Балезиноысь урмемъёс, Можгаысь лобасьёс но Глазовысь батыръёс. Нош мар возьма мукет ёросъёсын?

Удмурт Дунне
By Удмурт Дунне Август 31, 2015 14:48
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Можга

Ваньзэс вормим!

Можга авиаклубысь пиос но нылъёс пыриськизы Россиысь парапланэн лобанъя ӵошатсконъёсы. Пятигорскысь уно медальёсын берытскизы.

Пиос пӧлын нырысетӥ инты басьтӥз Константин Кудряшов, азвесь медаль утӥз Данил Лебедев, туйзэ — Александр Петров. Можга командаысь нылъёс но нокинлы ӧз сётске. Зарни медален бертӥз Анастасия Жильцова, азвесен — Елена Федотова, нош туй медаль басьтӥз Анастасия Куликова. Вераны кулэ, Россиысь командаос пӧлын Удмуртия 14-тӥ арзэ ни ваньзэс азьпалтэ.

Балезино

Урмемъёс йыло

Балезино ёросысь Юнда муниципал кылдытэтын ялэмын бешенствоя карантин. Али отын уг яра пудо-животъёсын вуз карыны, соосты палэнэ поттаны, Юнда нюлэсъёсын пӧйшураны.

Балезино ёросысь урмемъёсын герӟаськем учыръёслэн лыдзы будэ. Алигес Кӧльыёмувыр гуртын енот пуны шаянтӥз, Бадӟымшурын — ӟичы. Гуртъёсысь куртчылэм пудо-животъёс быдтэмын.

Пичи Пурга

Дунне котырес, сюрес кышкыт

15-тӥ гудырикошконэ гуртысьтызы кошкизы 15 но 16 аресъем нылашъёс. Огез — Агрызысь, мукетыз — Пичи Пургалась. Таос тодматскиллям Интернет пыр но малпаллям Москвае вуылыны, отысен — Екатеринбурге.

Дуннеез котыръясьёсты утчаз быдэс Россия. Сюризы нылъёс, арня ортчыса, Москва улосысь Иваново карысь. Отысь пияшен озьы ик Интернет пыр тодматскиллям, солэн квартираяз уло вылэм. Пичи Пургалась ныл азьвыл но гуртысьтыз пегам ни.

Кияса

Тужгес чеберез урам

Ёросын ялэмын вал «Тужгес чеберез урам» вожвылъяськон.

Муниципал кылдытэтъёсысь устооссэ гурт урамъёсты бырйыны капчи ӧй вал ке но, вормисьёс тодмо луизы: Первомайской черкогуртысь Рябиновой урам, Уддядиысь — Туганай, Выль Тӥгырменысь — Лесной ульча. Вожвылъяськонын эскериськиз урамлэн чылкытлыкез: отын медаз луэ лэсьтӥськон материалъёс, эстӥськон пу, кулэтэм арбериос, жуг-жаг.
Нош Юрмалай поселениын вожвылъяськон азьланьтӥське. Татын быръёзы тужгес чебер юртъерез, тужгес чебер сад, сяська будэтӥсьёсты но мукет. Вормисьёс пусъемын луозы дипломъёсын но коньдон премиен.

Ижкар

Чудьяосын тодматскон

2-тӥ куарусёнэ 19 часын Шор площадьысь шатёрын ортчоз «Чудья Promo» творчествоя группаен пумиськон ӝыт.

«Чудья Promo» творчествоя группаысь котькудӥз егит усточи паймымон. Ужрадэ вуэмъёс трос пӧртэм зарезьёсы выёзы. Женя Бикузинлэсь кубызэн шудэмзэ кылзозы, Лиля Леонтьеваен но Таня Тихоноваен быдэстэм удмурт кырӟанъёслэн тулкымъёссы вылын веттаськозы, Богдан Анфиногеновлэн кылбуръёсаз зымозы. Озьы ик, Марина Сергеевалэн юрттэменыз, дышетскозы тодмо удмурт блогер луыны! 12+

Дэбес

Дышетӥсьёслы ёрмон
24-тӥ августэ ортчем конференциязы дышетӥсьёс пусйизы: нылпиослы тодон-валан сётӥсьёс уг тырмо.

Ёросысь школаосы таяз дышетскон арлы 20 пала специалистъёс кулэ ке, туэ 3 мурт гинэ ужаны лыктӥз. Арлыдзы вуэм дышетӥсьёсты егитъёс воштыны уг дырто. Тани Дэбес шор ёзо школае ик кулэ физикаен но математикаен визьнодасьёс.

Глазов

Батыр — Павел Ульянов

Глазов ёросысь вашкала удмуртъёслэн улэм интыязы — Иднакарын — кужымзэс мертазы нылъёс но пиос.

Глазов ёросысь пиналъёс сяна, «Идна-батыр» вожвылъяськонэ пыриськизы Ижысь но Воткаысь нылпиос. Сэзь, лэчыт синмо луэмзэс возьматћзы. Кужымзэс мертазы корт манетэз молотэн шуккылонын — вашкала дыръя, пе, батыръёс сое огшуккеменызы паньгатъязы.

Та сяна, пиналъёс дышетскизы горд сюйлэсь арбериос лэсьтыны, куиськыны, вашкала удмурт шудонъёсын тодматскизы. «Тужгес кужмо батыр» нимын пусъемын Глазов палъёсысь пияш Павел Ульянов.

Ува

Трос пумо «Кросна»

Узей-Тукля гуртын ортчиз куиськонъя «Кросна» фестиваль. Быдэс Россиысь, озьы ик Белоруссиысь, Германиысь но Эстониысь 150 пала усточиос ува музъем вылын пумиськизы.

Фестиваль киужез яратӥсьёс понна туж пайдаё ортчиз. Асьсэ быгатонлыкъёссэс возьматэм сяна, соос киужын кутӥськись выль амалъёслы дышетскизы. Кин ке воксё мукет уж борды кутскиз — пужыятскиз, чильтэр лэсьтӥз, басма юдэсъёслэсь шобрет вуриз.

Фестиваль дыръя ортчиз конференция, отын усточиос вераськизы куиськонэз улӟытон но азинтон сярысь.

Кизнер

Кытын вордскид, отын ярад

Туэ ёросысь но гуртъёсысь школаосы нырысетӥ классэ мынозы 307 тэшкылиос. Кылем арен ӵошатыса, со 47 пиналлы тросгес.

Шумпотто егит дышетӥсьёс но. Школаосы но нылпи садъёсы лыктоз 11 егит специалист. Озьы Кизнер ёросын кылдӥзы историен, математикаен, информатикаен, суредаськонэн, мугорез кыдатон культураен но пичи классъёсты визьнодась пинал дышетӥсьёс. Ваньзы соос та ёросысь потэмъёс ик.

«УД»

Удмурт Дунне
By Удмурт Дунне Август 31, 2015 14:48
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<