Крезез золтэмын кылбуръёсын. Гай Сабитов вордскем дырысен 100 ар

Удмурт Дунне
By Удмурт Дунне Сентябрь 17, 2015 14:20
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

УАССР-ысь культура удысысь дано ужась, Удмуртилэн Кун премиезлэн лауреатэз Гай Сабитов данэ потӥз кырӟан луэм кылбуръёсыныз.

Финансистысь — дикторе

Гай Сабитов вордӥськиз Татарстанысь Кукмор ёросысь Выль Канисар гуртын. Гуртысьтыз покчи классъем школаез йылпумъяса, Ошторма-Юмьяысь 7 классъем школае мыныны контораысь справка басьтоно луэм, 12 арес тырмиз шуыса. Вордскем дырзэ возьматӥсь документъёс кылемын вылымтэ, лыдъяллям но гожтӥллям: вордскемын 1915-тӥ арын 15-тӥ сентябре.

Финансово-экономической техникумез йылпумъяса, 1933-тӥ арын со Татарстанысь кун банклэн контораяз ужаны кутскиз. Но улон интылы шуген вуиз Чистополе, отысен — Удмурт шаере. Дышетскем муртэ Удмуртиысь кун банке шумпотыса кутӥзы. Но литератураез яратон, кылбуръёсын тунсыкъяськон мылкыдыз 1939-тӥ арын Сабитовез вутто Удмурт пединститутлэн кылъя но литературая факультетаз.
Пединститутын дышетскыкуз, Г. Сабитов ӵем кыл-зылӥз удмурт радиопередачаосты, радиоспектакльёсты. Одӥг пол кылӥз дикторе ужаны ӧтёнэз. Нырысетӥ турез Гай Сабитович ортчиз, бадӟым списокын луиз 13-тӥез. Кӧня ке нунал ортчыса, нош ик ӧтизы куаразэ эскерыны, но со мыныны пумит луиз: отын, пе, монтэк но трос кырӟаны-вераны усточиос.

Но кылдэмез озьы вылэм, лэся. 1940-тӥ арын декабре ӝыт, Советской ульчаетӥ библиотекае мыныкуз, радиоын ужась Елизавета Осокина кунултӥз но радиостудие пыртӥз быгатонлыксэ эскерыны. Ваньмыз умой пӧрмиз. Озьы Гай Сабитовез, кыкетӥ курсын дышетскыкуз, радиокомитетэ дикторе ужаны кутӥзы.

IMG

Г. Сабитов яратылћз удмурт ужрадъёсты.

Кырӟась чуръёс

Гай Сабитовлэн ныры-сетӥ кылбуръёсыз 1938-тӥ арын «Молот» журналын но «Удмурт коммуна» газетын печатласькизы Т. Гай, Г. Гай, С. Гай, Г. Туганай кушем нимъёсын. Со нимъёс шоры тодмо писатель М. Петров (соку «Молот» журналлэн редакторез) кырыжгес учкылӥз, кылбуръёсыз ки улаз шедьыку, котьку ик Гай Сабитовлэсь аслэсьтыз фамилизэ пуктылӥз. М. Петров туж оскылӥз: та кылбурчи одно ик ас сюрессэ шедьтоз но удмурт поэзиез вылӥе ӝутоз.

Г. Сабитовлэн радиоын ужез но азьланьскиз. Война вакытэ кык но, куинь но смена ужано луылӥз. Сое удмурт Левитан шуылӥзы. 1947-тӥ арын, войнаез ортчыса, радиолэн хораз ужаны кутскиз Герман Корепанов. Огъя кыл шедьтыса, та кык дано адямиос гожтӥзы со вакытлы тупась трос кырӟанъёс: «Тупаса улон понна», «Мирез утём», «Дано мед луоз комсомол», «Дырто Кам вуос», «Колхоз кырӟан» но мукет.

Мукет крезьгурчиосын но гожтэ шаер, калык, шудбур сярысь патриотической кырӟанъёс, соку ик кылдо лирической но серемес кырӟанъёсыз («Паймод, эке!..», «Бырйиськись егит» — Г. Корепановен, «Кыӵе умой яратыны» — Г. Корепанов-Камскиен, «Нош вуиз тулыс», «Кикы» — Н. Шкляевен, «Эктыны ми яратском» — Н. Новожиловен). Радио луиз кылбурчиослы, композиторъёслы будон инты. Гай Сабитов шуылӥз: «Кырӟанъёсын мед шӧдӥськозы вакытлэн шокамез, асьме нуналъёслэн шумпотонзы, куректонзы но сюлэмшугъяськонъёссы».

Г. Сабитовлэн кылбуръёсызъя гожтэм кырӟанъёс шыпытэсь я гудыресэсь. Тросэз али но чузъясько. «Яратӥсько» книгаез понна Гай Сабитовлы 1975-тӥ арын сётэмын Удмурт АССР-лэн Кун премиез.

Одӥг пол Г. Сабитов ужаз бергес вуэм. Ӝӧк вылысьтыз записка шедьтыса, лыдӟе: «Тон, сонетъёс гожъяса, оскалты вал, оскисько — пӧрмытысалыд». Михаил Покчи-Петров писатель гожтэм. Г. Сабитовлэн йыраз соку ик лыкто таӵе чуръёс: «Сӥез-данэз ӧвӧл ни сонетлэн…». 10 ар ортчыса гинэ, Г. Сабитовлэн сонетъёсын тугокоез потӥз.

Сӥез-данэз ӧвӧл ни
сонетлэн,
Ӧз пыры со удмурт
поэзие.
Туэ, шуо, крезез
кылбурчилэн
Мед золтэмын луоз
мукет сӥен…

Гай Сабитовлэн тужгес быгатыса гожтэм произведениез — «Шунды но ӝужа но…» сонетъёсын тугокоез. О. Поскрёбышев ӟуч кылэ берыктэм бере та тугоко потӥз «Волга» журналын (1972, № 12) но «Радость» нимо книгаяз ӟуч кылын. Нош удмурт кылын потӥз «Яратӥсько» (1975) кылбур книгаяз.

Гай Сабитов лэчыт вералляз сюлмаськытӥсь учыръёс сярысь, быгатӥз ӟечсэ данъяны, уродзэ курланы. Кылбуръёсаз лирической геройёсыз — война пыр потэмъёс, гуртын, городын, заводын но лэсьтӥськонын тыршисьёс. Яратон сярысь но быгатыса гожъяз, трос ненег кылъёс шедьтылӥз. Кылбуръёсаз шӧдӥське аслыз гинэ тупась куараез. Лирической героез туж кельше аслыз авторлы. Трос кылбуръёссэ Гай Сабитов сӥзиз семьяезлы. Анна Яковлевна кузпалыныз вордӥзы но быдэ вуттӥзы 3 пиналъёссэс.

Роза Кириллова, филология наукаосъя кандидат

Гай Сабитов

Мусо шаер

Кузёяське шаерамы сӥзьыл:
Зор кыдыра бышкись шапыкъёсын.
Узьым гинэ вуись выль тол азьын
Коштанъяське вож-вож кальчаосын.

Шӧдтэк кылем лулпу арамаысь
Уй тӧл ишка бырдам сьӧд куаръёсыз.
Уд адӟы кадь ини тон нокытысь
Синмез няськась инкуазь суредъёсыз.

Нош мон понна вордскем Удмурт улос
Тулыс, сӥзьыл — котькуд дыре мусо.
Чильпыр тӧдьы тол дӥсеныз нош со
Сюан азьын чебер нылмурт тусо.

Юг-юг пишто садъёс, возь выл, нюлэс —
Тулыс шорын пурӟо кадь сяськаен.
Укно улын чирдэ чунчо пислэг,
Чипчирганзэ нёртэ горд шушыед.
Шутэтскыны выдэм музъем вадьсы
Нунал но кадь ӝужа ни сайкытгес.
Ӟечкыласа ужын тыршисьёсыз,
Хоръёс кисьто шулдыр кырӟанъёссэс.

Мед бен кузёяськоз сӥзьыл-шаян —
Шулдыръяське праздник,
кырӟа сюлэм:
Вордскем дырзэ пусъе мусо шаер,
Чиля но ворекъя шудбур тылэн!

Яратӥсько

Льӧль ӟардонэз яратӥсько
Ин гомаку сактон тылэн.
Тон бамъёстэ, дыр, миськиськод
Ӵукнаосы со ӟардонэн.

Лыз-лыз инмез яратӥсько
Сое сильзор гылтэм бере.
Со лыз инмез мон адӟисько
Синъёсысьтыд котькуд дыре.
Мон шундыез яратӥсько:
Ужа, тыршы — нунал югыт!
Шунды сётӥз, дыр, кожасько,
Сюлэмедлы тылси шуныт.

Кырӟанлэн вордскемез

Г. А. Корепановлы
Кыл бӧрсьы кыл, чур бӧрсьы чур —
Уйбыт пуки, гожтӥ кылбур.
Лушкем малпай: луоз кырӟан.
Шумпотонэн сюлэм кырӟа.

Нош шумпотон вылэм на вазь —
Герман лыдӟе, лыдӟе, уг вазь…
Гожтоз ик-а бен, уз ик-а
Кылбурелы со музыка?…

Ортчиз арня, ортчиз тулыс,
Нянь шӧм пельтӥз ю бусыысь.
Тӧл бурд вылын кырӟан гурен
Шулдыр лэйка ни кылбуре.

Гай Сабитов

Удмурт Дунне
By Удмурт Дунне Сентябрь 17, 2015 14:20
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<