Ижын — куиськон арня

Удмурт Дунне
By Удмурт Дунне 12 августа, 2015 16:07

17-тӥ-23-тӥ гудырикошконэ Удмуртиын ортчоз туала куиськонъя «Кросна» калыккуспо фестиваль.

Фестивалез радъясьёс — Москваысь Калык творчествоя кун юрт но Ижысь киужъёсъя центр. Калыккуспо ужрадэз ортчытыны коньдон висъяське Россиысь Культурая но Удмуртиысь Культурая но туризмъя министерствоос пыр. Фестивальлэн валтӥсь ужпумез — туала улонын калык киужез утён, куиськонэз азинтон но дуннеысь усточиосын эшлыко кусыпъёс тупатон.

Удмуртиысь киужъёсъя центрлэн кивалтӥсезлэн воштӥсез Ольга Пислегова верамъя, таӵе ужрад нырысьсэ шаерамы уг ортчы ни.

— Куиськон асьме дорын туж зол вӧлмемын, вашкала дырысен удмурт калык киужлы усто вал. Туала вакытэ но асьмелэн куиськисьёсмы золэсь. Соин ик таӵе фестиваль шаерамы радъяське. Нырысьсэ со ортчиз кык ар талэсь азьло. Соку Удмуртие вуылӥзы быдэс Россиысь кибашлыос. Нош туэ фестиваль калыккуспо луоз, возьмаськом кунгож сьӧрысь куиськисьёсты но, кылсярысь, Эстониысь, Белоруссиысь, Германиысь но мукет кунъёсысь. Фестивале пыриськозы шаерысьтымы вань киужъёсъя юртъёсысь куиськисьёс — 25 мурт. Эшшо сомында ик вуозы Россиысь но кунгож сьӧрысь кибашлыос. Ужрад усьтӥськоз Ижысь киужъёсъя центрын «Ӵушкон — улон кузьда сюрес» адӟытонэн. Нош ӵуказеяз ини, 19-тӥ гудырикошконэ, кибашлыос мынозы Ува санаторие. Отын ужзэ мытоз творчествоя лаборатория. Со ужалоз куать ӧръя: костюм кылдытон, вуриськон, кык пумо куиськон, керттӥськон, пужъятӥськон но чильпаськон, — шуэ Ольга Пислегова.

SdTris8TD9s

Пӧртэм выжыысь калыкъёслэн улоназы кышет бадӟым инты басьтэ. Удмурт костюмез но учконо ке, тросаз кылъёсын «кышетэз» вань: шаль-кышет, азькышет, сюлык кышет, урдэс кышет но мукет.

Малы лаборатория одно ик «Плат. Покров. Кышет» нимаське? Малы ке шуоно пӧртэм выжыысь калыкъёслэн улоназы кышет бадӟым инты басьтэ. Удмурт костюмез но учконо ке, тросаз кылъёсын «кышетэз» вань: шаль-кышет, азькышет, сюлык кышет, урдэс кышет но мукет. Лабораторилэн ужаз пыриськозы тодмо куиськисьёс, дизайнеръёс, тодосчиос. Ортчылозы пӧртэм мастер-классъёс, адӟытонъёс, презентациос. Фестивале вуозы Россиысь но Белоруссиысь культура удысысь специалистъёс. Кылсярысь, Юлия Иванова (Москваысь Калык творчествоя кун юртысь искусствоведениея кандидат), Татьяна Ваян (Петрозаводскысь Славян калыккуспо институтысь дизайнъя кафедраысь доцент), Александр Гораздин (Москваысь Киуж искусствоосъя ассоциацилэн кивалтӥсез), Наталья Калашникова (Санкт-Петербургысь Россиысь этнографияя музейысь валтӥсь специалист, культуролог), Ольга Лобачевская (Минскысь Культурая но искусствоосъя Белорус кун университетысь этнографияя но фольклоръя кафедраысь доцент) но мукетъёс.

 

Галина Семёнова

Туспуктӥз Ирина Зангарик

Удмурт Дунне
By Удмурт Дунне 12 августа, 2015 16:07
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<