Постэтнофутуризм яке этнофутуризмлэн постэз

Удмурт Дунне
By Удмурт Дунне Август 27, 2015 13:43

Критикъёс, литературоведъёс, культуртрегеръёс трос пол веразы ни: этнофутуризм кулӥз. Нош дыр ортче, вордӥсько выль кылбуръёс, выльысь но выльысь ортчо суредаськисьёслэн симпозиумъёссы, лэсьтӥське этномода. Этнофутуризм больницаын кылле, но шока… Кутске постэффект. Нимыз солэн — постэтнофутуризм.

Вань ке дунне вылын зэмос постэтнофутурист, со — Чудья Жени. Одӥг кияз — электрогитара, мукетаз — кубыз. Одӥг кияз — холст, мукетаз — граффити-баллон но трафарет. Со кылзэ пост-панк группаосты, Пероггуртысь вашкала гуръёсын сураськыса плейлистэз. Тыбыр сьӧраз нош солэн — нылъёс. Пичи дыръязы Денди приставкаен шудыса но «Черепашки-ниндзя» мультфильм учкыса будэм нылъёс. Али соос ветло фольклор ансамбльёсы, нулло вашкала куэм дэрем, юо глинтвейн но кырӟало вашкала гуръёсты. Ваньмыз сураськиз.

кизисько

Этнофутуризмлэн котьку валтӥсь малпанэз но концепциез вал ке, постэтнофутуризмлэн нокыӵе малпанэз ӧвӧл. Выль удмурт тинейджеръёслы ваньмыз дунне, соос ужало фермаын, гидын яке кеносын, со дыре ик Интернет кутӥсь интыосты утчаса ветло. Постэтнофутуризм улэ гуртын но карын. Черкогуртлы нош кулэ на попса. Туала поколенилы советской попса — соцреализм но 1990-тӥ аръёсысь этнофутуризм — со сыӵе ик вашкала мифология кадь.

«Время приключений» мультфильмын кадь ик, ми улӥськом постапокалиптической удмурт дуннеын. Соин ик постэтнофутуризм — со идеология ӧвӧл, со милям улонмы. Ми поръяськом Интернет бусыын, кеносъёсын селфи лэсьтӥськом, лыдӟиськом Джек Керуакез, вераськиськом аспӧртэмлыко удмурт диалектъёсын, интернет-цитатаосын пазяськиськом. Ми лыктӥм араны удмурт атлантъёсын кизем бусыосы. Комбайнъёстэк. Селфи бодыен но вашкала дэремъёсын.

Богдан Анфиногенов

Удмурт Дунне
By Удмурт Дунне Август 27, 2015 13:43
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<