Вавожын ортчоз бардъёслэн фестивальзы

Удмурт Дунне
By Удмурт Дунне 15 июля, 2015 08:07

БезымянныйУй но нунал гитараен

25-тӥ-26-тӥ пӧсьтолэзе шаерысьтымы суредаськисьёслэн но кырӟан гожъясьёслэн Гришинской фестивальзы ортчоз. Искусствоез данъясьёс люкаськозы Вавожысь Ува шур дуре.

Туэ фестиваль 16-зэ ортче ни, сӥземын со В. Высоцкийлэн кулэм дырысеныз 35 ар тырмонлы но Удмуртиысь дано суредаськисьлэн, Вавожын вордскем Г. Чайниковлэн вордӥськемез дырысен 55 ар тырмонлы. Озьыен, туэ фестиваль искусстволэсь 2 удыссэ лыдэ басьтэ: суредаськонэз но бард амалэн кырӟанэз.

Удмуртиысь авторъёслэсь кырӟанъёссэс кылзыса, мылкыд карисьёс бусыысь вамыштозы «Авангард» ёрос газетлэн редакцияз, отын усьтӥськоз Удмуртиысь суредаськисьёслэн ужъёсынызы адӟытон. Озьы ик татысь нимысьтыз адӟыны луоз Вавожын вордскем суредаськисьлэсь Сергей Макаровлэсь «Вавожлэн буёлъёсыз» адӟытонэ.

— Кылем арын та фестивальын асьсэ кырӟанъёссэс быдэстӥзы 40 бардъёс, — вера ужрадэз радъясь Григорий Лебедев. — Али дырлы ми басьтӥм ни 20 куриськон, соос пӧлын выль нимъёс но вань. Шумпотымон, туэ ми доры лыктыны кылзэ сётӥз Алнашысь тодмо крезьгурчи Сергей Кириллов.

Азьвыл аръёсы фестивальын крезьгурчиос куспын вожвылъяськон ӧз ортчылы. Туэ ужрадэ выль шӧм пыртыны малпамын. Озьы кырӟанъёссэс быдэстӥсьёс туэ трос номинациосъя дунъямын луозы: тужгес устоез бард, устоез крезьгурчи, кырӟанзэ аспӧртэмлыко быдэстӥсь, учкисьёслэсь но жюриослэсь кузьым. Егитъёсызгес, кин та фестивале нырысьсэ вуэ, нимаз кузьымен пусъемын луозы.

Фестивале быдэс шаерысь куноос лыкто.

— Кылем арын Вавожысь Ува шур дуре 5 сюрслэсь ятыр адями люкаськиз, -шумпотэмзэс уг вато радъясьёс. — Инты ваньзылы тырме. Ческыт шуыса калык сие милесьтым ӝукмес. 2 пуртыен гинэ уг тырмы. Уйлы кыльыны мылкыд карисьёс сьӧразы палаткаоссэс кутыны быгато, нош ву но пу ми асьмеос сётом.

Гришин фестиваль уй но нунал мыноз. 25 пӧсьтолэзе 14 часын кутскоз бардъёс куспын вожвылъяськон, со дыре ик мынозы мунёоос но манетъёс лэсьтонъя мастер-классъёс но ёрос «Авангард» газетлэн редакцияз суредъёсын адӟытон. 20 часысен кутскоз гала-концерт, кытын асьсэ кырӟанъёссэс быдэстозы Удмуртиысь тужгес но тодмо бардъёс. Быдэс уй куноос пукозы тылскем дурын, тодматскозы ог-огенызы но гитара улсын дэмен кырӟалозы.

«УД»

Удмурт Дунне
By Удмурт Дунне 15 июля, 2015 08:07
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<