Алнаш ёросысь Удмурт Ятцаз гурт

Удмурт Дунне
By Удмурт Дунне Август 27, 2015 15:12
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Егитъёс пуктӥськыны кутскизы

Удмуртъёс но ӟучъёс уло одӥг семья кадь

Алнаш ёросысь Удмурт Ятцаз гурт Байтэрек муниципал кылдытэтэ пыре. Со Менделеевске мынон сюрес вылын сылэ. Алнаш черкогуртлэсь ог 30 иськеме интыяськемын.

Ужаллям нимаз

Ятцаз гурт кыклы люкиське. Пырон дорын ӟучъёс, пе, уло, со Ӟуч Ятцаз шуиське. Нош шур сьӧрын удмуртъёс уло, соиз Удмурт Ятцаз. Туннэ нуналлы гуртын 114 улӥсез. Удмурт люкетаз 18 коркан 65 адями улэ, нош ӟучаз — 17 коркан 49 мурт. Колхозъёс ӟеч улон дыръя но соос нимаз улӥллям — удмуртъёслэн хозяйствозы «Мечта» нимаськем, нош ӟучъёслэн — «Авангард». Бӧрысь соосты огазеяллям но «Искра» кариллям.

Удмуртъёс доры шур сопала потыса, нырысетӥ корка ик пыроно кариськи. Отын уло вылэм Япаровъёс. Валентина Алексеевна Алнашын страховой агент луыса, пе, ужасько. Талэсь азьвыл со гуртысьтызы клубен кивалтэм. Кузпалыз ужбергатон удысэн, пе, выре, ас вакытаз Байтэрек муниципал кылдытэтэн кивалтэм. Гуртлэн улэм-вылэмез сярысь Валентина Алексеевна вера:

— Нэнэе вера вал, гуртамы, пе, вазен туж трос калык улэм. Тулыссэ бусые 80 валэн кизьыны пото вылэм. Секыт 1920-тӥ аръёсы пӧсь гужем куазен ӟучъёслэн юртъёссы ӝуаса быро вылэм ини. Ярано, йыразы лыктэм пересьёслэн верамзы — ӝуась юртъёс котыртӥ акашка кукеен но обросэн котырскиллям. Паймод, ява — тыл, пе, курдаса кадь, коркаос йылтӥ тэтчаса — кошкем. Юрттэк кылем ӟучъёс удмуртъёс доры улыны потӥллям. Нюлэс ми палан алама будэмен, дыр, лэсьтӥськыны моӵсы тырмымтэ ни, тросэз Сарапулэ, Иже, Перме но Пермь улосысь Берёзовка каргуртэ улыны кошкиллям.

Собере каллен-каллен лэсьтӥськыны кутскиллям, гурт берен пыд йылаз султэм. Гуртын кемалась водопроводзы но пожарной каланчазы вань. Урам кузя топольёс мерттэмын, дэри куазь дыръя ветлыны пулэсь тротуар лэсьтэмын. Ӟучъёс туж кырӟасесь, пе, вал. Эсьмаса, куараоссы сокем золэсь вылӥллям, кырӟамзы сьӧрлось гуртъёсы ик кылӥське вылэм.

Ӟучъёс палан тросэз Замятин но Тогбаев фамилиосты нулло. Нош удмуртъёс — Конниковъёс, Мукановъёс, Даниловъёс. Гуртын та вие самой арлыдоез Клавдия Тогбаева. Со 80-лэсь ортчемын ни.

Нянь пыжо асьсэос

Гуртысь 15 нылпиос тодон-валан басьто Байтэрек шор ёзо школаын. 4 иськеме соосты автобусэн нулло. Отчы ик тэшкылиоссы но нылпи садэ ветло. Соос 2 кузя. Колхоз куашкамен, тросэз воргоронъёс Татарстанысь Менделеевск но Елабуга городъёсы ужаны интыяськизы. Сюресэн курадӟонэз ӧвӧл.

Куке-соку ятцазъёслэн асьсэлэн покчи классъем школазы вылэм, сое Елабугаысь меценатъёс, Ушаков вынъёс, лэсьтӥллям вылэм. Туж тузӥ со, али ке но йыг-йыг сылэ. Одӥг липет улэ интыяськемын вылэм нылпи сад но медпункт. Али огез но уг ужа ни. Магазинзы но кемалась ӧвӧл. Аслаз верандаяз, пе, сиён-юонэн вуз каре гуртозы Светлана Колесникова.

— Толалтэ нянез но, колбасаез но тын-тын кынме, нош гужемзэ кампет но, вӧй но шунаса вияло, — верало нылкышноос. — Рос-прос магазинмы мед луоз вылэм. Эшшо медпунктмы мед ужасал. Соку сюрес вылтӥ курадӟыса ветлонэз ӧй луысал.

Гуртын шурзы но, тыметсы но вань. Но соослэн нимъёссы, пе, малы ке ӧвӧл. Нюлэс доры потанзы Заводкапказь нимаське ик. Вашкала дыръя отын завод вылэм. Вань на Поташсы. Таязын пень ву поттон завод ужам. Ятцазъёслэн асьсэлэн етӥнлэсь вӧй поттон корказы вылэм. Али солэн бервылыз сяна кылемын ӧвӧл ни.

— Гуртысьтымы тросэз воргоронъёс, лек оже кошкыса, бырыны шедемын, — вера Анатолий Конников. — Соосты тодамы вайыса, арлы быдэ 9-тӥ Май котырын буре ваён нунал ортчытӥськом. Палэнэ улыны кошкемъёсты ӧтьыса, «день деревни» лэсьтӥськом. Городысь артистъёс бон Байтэрек культура юртэ ӵем гинэ вуыло, соосты учкыны юри потаськом. Асьмелэн но клуб пормамы вань. Куке-соку со кулак корка вылэм. Собере клуб кариллям, со куен нылкышноос отчы шулдыръяськыны потало.

— Нянь асьмеос пыжиськом, — шуо нылкышноос. — Гурт кузя вузаськыса ветлӥсьёслэсь пызь, сакыр басьтӥськом. Соос милемыз утё-вордо ай. Нюлэскын таляк губи, эмезь будэ. Борымы туж трос луэ.

— Малпасько, гуртмылы бырыны ум сётэ, пиналъёс тани берло аръёссэ кыштыр гинэ пуктӥськыны кутскизы, — вера Валентина Япарова. — Ми но быгатэммыя улӥськом, вордскем гуртысьтымы нокытчы кошкыны ум малпаське. Мын ай тани городэ яке райцентре. Ӧйтӧд, кызьы отын адямиос уло. Доре бертӥськод но, сыӵе умой: ураме потӥськод, отӥ вӧл-вӧл поръяськод, чылкыт омырен шокаськод, гидэ пудоед доры вамыштӥськод, бакчаын будосъёсын кенешиськод. Кызьы гурт улонэз уд яраты? Табере улонмы городынлэсь чик пӧртэм ӧвӧл. 2010-тӥ арын гуртамы газ пыртӥзы, тросэзлэн корка пушказы ву гумыос кыскемын ини. Милемлы, нылкышноослы, чыл-кытатӥськон, сиён пӧран но киужен вырон гинэ кыле на. Азьло куйыысь ву ворттӥськом вал, гур эстыны пу пыртаськом. Табере улонмы воштӥськиз, воргоронъёсмы пу дасянлэсь мозмизы. Гуртамы тросэз семьяос муш вордо, пудолэсь куштӥськеммы уг поты на, скал, кунян, ветыл возиськомы. Бакчамес быдэссэ мерттӥськом, вашкалаосмы киын ужаллям ук, ми но ужлэсь ум кышкаське. Отысь барыш поттыны луэ. Ваньмызлэн сямен табере капка азязы техника сылэ.

Любовь Тихонова

Удмурт Дунне
By Удмурт Дунне Август 27, 2015 15:12
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<