Кунгожсьӧр студентъёс ярато удмурт гуртэ потаны. Кызьы ортче удмурт кылъя гужем школа

Удмурт Дунне
By Удмурт Дунне 13 августа, 2015 13:21
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Удмурт кылэз дышетӥсь кунгожсьӧр студентъёсын мон нырысьсэ пумиськи, школаын дышетскыкум. Соос вуылӥзы милям гуртамы. Гуртоос понна со зэмос экзотика вал.

кп1

Кунгож сьӧр студентъёс удмурт культураен тодматско.

Гурт калыклы паймымон луиз: ми сыӵе вольыт удмурт кылын ум вераськиське, нош соос шалтыр гинэ потто, мукет кылъёсты но тодо на. Бен, куддыр астэ пичи нымы кадь кожаськод трос кылъёс тодӥсь адямиос вӧзын. Арысь аре кунгож сьӧрын удмурт кылмес ӟеч тодӥсьёслэн лыдзы будэ. Туэ, кылсярысь, Удмурт кун университетэ удмурт кылэз дышетыны вуэм 11 адями пӧлысь 5-ез удмурт кылын туж умой верасько.

— Таяз аре ми студентъёсты 3 группалы люкимы, малы ке шуоно соос пӧлын вань трос аръёс ӵоже удмурт кылэз дышетэмъёсыз но, воксё тодӥсьтэмъёсыз но, — вера удмурт кылъя гужем школалэн кивалтӥсез, кылосбур тодосъя кандидат Дмитрий Ефремов. — Соин ик вераны луоз, та курсъёслэн ӟечлыксы арысь аре будэ: кунгож сьӧрысь студентъёс курсъёс бере удмурт кылэз ас понназы дышето.

 

Кытысь студентъёс удмурт курсъёсы лыкто? Валамон, Венгриысь, Финляндиысь, Австриысь егитъёс шаерамы ӵемысь вуыло вал. Но Канадаысь, Литваысь, эшшо ке Япониысь! Та кунъёсысь адямиослэн асьсэ малпаськон ӧрзы, пӧртэм тунсыкъёссы, но соос шумпотыса тодматско удмурт культураен, асьме калыклэн улонэныз.

— Татын котькудӥз студент аспӧртэмлыко, — верало дышетскисьёслэн кураторъёссы Саша Шкляева но Вика Титова. — Япониысь Такенори Мураками, кылсярысь, туж тыршись. Мар куриськод, со ваньзэ быдэстэ, сыӵе, лэся, япон калык. Кызьы шуиз солэн дышетӥсез Ирина Крестьянинова, Такенори туннэлы сётэм ужез гинэ уз, ӵуказелызэ но лэсьтоз. Занятиос бере со куддыр мастер-классъёсы но уг ветлы, гуртысь ужзэ лэсьтыса пуке.

9tJ3BEcvzwQ

Венгриысь Золтан Нэмет.

Удмурт курсъёсты радъясьёс быгато студентъёслэн синъёсазы тылгизьы ӝуатыны. Одӥг пол вуылыса, кунгож сьӧрысь егитъёслэн эшшо но татчы вуэмзы потэ. Тани удмурт кылъя гужем школалэн огез «пересь эшез» — Венгриысь Золтан Нэмет. Туэ пияш 4-тӥзэ вуиз ни Удмуртие.

— Венгриын бакалавриатын ӟуч кылосбуръя факультетын дышетскыкум, мон нырысьсэ сюри удмурт кылъя гужем курсъёсы, туж синмаськи удмурт кыллы. Берен Сэгедысь университетэ берытскыса, удмурт кылъя урокъёсы ветлӥ. Собере 2-тӥ но, 3-тӥ но пол Удмуртие вуи. Мынам потэ Удмурт кун университетын удмурт студентъёсты мадьяр кыллы дышетэме.

Шумпотыса учкиськод, кызьы егитъёс ог-огзылы юрттӥсько. Кылсярысь, Венгриысь Ребека удмурт кылын юанэз уг вала ке, солы Золли венгер кылын валэктэ ни, мукетъёсызлы — англи кылын. Угось ачиз со удмурт вераськон кыллы дышемын, кыл шыкысэз но узыр. Яке Канадаысь Александра шуэ ке: «Мон Торонтоысь, гуртысь…» Эшъёсыз юртто: «Карысь!»

Гужем школа 3 арня кыстӥське. Та дыр ӵоже студентъёс потало гуртъёсы, перепеч пыжыны, горд сюен, куроен киужъёс лэсьтыны дышетско, Удмуртиысь тодмо адямиосын пумиськыло. Юаськод ке, мар кельше тӥледлы Удмуртиын, соос дэмен шуо: сиён-юон, кырӟанъёс, эктонъёс.

Дмитрий Ефремов верамъя, урокъёсын вераськон кыллы тросгес дыр висъяське. Озьы удмурт кылэз пичи но тодӥсьтэмъёс арня куспын гинэ асьсэ сярысь мадьыны быгато ни. Кылсярысь, Япониысь Такенори Мураками шыпыт гинэ куараен кагаз вылэ гожтэм текстсэ вера:

— Мон нуисько эскерон уж Азия лымшор кылъёсъя. Дышетӥ бигер кылэз Япониын, тунсыкъяськисько башкир кылэн.

Удмурт кылэз дышетон — япон студентлэн кылосбур удысын выль вамышез. Мукет студентъёслэн удмурт кылэз дышетыны асьсэлэн мугъёссы. Тросэз соос пӧлысь гожто удмурт кылъя диссертация, выро фин-угор дуннеез эскерон ужен.

Венгриысь Гергей Антал: «Венгер кыл тупа удмурт кыллы. Мон фин-угор кафедраын удмурт кылэз дышетӥсько, татчы вуи удмурт кылын вераськонме волятыны».

Финляндиысь Нико Партанен: «Мон трос ар эскери коми кылэз. Перм кыллэсь диалектъёссэ удмурт кылтэк котыр ласянь валаны уг луы. Соин малпай удмурт кылэз дышетыны. Табере коми кыллэсь уйпал диалектсэ паськытгес эскеро».

кп2

Студентъёс Кияса ёросысь Карамас-Пельгаын.

 

Санкт-Петербургысь Максим Кузнецов: «Удмуртиын мон котькуд гужем улӥсько. Но удмурт кылэз дышетыны кутски 2011-тӥ арын. Та курсъёсын удмурт гуртъёсы вуылэммес возьмасько».

Литваысь Симонас Норейкис: «Мон али Финляндиын дышетскисько, мынам специальносте — фин-угор кылъёс. 3 ар талэсь азьло Финляндиын конференциын удмуртъёсын тодматски но, соос мыным веразы: ойдо удмурт кылэз дышетыны. Мон соглаш луи».

Венгриысь Ребека Кубич: «Мон дышетӥсько удмурт кылэз, малы ке шуоно милям финно-угристикая кафедраямы вань сыӵе адямиос, кинъёслэн анай кылзы удмурт. Озьы ик мон али магистрской уж удмурт кылъя гожтӥсько. Темаез — каронкылъёслэн тодмотэм ортчем дырзы».

Венгриысь Золтан Нэмет: «Мыным туж кельше удмурт кылъя курсъёслэн программазы. Туэ, кылсярысь, ми мыномы Сарапулэ. Кылем арын таӵе луонлык ӧй вал».

кп

Канадаысь Александра Келлнер.

 

Канадаысь Александра Келлнер: «Мон куке Финляндиын, куке Германиын улӥсько, гожтӥсько фин кыллэн синтаксисэз сярысь диссертация, ужасько англи но фин кылъёсысь берыктӥсьын. Азьло дышетӥ ни вал коми кылэз. Малпай, удмурт кыл солы матын, соин ик мыным тунсыко луоз. Луиз!»

Москваысь Даниил Зайцев: «Мон ужасько православной издательствоын, фрилансер. Курсъёсын мон берыктон ужен вырисько. Ужасько лингвистикалы сӥзем фин-угор проектъёсын. Ачим мон эрзя, аслам калыкелы трос проектъёс лэсьтӥ ни. Удмуртъёслэн но тунсыко малпанъёссы, мон соосты асэстыны малпасько».

Мария Векшина

Туспуктэмъёс: vk.com/krykmas_paljos

Удмурт Дунне
By Удмурт Дунне 13 августа, 2015 13:21
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<