Ми асьмеос йӧспӧртэмесь. Туризм Удмуртиез тодмо каре.

Удмурт Дунне
By Удмурт Дунне 13 августа, 2015 16:37

Берло дыре тросэз адямиос, зарезь дуре мынэм интые, тымет дурын шутэтско. Гуртлэн улонэныз но калыклэн сям-йылолъёсыныз тодматскыны туртто. Нош Удмуртиын трос меда сыӵе интыос? Та сярысь умой тодэ Евгения Лекомцева. Солэн семьяез Кезын этнотуризмен выре.

1vyLx0Wo3v8

Е. Лекомцева

— Удмуртстатлэн ивортэмезъя, Удмуртиысь вань туристъёс пӧлысь 1 процентэз гинэ шаерамы шутэтско. Озьыен, туризммы туж ик азинскемын ӧвол?

— Кызьы учкод. Нырысь ик, лыдпусъёсты чотасьёс уг тодо, кӧня адямиос ас понназы шаермылэн пӧртэм пумъёсаз вуыло. Кылсярысь, Дэбесысь Сибирь трактлы сӥзем музее кӧня адями пыраз, тодо асьсэос музейчиос гинэ. Ми дӥне, Кезэ, 20 кунъёсысь адямиос вуылӥзы ни, но Удмуртстат со сярысь уг тоды. Берло дыре, зэм но, адямиослы тунсыко гурт калыклэн улонэз. Тросэз шутэтскыны мыно гуртъёсы, инкуазе пото, калык культураен тодматскыны выро. Соос шумпотыса мыно бесерманъёслэн Кӧрбаназы, удмуртъёслэн Герберазы. Гуртъёс но, кылсярысь, Балезино ёросысь Юнда, Кияса ёросысь Уддяди, шумпотыса пумитало сьӧрлось лыктэмъёсты. Этно-, агротуризм эшшо но ӝутскысал, элькун солэсь кулэлыксэ валасал ке.

— Кун юрттытэк, элькунысьтымы туризмъя центръёс азинскыны уг быгато?

— Милям ӧвӧл сюресъёсмы. Балезино ёросысь Юнда черкогуртысь клубын ужасьёс тӥледыз шулдыртозы но, сюдозы но, кӧлыны но выдтозы. Но отчыозь вуыны шуг, сюресъёссы уродэсь. Огпол отчы финъёсты зор бере автобусэн нуизы. Автобусэз отчы-татчы сэрпалляз. Финъёс шуизы: «Татчы ми ум ветлэ ни!» Бадӟым шуг-секытъёс кылдо, музъемъёсты ас вылэ гожтыку. Тросэз соос нюлэс, пудо сиён будэтыны чакламын, соин ик отчы шутэтскон инты лэсьтон понна нырысь документъёсын кема бызьылоно луэ. Али катъёсын ӧвӧл на валэктэмын, мар со гуртын шутэтскон. Ми, малпаськид ке, гостиница кадь ужаськом.

Мукетыз ужпум элькун шулдыръяськонъёсъя кылдэ. Кунгожсьӧръёслы быдэс арлы вазьгес тодыны кулэ ни, ку, кытын, мар радъяськоз. Нош ми Герберлэсь ортчон нуналзэ гинэ но тулыс тодӥськом ай. Кунгожсьӧръёс уг вутто документъёссэс бичаны.

— Удмуртия этнотуризмлэн шоркарыз луыны быгатэ ук?

— Удмуртиез тросэз уг тодо. Татарстанэз, Чувашиез тодо, нош милесьтым шаермес — уг. Эшшо ке тросэз Ижевскез но Удмуртиез огазе уг герӟало. Адямиос понна та 2 пӧртэм дуннеос. Удмуртия сярысь веран понна реклама сётъяны кулэ, шуоды тӥ. Но со туж дуно сылэ. Ачим 9 ар та удысын ужамын бере, тодӥсько. Умой, элькун быдэс дунне тыр чузъяськись фестивальёс радъя шуыса, кылсярысь, «Пельняньлэн нуналыз». Удмуртия тодмо луыны кутскиз Брангуртысь песянайёс «Евровидениын» вормем бере. Калык соосты ӧз вунэты на, соин ик туризмез азинтӥсьёслы та борды кырмиськоно. Кулэ кылдытыны бренд. Удмурт дӥськутэн 2-3 нылъёс шаермылэсь туссэ уг возьмато.

— Таиз ласянь, иське, котькуд ёросын аслаз брендэз луыны кулэ?

— Та туризмлэн огез визьмо вамышез. Кылсярысь, нылпиос мыно Грак ёросэ Баба-Яга доры куное, Шарканэ — Тол бабай доры, историен тунсыкъяськисьёс — Глазов ёросысь Иднакаре. Туризмъя программаын кыӵе ке шорсюлмыз луыны кулэ, кудӥз калыкез ас бордаз кыскоз. Ми, кылсярысь, нуллӥськом Камлэн ошмес синэз доры. Со сяна, программаын одно ик кулэ луыны песянайёслэн кырӟамзы, сям-йылолъёсты возьматонъёс. Малы Лудорвае трос адямиос ветло? Малы ке шуоно отын ваньмыз вань: отын возьмато удмуртъёслэсь улонзэс, сиён-юонъёссэс, сям-йылолъёссэс, шулдыръяськонъёссэс. Вань музейзы но, кӧлон интызы но.

— Мар кароно туризмез азинтон понна?

— Кулэ басьтыны мукет улосвылъёслэсь туризмъя дась программаоссэс. Адӟем карыны луэ Калуга областьлэсь. Отын агро- но этнотуризмзы зол азинскемын. Нош асьмелэн ёросъёсысь культурая юртъёслэн программаоссы ваньзылэн огкадесь. Лэсьто проект, соосты улонэ пыӵатыны элькун сётэ 100 сюрс. Нош мар гинэ та уксёен быдэстыны луоз? Кулэ кылдытыны огъя туръёс. Тани огазеяськозы, кылсярысь, Эгра, Дэбес, Кез ёросъёс но, программазы туж узыр луоз. Шутэтскисьёс Эгра ёросысь Сундуре Лӧпшо Педунь дӥне пыралозы, собере Дэбестӥ Сибирь тракт кузя ортчозы но Кез ёросын Кам шурлэн ошмес синаз вуылозы.

— Удмуртиын вань-а сыӵе инты, кытын тыныд Удмуртиысь вань шутэтскон интыос сярысь вералозы?

— Возьыт, но ӧвӧл. Милям картаен вотэсбаммы гинэ но ӧвӧл, кытысь адӟыны луэ шаермылэн пӧртэм серегъёсысьтыз туристической интыосты. Ижысь куд-ог туркомпаниос Удмуртиетӥ ветлон сярысь вералляло. Кунгож сьӧрысь фирмаос сярысь ке, ми Финляндиысь одӥг агентствоен кусып возиськомы. Со шутэтскисьёсты нуллэ Марий Элэ но, Карелие но. Али туризмен коньдон поттыны луэ-а? Кулэ, мон шуысал. Туризмез шаерамы азинтӥд ке, Удмуртилэн нимыз тодмо луоз.

— Тынад семьяед выре этно- но агротуризмен. Тӥ возьматыны выриськоды удмуртъёслэсь улонзэс но сям-йылолъёссэс. Калык оске-а?

— Мынам анаелэн, Екатерина Лекомцевалэн, ӝажыез сям-йылолъёс сярысь книгаосын тырмытэмын. Ми удмурт сюанъёс возьматӥськом, ӝук вӧсяськом. Кырӟаны ми доры ветло «Марӟан» ансамбльысь песянайёс. Сям-йылолъёсты, зэм но, ми спектакль кадь пуктӥськом.

Мария Векшина

Удмурт Дунне
By Удмурт Дунне 13 августа, 2015 16:37
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<