Война вакытысь кырӟанъёс

Удмурт Дунне
By Удмурт Дунне 6 июля, 2015 13:26
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Люказ Кияса ёросысь Вуж Салья гуртысь
Алевтина Степанова

Такмакъёс

Тӥяськонтэм писэз-пуэз

Сильтӧл лыктӥз, погыртӥз.
Чик быронтэм, ой, калыкез
Германь война быдтылӥз.

Гожтэт гожъяса пукыкум,
Лампа тылы кысылӥз.
Милям куанон вакытамы
Герман война ӝутӥськиз.

Ой, ёзо вал, ёзо вал
Ёзо гинэ калыке.
Куд ёзэтӥз чигиз меда,
Германь бомба пуштыку.

Ӵуж уӵылэн чирдэмъёсыз
Суто пинал сюлэмез,
Та арлэн секытъёсыз
Люко ёзлэсь — калыклэсь.

Горд кышетэз  мон басьтэм вал,
Горд кышет вуэ бездӥз.
Чебер пиез яратэм вал,
Сьӧд, каргам война быдтӥз.

Из гурезь мон азе куашказ,
Пыдме куажырак тӥяз.
Куинь сэрего кесэг кагаз
Азьлань улонме сайяз.

Писпуэз куазь ӵашйылыку,
Усьылӥз, дыр, куажырак.
Каргам пуля сутылыку,
Кызьы меда погырад?

Ой, арама, арама,
Мар куасьмонтэм арама.
Ой, эшъёсы, эшъёсы но,
Мар вунонтэм эшъёсы. 

Мар бон каром?

Кырӟало вал «Ой, мороз, мороз» кырӟанъя

Кезьыт ошмесэн
мон мар бон каром?
Юэм потыкум,
со ӧй вал бере.

Ческыт сиёнэн
мон мар бон каром?
Сием потыкум,
со ӧй вал бере.

Шуныт пыдвылэн
мон мар бон каром?
Пыды кынмыку,
со ӧй вал бере.

Чебер дӥськутэн
мон мар бон каром?
Нуллэм потыкум,
со ӧй вал бере.

Пинял пиосын
мон мар бон каром?
Улэм потыкум,
со ӧй вал бере.

 

Удмурт Дунне
By Удмурт Дунне 6 июля, 2015 13:26