Вотка ёросын ортчиз ужась егитъёс куспын радъяськись «Юр-Яр» турслёт

Удмурт Дунне
By Удмурт Дунне Август 24, 2015 17:24

Ӵуказе Вотка ёросын ужась удмурт егитъёс пӧлын «Юр-Яр» турслёт  ортчоз, луоз шулдыр! — оскытӥз ужрадэз радъясь,  «Шунды» огазеяськонлэн тӧроез Ольга Тронина.  Озьы ик луиз!

Транспорт турслётэ мыныны сюриз —  Кабачигурт командаысь пияш огнам, пе, машинаен мынӥсько. Ӵукна инмын шунды пиштэ, пилемъёс уг поръяло. Сюрес дурын пу вылын гозыен гожтэм «Юр-Яр», векчи изъёсын кисьтам дэри сюрес, сик пушкын луд… Ми вуим! Интыез, зэмзэ но, туж чебер: татын ик ошмес, нюлэс, бамъёс но нюкъёс…

SONY DSC

Дэри ёросысь Выль Казьма гуртысь «Зарни чорыгъёс» команда.

«Юр-Яр» турслётэ вуиз 4 команда. Дэри ёросысь Выль Казьмас черкогуртысь егитъёс, Эгра ёросысь Кабачигуртысь команда, «Шундыкар» лагерьысь ӧнерчиос, вожатойёс но Шаркан ёросысь Пороз гуртысь туристъёс. Тани соос чуренак пуксизы сюрес кузя — лэсьтоно бивуак. Резь-куаж: кин ке пу дася, кин ке палатка пуктэ, кин ке интыез котыртэ. Мон улӥ Порозысь егитъёсын ӵош, пайми: макем чаляк но чылкыт соос пуктӥзы бивуакъёссэс. Шыльк-шальк — ваньмыз дась. Соос, пе, турслётъёсы трос пол ветлэмын ни. Та команда вань ужъёссэ огъя малпанъя быдэстӥз. Командазы нимаськиз «ПельняньКо». Кырӟанзы но пельнянь сярысь вал, турсиёнзы но — пӧртэм буёло куарняньлэсь пельняньёс. Вашкала калыкъёс кадь вӧсяськизы соос Быдӟым пельняньлы!

Нырысетӥез но валтӥсез вожвылъяськон — турист сюресэз ортчон. «Шунды» огазеяськонлэн Вотка ёросысь ёзэныз кивалтӥсь Дмитрий Черыгов оскытӥз ке но, трасса туж ик секыт ӧвӧл шуыса,  командаос пуйизы, кылем арен ӵошатыса, туэ секытгес вал! Огзы бӧрсьы мукетыз турполосае потӥзы «ПельняньКо» но «Малы ми» шундыкар командаос. Берло кабачигуртъёс но казьмасъёс. Мон вожвылъяськонэ ӧй пыриськы ке но, фотоаппаратме кутыса огез команда сьӧры кошки. Нырысетӥ этапе ик вуыса, дэрие колӥськи — нюр инты вылэм. Та этапын командалы сётӥське 2 пу, соосты кутыса, ваньмызлы нюр вамен выжоно. «ПельняньКоос» сётэм ужез ӝоген быдэстӥзы но бызьыса азьлань кошкизы. Вуизы пичи тымет дуре. Татын лэйкась выж вылтӥ потоно, шонертэм вамыш лэсьтӥд ке, вуэ усёд. Нылъёс каллен нюжтӥськыса выж вылтӥ потӥзы ке, секыт воргоронъёс вуэ пыдесозязы, выйылӥзы. Озьы ке но — потӥзы.

SONY DSC

Татын лэйкась выж вылтӥ потоно, шонертэм вамыш лэсьтӥд ке, вуэ усёд.

Мон ӧй малпа вал, 40 метръем вырйыл сыӵе меӵ шуыса. Тубиськод — котыр писпу вайёс ымныре мырӟисько, нюр музъем вылтӥ пыд гылӟе. Нош командаос татӥ эшшо 2 секыт вайёсты тубтӥзы на. Мон аслэсьтым фотоаппаратме гинэ нуыса жади: ӝыны сюресме ортчи но, куашкам кыз вылэ пуксьыса, шутэтскытэк ӧй чида. Валай: гурезьёсы мыныны мон дась ӧвӧл на!

Тросэз командаос кышказы вал герд керттылонъёслэсь. Юнме ӧз, таиз уж туристъёслы, зэмзэ ик, секыт йӧтӥз. Со понна тылскыны Порозысь егитъёс 5 секундскын тылскизы, палатка ӝог пуктӥзы,  эшсылэсь сӧсырмем пыдзэ но шонер керттылӥзы. Мукет командаос но та ужен ӧз ӝегалэ.

SONY DSC

Ӵошатскон кутскиз пукыӵысь ньӧл лэзьянэн.

Бусыысь нюлэсъёс пыр потыса, мырдэм шедьтӥ мукет этапез — компасэ но картае сьӧрам ӧвӧл ук. Татын командаослы пуос ултӥ потоно, боды борды йӧтскытэк. Йӧтскид ке, со усёз. Шуг! Тӧл ик кужмогес пельтэ ке, бодыос тэляло ни но. Нош «пельнянКоослэн» пельпумъёссы паськытэсь, мугоръёссы бадӟымесь. 5 бодыез уськытӥзы. Соос бере вуизы пичи мугоро казьмасъёс — таос 2 боды борды гинэ йӧтскизы.

— Ӟечокъёс, ӟечокъёс! — кылӥськиз нюлэс сьӧрысь. «ПельняньКоос» финише вуиллям. Нош кытын соос бере турполосае потэм «Малы ми» команда? Тани-тани финише 20 минутлы бергес потэм казьмасъёс вуозы ни. Йыромиллям! Быдэс час этапъёсты утчаса ветлӥллям но 9 интые 4-зэ гинэ ортчиллям.

— Со понна, ми шулдыр шутэтским! — верало шундыкарчиос.

SONY DSC

Шаркан ёросысь «ПельняньКо» команда вӧсяське Быдӟым Пельняньзылы.

Зэм но, турполоса туж усто дасямын вал. Пельнянькоос юромо лыдъязы — 4 но ӝыны иськем! Жадёнзэс шӧдытэк, эшъёс мынӥзы бивуакъёсазы — отын соосты возьма вал ни ческыт сиён! Командаослэн валтӥсь пӧраськисьёссы мар гинэ лэсьтӥллямтэ. Кылсярысь, казмаскаос дунъясьёсты куноятӥзы чорыген салатэн но шыдэн, порозъёс пӧртэм буёло пельнянен. Командаос шутэтскыса вуизы-а, ӧз-а — дыр вуиз футбол шудыны. «Пельнянь, азьлань!» — кесясько порозъёс. «Пыдъёстэс эн жалялэ, тупез зол тӥ ӵыжалэ!» — кесясько шундыкарчиос. Шудон туж пӧсь вал.  Вормиз Выль Казьмасысь команда. Ӝыт егитъёс кырӟазы турист кырӟанъёсты но возьматӥзы видеосуредъёс. Позыръяськон бере ӝыны уй тылскем дурын арган но гитара улсын удмурт кырӟанъёс чузъяськизы. Зор но, тӧл но таизлы ӧз люкеты.

Мукет нуналаз, жаляса верано, нокыӵе ужрадъёс ӧй вал ни. Кулэ вал, дыр. Тодӥм, кин вормиз. Кин малпаськоды? Конечно, Шаркан ёросысь «ПельняньКо» команда!

Таӵеез понна турслётэ вуоно. Малпай, туэ ӧз пормы ке но, вуоно арын мон одно ик аслэсьтым командаме бичаса, пырисько «Юр-Яре»!

Мария Векшина

Удмурт Дунне
By Удмурт Дунне Август 24, 2015 17:24
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<