Кызьы тэроно 10 минутэ? Маин тунсыко вакчи кино

Удмурт Дунне
By Удмурт Дунне Август 27, 2015 14:09
11371081_1481152185532690_633748155_n

— Ваньмыз та уз тэры 10 минутэ!» — пӧсекъяло егитъёс.

3-тӥ-12-тӥ гудырикошконэ ми улӥмы Выру ёросысь Тсийстре гуртын. Быдэс арнязэ шыпыт эстон гуртэз ми «чидамы», удмурт кино лэсьтоно шуыса.

Ми — со поляк продюсермы Петыр Палган, сценарист Дарали Лели, артистъёс Костя Ложкин, Серёжа Наговицын, Вадим Дмитриев но Марина Самсонова, арт-ӧнерчи Ксюша Чимали Ворончихина, видеоен вырись Влад Степанов.  Лагерь сярысь малпан кылем арын кисьмаз. Соку инвожо толэзе Тсийстреын нырысьсэ ортчиз фин-угор кинолы сӥзем фестиваль. Солэн кичӧлтӥсез — шаплы но визьмо венгер режиссёр Эдина Чюллёг, кӧня ке ар улэ но ужа Эстониын, дышетскиз Балтик фильм но медиа академиын. Туэ Эдина выль огазеяськон усьтӥз — SUFF (фин-угор кино фонд).

Удмуртъёс понна дышетскон лагерь радъян — Петыр Палганлэн малпанэз. Со Удмуртиын ортчыны кулэ вал, но капчигес луиз удмуртъёсты кунгож сьӧры вайыны. Нош но нош INWIS kinopottonni азьын огкадь ужпумъёс сыло: утчано сценаристэз, режиссёрез, операторез, куараен вырисьёсты… Ӧвӧл асьмелэн таӵе ӧнерчиосмы. Чеберлыко фильм лэсьтыны мылкыд карисьёс шуге-леке вуо.

Лагере трос калык ӧз вуы — вакчи кино лэсьтыны малпам. «10 минутлы рос-прос кино» — тазьы адӟе фильмез Палган. Короткометражкае одно ик пыртоно гуртэз, нюлэсэз, фермаез, магазинэз, кафеез…

Ваньмыз та уз тэры 10 минутэ!» — пӧсекъяло егитъёс. «Кызьы уз тэры? Учкисько ке, воксё уд валаське, мар со ӟеч кино», — гань-гань вазе продюсер. «Тон милемыз визьтэм кожаськод-а?» — вожзэ поттэ егит режиссёр Костя Ложкин но дас пол жаля, дас минутъем кинолы режиссёр луыны соглаш луиз шуыса. Артистъёс ветло корка но азбар кузя — чиданзы тани-тани пӧсьтоз. Одӥг, кык нунал гожтӥське сценарий… Юрттэт вуэ дышетӥсьмылэсь, эстон сценаристлэсь Анттилэсь. Шуэ: нырысь юан пуктыны кулэ: мар сярысь кино? Марлы та фильмез пуктоно? Кин валтӥсь герой, кинлэсь мылкыдъёссэ ас вылаз басьтоз учкись? Воштӥське-а герой та фильм пумын? Уг ке, марлы кулэ та кино? Конечно, та юанъёс нырысь ик полнометражной фильмъёс сярысь. Нош вакчи киноын, Антти малпамъя, луыны кулэ сыӵе яркыт интыез, кудӥз учкисьлы чилектэм кадь шуак йӧтэ но вань малпанъёссэ бугыртэ.

Удмуртъёслэн вакчи фильмъёссы трос ӧвӧл, вань тэтэ карисьёслэн, школаын дышетскисьёслэн ужъёссы. Нош Европаын короткометражкаослы фестивальёс сӥземын. Йӧно жюриос пуко но дунъяло сюосын вуись вакчи роликъёсты. Вакчи киноез лэсьтыны капчигес-а меда? Ӧйтӧд. Мон понна со нимысьтыз жанр, нош жанрез тӥяны уг яра. «Твиттер» выллем: одӥг вакчи веранэ мур малпан пыртоно. Кузь киноын оломар сярысь но зульыны луэ ук…

Сценарист но режиссёр огкылысь ужаны кулэ. Сотэк кино уг пӧрмы. Умой, адями ачиз ик малпа но, пуктэ но ке. Милям учырамы тазьы ужаз Чимали — ачиз ик малпаз, ачиз ик камерае пуктӥз, вандылӥз-лякылӥз. Ring («Питран») фильмез тросгес кельшысал этнофутуристъёслы но фестивальын пукисьёслы. Палган фильмъёссэ огшоры удмурт калыклы лэсьтэ. «Кин учке со фестиваль киноостэс? Нокин но», — шуэ Петыр.

Трос эчешонъёс вал ке но, фильммы кисьмаз ик. «Тымет» нимзэ Антти малпаз, угось со верамъя, тымет та киноын сыӵе ик валтӥсь ролез шудэ. Киномы Эстониын улӥсь егит пар сярысь: Юра (С. Наговицын) фермаын ужа, Лена (М. Самсонова) дораз мӧзмыса пуке. Нош одӥг пол егит кышномурт доры вуэ лампа тупатӥсь пиёк (В. Дмитриев)… Я, мар ай мон тӥледлы ваньзэ верасько. Асьтэос учкоды. Премьера сӥзьыл луоз, дыр. Соку ни валалом: пӧрмиз-а вакчи киномы, яке вакчиятэм кузь кино ик-а луэм.

Дарали Лели

Туспуктэмез авторлэн

Удмурт Дунне
By Удмурт Дунне Август 27, 2015 14:09
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<