Кутсконаз вуон. Крезьгур сярысь

Удмурт Дунне
By Удмурт Дунне 13 августа, 2015 16:59
R984Fm76NYY

Крезьгурез зэмос яратӥсь мурт гинэ кырӟанъёс утча, нош тросэзлы яра огшорыез, тодмоез, ачиз пеле пырисез крезьгур.

Крезьгур кылзӥськон амалъёсты воштӥз радио: 20-тӥ даурлэн 20-тӥ аръёсаз со вуиз асьме доры, Америкаез, Европаез ортчыса.

Азьло крезьгур кылзӥсь-кон понна адямилы одно ик кытчы ке мыноно вал, но али сыӵе кулэлык ышиз: радио тулкым ачиз вуттэ сое коркаосамы. Нырысь адямиос абдрало вал, приёмникысь куара кылыса, но умоезлы чаляк дышоно. Али крезьгур котьку но котырамы берга (мынам солэсь куддыр пегӟеме но потэ).

Крезьгурлэн пуштросэз но юн воштӥськиз: азьло со улонлэн оглюкетэз вал (обрядъёслэн, юмшанъёслэн инъетсы), али — адямиез котыртӥсь фон. Нош куддыръя кыӵе ке кырӟан улонэз воштэ.
Озьы уг луы шат? 1960-тӥ аръёсы Совето Союзэз шобыртӥз выль тулкым — радио пыр вуиз рок-крезьгур. Огпол, выжыкылын кадь, Андрей Макаревич радио пыр кылэ «The Beatles» группалэсь кырӟанзэ. Со дырысен Макаревичлэн улоназ каръяське рок.

Ачим мон кельшымон кырӟанъёсты шедьтӥ ини вотэсысь 2005-тӥ арын, куке Интернет вуиз школаямы. Со вал «Arctic Monkeys» — Англиысь инди-рок группа, со вакытэ туж ик тодмо ӧй на вал. Озьы мон кутски гитараен шудыны, собере эшъёсыным ӵош кылдытӥм «Amiso Wott» кок-рок группа.

Крезьгурын кузёяськись котькудӥз тулкым мар ке вылезлы улон сётэ. 1970-тӥ аръёсы глэм-, арт-, хард-роклы луыса музыкаын ортчиз панк-революция («Sex Pistols»), 1980-тӥ аръёсы кӧттырмостэм металл музыкаез воштӥз гранж («Nirvana»), нош 1990-тӥ аръёсы Англиын сяськаяськиз брит-поп («Radiohead»). 21-тӥ дауре выль кылдэм ӧръёс сурасько ог-огенызы. Кылсярысь, «Gorillaz» группалэн крезьгурезлэн стилез — этно-фанки-брейк-битс. Таин ӵош вӧлмо хипстер-культура но инди-рок. Россиысь та ӧрысь тросэз группаос андеграундын кылемын: «Pompeya», «On-The-Go», «Poko Cox». Та ӧре ик пыро тодмо удмурт группаос: «Silent Woo Goore», «IB&4CP».

Крезьгурез зэмос яратӥсь мурт гинэ кырӟанъёс утча, нош тросэзлы яра огшорыез, тодмоез, ачиз пеле пырисез крезьгур. Туала дыре ваньмыз чаляк вужме, соин ик мон вашкалаез борды кыстӥськисько. Утчай но шедьтӥ Уддядиысь но Пероггуртысь пересьёслэсь удмурт кырӟанъёссэс, кудъёсыз пушкез бугырто, Интернет но радио пыр уг чузъясько. Таӵе кырӟанъёслы луыса но удмурт луэмме шӧдыса, мон кошкисько вашкала крезьгуро дуннее. Татысь ик вуизы киям крезь, кубыз.

Кулэ ук вал оломае но тодыны-кылзыны кутсконаз вуон понна!

Чудья Жени

Удмурт Дунне
By Удмурт Дунне 13 августа, 2015 16:59
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<