанэ чырс. Ум быгатӥське на ми уксёез визен огазеяны. Яке 1970-тӥ аръёсысь буржуа кадь выриськом (общество потребления), яке вуж богема кадь — уксё ӧвӧл шуыса ӝожтӥськиськом.

Туспуктэмъёс: Дарали Лели, Анна Образцова

Удмурт Дунне
By Удмурт Дунне 22 сентября, 2015 12:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<