Кӧня сылэ вӧсям ӝук? Вуз карыны яра-а калык лулчеберетэн?

Удмурт Дунне
By Удмурт Дунне Август 18, 2015 08:54

Та юанъёс ӵемысь лыктыло йырам. Мугез таӵе, малпасько: берло дыре тросэз вырыны кутскизы этнотуризмен, котькуд ёросын вань кыӵе ке этноусадьба. Мар ке но сюлэмез ӵабъяны кутскиз: умой-а соослэн алямзы?

Этнотуризм — туала удмуртлыклэн огез бадӟым люкетэз. Этноусадьбаосы кыстӥське удмуртлыкен тунсыкъяськись, кунгож сьӧрысь вуэм калык, гурт улонэз ноку адӟылымтэ адямиос. Соос понна вань удмуртэз — со зэмос экзотика. Удмурт шӧмез туризме пыӵатонлэн кӧня ке мугез. Нырысь ик, табыш поттон — номыр уродэз отын ӧвӧл кадь. Кыкетӥез — удмурт сям-йылолъёсты улэпкын возьматон, удмурт культураез вӧлмытон. Таиз эшшо но умойгес. Но татын урод палыз но вань, мыным потэ.

Котькуд калыклэн сям-йылолъёсыз — со бадӟым семиотической система. Котькуд обряд тырмытэмын трос знакъёсын, сям-йылолэ пырись котькудӥз вырос, кыл, гур юнме шорысь малпамын ӧвӧл. Отчы пыӵатэмын удмуртъёслэн дунне шоры учкемзы, аспӧртэм визьзы. Ваньмыз со сокем пыдло ватэмын — али асьмеос троссэ йырвизьмынымы валаны ум быгатӥське, но удмуртъёс, малпасько, лулшӧдонэнызы сое валало на, вашкала пуштрослэн бадӟым люкетэз соослэсь но ватӥськемын ни ке но. Палэнысь адямилы сое валан понна туж мур копано. Сотэк со ваньмыз — огшоры аттракцион. Перепеч пӧрме паркысь басьтэм сакыр ваталы, вӧсям ӝук — попкорнлы, кудзэ сииськод кыӵе ке возьматӥськись обрядэз киноез кадь учконъяд. Йылол ыштэ аслэсьтыз зэмос валанзэ, пӧрме вузлы. Нош котькуд вузлэн вань аслаз дунэз. Та бордысь ик юан кылдэ — кӧня сылэ асьмелэн калыкмылэн лулчеберетэз?

культура

Этнография музейёс — со копак мукет маке. Отын ваньзы шӧдо условностез, музей экспонат — со кыӵе ке консерва продукт выллем. Отын учкыны гинэ луэ, киосыныд эн кутылы, ява! Нош куке туристъёслы возьматӥсько сям-йылолъёс, нокыӵе катъёс уг ужало, со ваньмыз шудонлы пӧрме.

Мукет ласянь, таӵе ужен вырон — со удмуртлыкез туала куронъёслы тупатон, адаптировать карон. Асьме вакытэ ваньмыз пушъе этикеткаосын. И. Бродский гожтӥз вал та ласянь: «И пространство торчит прейскурантом». Калык культураен мед тунсыкъяськоз шуыса, кулэ брендъёс кылдытъяны яке дасьёсызлы реклама карыны. Отысь ик потэ: «Эн си Milky Way, перепеч тон си!» Мае ке азинтон понна кӧнязэ ыштӥськом. Тусыз кыле, нош пушваланэз? Ыше этикеткаос пӧлын.

Перепечен-кумышкаен утялтонын номыр аламаез ӧвӧл. Асьмеос котькуд пырись куноез шумпотыса пумитаськом ук, мукет адямиен одӥг ӝӧк сьӧрын сиськон — со аслэсьтыд ӟеч мылкыддэ возьматон. Нош куке, шуом, вӧсяськон интыосты возьмато, эшшо ик вӧсяськон обрядъёсты — юзыр-кезьыр луоно ик.

Зэм, этнотуризмлэн одӥгез кулэ ужпумез — Удмуртилэсь ӟеч туссэ кылдытон. Ӵемысь туристъёс, зэм но, мукет культураен тодматскыкузы, адӟо йӧгурезьлэсь йылзэ гинэ, окто йӧлвылзэ, шуыны луоз. Эйфель башнямы, Кремльмы, Коллизеймы асьмелэн ӧвӧл. Соин ик ӵектӥськом сям-йылолъёсмес, калык лулчеберетмылэн шорсюлмаз соку ик лэзиськом тодмотэм муртъёсты. Ульча шоры гольык потэм выллем, кыӵе ке культурной эксгибиционизм.

Яке мон озьы керӟегъяськисько удмуртъёслы тупась ватӥськыса улыны яратӥсь сямылы луыса? Футляре ватӥськыса но улыны туж ик умой ӧвӧл…

Анастасия Шумилова

Туспуктӥз Денис Корнилов

 

Удмурт Дунне
By Удмурт Дунне Август 18, 2015 08:54
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<