Тодосчилы Альберт Алексеевич Разинлы — 75

Удмурт Дунне
By Удмурт Дунне Июль 16, 2015 08:49
SONY DSC

А.А. Разин

12-тӥ июле 75 арес тырмиз Удмуртиысь наука удысысь дано ужасьлы, социологлы, философия наукаосъя кандидатлы, зэмос удмурт воргоронлы Альберт Разинлы. Альберт Алексеевичен котькуд пумиськон тунсыко вераськонлы пӧрме.

— Альберт Алексеевич, 75 арес со ӧжыт ӧвӧл, о-о?

— Мыным со чик но трос уг поты. Мылкыдыя мон егит на. Ижысь медакадемиысь профессорлы Владимир Савельевлы, кудӥз тазалыкез утёнъя министр луыса 15 ар ужаз, 17-тӥ июле тырмоз 80 арес. Али но туж йӧно, таза, визьмыз сазь. Яке тани история наукаосъя доктор Карл Пономарёв, солы 84 арес тырмиз ини. Та адямиос шоры учкисько но, мынам но улэме-ужаме, книгаос гожъяме потэ ай. Собере внукъёсты возьмано на. Но… мон кулонлы дасяськемын кемалась, солэсь уг курдаськы. Философъёс сямен ик: кулонлэсь уг курда крестьянэд, куректэ философие тубымтэ интеллигенция. Философъёслэсь кулон но улон сярысь ужъёссэс лыдӟылӥ, таӵе малпанэ вуи: крестьянлэсь вылӥегес нокин но тубемын ӧвӧл. Озьы ик шуэ тодмо тодосчи К. Ушинский. Одно ик лыдӟы солэсь «Родное слово» ужзэ, одно ик. Л. Толстой но К. Ушинский артэ сыло. Соос туж зол философъёс. Асьмеос дунъяськом адямиез пуконэзъя, данъетэзъя, узырлыкезъя. Крестьянэд мукет дуннеын улэ, со дан уг утча, улэ, мурт синмысь усьытэк, муртлэн шумпотонэзлы шумпотыса.

А. Энгельгардт академик шуэмъя, адями музъем бордысь палэнске ке, сӧриське. Гуртысь городэ вуэм муртэ цивилизация ӵем дыръя тӥя, со ыштэ калык визез, уг ни вала эсэпез. Кин со философ? Университетъёсын вань философияя кафедраос. Нош вань-а ужасьёссы пӧлын философъёс, мон уг тодӥськы. Соос — философилы дышетӥсьёс, нош зэмос философ улытозяз ассэ адямилыко карыны тырше.

— Ужам стажды 45 ар люкаськем, тӥ весь преподаватель вал-а?

— Мон ужме трос пол вошъяй, со понна туж шумпотӥсько. Совето власть дыръя пырак одӥг ужын тыршисез данъязы. Нош мынам трудовой книжкаям, инты тырмымтэен, вкладыш понэмын. Мынам пӧртэм удысъёсыз эскереме потӥз. Бен, валтӥсь интыын вал дышетон уже, тырши Ижысь механикая институтын, сельхозинститутын. 2-тӥ классысен кутскыса, котькуд каникулам весь колхозын ужай: валэн оломае но ворттӥ, турын воз тыри, кабан сюри, нюлэс корай — со ваньмыз профессия ук. Телевидениын дикторын ужай, нимысьтыз конкурсэз ортчыса, сюри отчы, чебер шуыса кутӥзы, дыр. 3 пол вал армиын. 2 пол басьязы спецсборъёсы, быдэн ӝыны арлы Тюмене но Оренбурге целинаосы вуылӥ. Ротаын 200 солдат, соосын кивалтӥ, ваньзэс кырмыса вози, зэм, кытӥяз куараме бадӟым карытэк но ӧйлась. Монэ гажазы, малы ке шуоно вина ӧй юы, кышноосын ӧй калгы, жоб кылъёсын ӧй вераськы, нокинэ ӧй ултӥя, вӧсь ӧй кары. Эшшо мон ужай газетын. «Советской Удмуртиын» тыршем аръёс монэ кыдатӥзы, дӥсьтӥсь каризы. Газет — туж бадӟым школа. Москваын, Социологияя институтлэн аспирантураяз, дышетскыкум, почтальонын, возьмаськисьын ужай. Грузчик вал «Красный Октябрь» кондитер фабрикаын. Кыӵе канфет потто вал, ваньзэ сии. Отын ужан нуналмы 12 час вал, сакыр мешок 50 кило кыске, пушмульы — 70. Ог нуналэ 3 вагонэз бушатъямы — 180 тонна. Ӵош ужась воргоронъёс, провор ужамме адӟыса, шуылӥзы: «Бросай аспирантуру, ты врождённый грузчик». Шонерзэ вераса, туж шумпотылӥ, зэмос воргорон ужез быдэсъяй шуыса.
Берло 33 арзэ тырши Удмурт кун университетын, Адямилыкез эскеронъя институтэз кылдытӥ, кивалтӥ соин. Соку конференциос ортчытъяса, арнялы быдэ семинаръёс люкаса, ачим но трос тодон-валан люкай. Со сяна, удмуртлыкез утён-ӝутон бордын ужай, «Дэменэн» кивалтӥ, нимзэ но мон сётӥ, «Удмурт вӧсь» огазеяськонэз кылдытӥ. Данъяськыны быгатӥсько: 1991-тӥ арын, нырысетӥ удмурт съездэз радъякум, «Удмурт Кенешлэсь» уставзэ дасяй. Шумпотӥсько: Гербер праздникез радъяй, нимзэ но ачим сётӥ, концепциез но аслам.

— Али кытын ужаськоды?

— Та вакытэ Тодосчиослэн юртазы тыршисько. Тазалыкез эмъюмъёстэк юнматонэз вӧлмытонлы сӥзем «Тазалык» центр кылдытӥ. Эмъюм дуно, собере, таблеткаед огзэ ёзвиез йӧнатэ, мукетсэ сӧре. Огпол Якшур-Бӧдья ёросын больницазылэн валтӥсь враченыз пумиськимы. Александр Батуринлы шуисько, адямилэсь иммунитетсэ ӝутоно, нош эмъюм сое лябӟытэ. Тӥ тазалыкез уд юнматӥське, висёнэн выриськоды. Кӧня ке вераськеммы бере Александр Брониславович монэ больницаязы лекция лыдӟыны ӧтиз, врачъёс асьсэос пациентъёслэсь ӵемгес висё, пе. Мар сярысь лекция лыдӟисько? Уноез тазалык потэ шонер сиськон бордысь, тодыны кулэ, мае уггес яра сиыны. Урод мылкыдэз вормоно, депрессие сюрыны уг яра, астэ йыр-йыса улыны кулэ ӧвӧл, таблеткаос интые эмъюм турынъёс юоно, мугорез кыдатоно. Туж бадӟым изъян вае телевизоретӥ эмъюмъёсты рекламировать карон но.

— Альберт Алексеевич, тӥ азьло телевизор уд учкиське вал.

— Семьяе куриз но, телевизор басьтӥ. Лумбыт ужаса, жадисько но телевизормес лэзисько. Но валасько: адӟыны туж ик немае. Телепрограммаос ужась муртэ уг данъяло, покчиосмес ужаны уг косо, передачаосын валтӥсь интыын — узырлык, чебер улон. Мае учкисько? Одно ик иворъёсыз, политикалы сӥзем котырес ӝӧкъёсыз. Спортэз яратӥсько. Футболэз учкисько, нош кыӵе чебер капчи атлетика, куасэн нискылан! Олимпиадаез но быдэссэ учки. Адӟисько социолог, философ синмын. Кырыж ыбылыкузы, биатлонистъёсмес жалясько. Соосын психологъёслы ужаны кулэ вылэм. Шонер ыбылон тренировка бордысь гинэ уг поты, кулэ на крестьянлэн выллем гань-гань мылкыд.

— Тӥ даслэсь уно книгаослэн авторзы, та вакытэ мар бордын ужаськоды?

— Алнаш ёросысь вордӥськем Кузьымгуртэлы (300 арлэсь бадӟым ни со) сӥзем книга дасясько. Мон сое кема гожъясько ини. Секыт вылэм ас гуртэд сярысь гожтыны, ачим шоры палэнысен учкисько угось. Критик шуоз: созэ гожтымтэ, тазэ пыртымтэ. Ваньзэ книгае пыртыны уг быгаты.

— Мар сярысь жаляськоды?

— Жалясько тросэз пумысен. Оскалтэме потэ вал на ужаса школа директорын, колхоз предын, следовательын. Жаль, улон укыр вакчи. Мар сётэмын вал инкуазен, ваньзэ быдэстыны ӧй быгаты. Шундыпуксён палась цивилизация улытозям пӧртэм амалэн пыӵатыны выриз: «Ты никто и ничто». Та ярантэм цивилизацимы гань-гань шоканы, мылкыдме ӝутыны, быгатонме усьтыны, ӧръяны ӧз сёты. Мон мурт дуннеын улӥсько, Ижкар ноку мынам сюлмам ӧз лякиськылы, ноку родной ӧй вал.
Туж жалясько атаелэсь агайёссэ, куинь Разин воргоронъёсты, Колчаклэн гыжкалъёсыз 1919-тӥ арын судтэк-мартэк ыбылӥзы. Соос Россиысь удмуртъёслэн 1918-тӥ арын Елабугаын ортчем ӧтчамазы делегатъёс вылӥллям. Милям лул-кужыммы юн, но Разинъёс ӧжыт кылемын. Туж жалясько, Рево вынылэн Роман пиез но мынам Миша пие кулӥзы шуыса. Роман туж усто суредаське вал. Мынам пие, Миша, 4 арес дыръяз саркомаен кулӥз. Анайме нуналлы быдэ тодам вайисько, вӧталлясько но. Вал ведь сыӵе зарни адями: ужась, чидась, кырӟась, котькинлы ӟеч лэсьтӥсь, визьмо, йӧно — огкылын вераса, Дунне адями.

— Мынам арлыдэ — мынам узырлыке, шуиськоды тӥ, малы шумпотӥськоды?

— Шумпотӥсько, Л. Толстоез дунъянэ вуэмысьтым. Та быдӟым писатель шуиз: «Непротивление злу насилием». Тон кужмысь мае ке быдтыны турттӥд ке, номыр умоез уз луы. Вань философской фильм — «Убить дракона». Валтӥсь герой сьӧсез быдтыны выре, курадӟе, берат быдтэ ик. Но пумен ачиз драконлы пӧрме. Кызьы озьы? Ма, изьверлэн катэзъя улыны кутскем но сӧриськемзэ шӧдытэк кылем, воксё вунэтэм аслэсьтыз ӟеч лэсьтыны вордӥськемез сярысь. Адямиез виылыса, улонэз уд тупаты. Удмуртъёс тае умой валаллям. Соос сӧриськем адямиосыз но, шайтанъёсыз но уг виыло. Тодады вае ай «Шайтан уллян» йылолэз. Вашкалаосмы урод кужымез гурт сьӧры улляло но шумпотыса, гань-гань уло. Шумпотӥсько «адямилык» кылэз улонэ пыӵатэмелы, «Человековедение…» нимо книга гожтэмелы, таӵеез Россиын ӧвӧл на, нош Западлы адями но духовность воксё кулэ ӧвӧл. Шумпотӥсько, мае но сое валаны кутски шуыса. Кылсярысь, улонын шулдырез гинэ уг луы, куректонтэк нокин уг улы. Озьыен, улонысь шумпотонэз, маке умойзэ нуналлы быдэ утчано — тае наука но искусство шуыны кулэ. Философиен выронъям ачим понна пичи гинэ открытие лэсьтӥ: И. Кант но Ф. Гегель философъёслэн веранзы вань шонер малпаськыны быгатон (рассудок) но визь-пуштрос (разум) сярысь. Мон тае валай но аслым куинь «ӝажы» кылдытӥ. Кинэн ке пумиськыкум, валасько, кыӵегес мурт мон азьын. Адямиос тодон-валанзыя но йырзэс ужатэмзыя луо 3 турлыесь: капчи визьемъёс, тодосчиос но визьмочиос. Эскерон ортчытэмын ӧвӧл ке но, адӟиське: капчи визьемъёс ӧжыт ӧвӧл. Соос уллёысь пудо выллемесь, та понна валтӥсь интыын кӧт тырон, уг ярато малпаськыны. Вылӥынгес дышетскемъёслэн ӝажызы, татчы пыро тодосчиос но. Асьме цивилизациын дышетскем адямиосыз данъяло, но вунэтоно вылымтэ калыкын «трос тодэ, но ӧжыт вала» шуонэз. Нош визьмочи (Дунне адями, философ, мудрец) тодэ но, вала но. Та ӝажые тубемын куд-огез дышетскем адямиос, куд-огез тодосчиос но уноез крестьянъёс. Но соос, мынам малпамея, трос уг люкасько. Маин висъясько тодосчи но визьмочи? Нырысетӥез ассэ олокин кожа, ассэ возьматыны выре, дан поттэ. Визьмочи сыӵе ӧвӧл, со понна валтӥсь интыын визь люкан но зэмлыкез (истинаез) утчан, ассэ адямилыко карон. Асме визьмочи шуыны уг быгатӥськы, мон улытозям та ӝажые ӝабыртӥськыны вырисько. Солы но шумпотӥсько.

Галина СЕМЁНОВА

Туспуктӥз Владимир Беломорских

Удмурт Дунне
By Удмурт Дунне Июль 16, 2015 08:49
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<