«Сайкыт инбам» фестивальлы ортчыны зор ӧз люкеты

Удмурт Дунне
By Удмурт Дунне 16 июля, 2015 10:29

4-тӥ июле секыт пилемъёс инбамез возъязы, озьы соос Егитъёслэн нуналзылы сӥзем «Сайкыт инбам» фестивалез куспетӥ карыны выризы кадь. Но малпам ужзэс алнашъёс ваньзэ радызъя быдэстӥзы.

Ӵукна Алнаш шур вӧзысь шулдыр интыын ёросысь егитъёслэн нырысетӥ турслётсы ортчиз. Ваньмыз-ӧвӧлэз 15 команда люкаськиз. Вуизы Можга ёросысь но егитъёс. Палаткаос пуктыса, тылскизы но, командаосысь пӧраськисьёс уж борды басьтӥськизы: пуртыосын ӝук пӧзьтӥзы, чай быректӥзы, сӥль ӵынатӥзы, кыстыбей дасязы. Нош эшъёссы бызёно сюресэнызы тодматскизы.

Команда Палэп 1 место на турслете

«Палэп» эштосысь команда турслётын нырысетӥ инты басьтӥз.

Командаос бӧрсьысь бӧрсе стартэ потӥзы. Пус чӧлтэмъя сюрес лёгись луизы Сям-Какси гуртысь егитъёс. Ортчоно вал 13 этап: будосъёсты тодмано, географияя пусъёсты валэктоно, вӧсь луэм муртлы нырысетӥ юрттэт сётоно, гозы кузя гурезе тубоно-васьконо, коръёс вылтӥ ортчоно, шур вамен потоно, одӥг писпуысь мукет писпуэ гозы кузя выжоно, нюк вамен тэтчано, тылпу кысоно…

Секыт вал ке но, нылъёс-пиос, ог-огзылы юрттӥськыса, сюрессэс пумозяз ортчизы. Но янгышъёстэк бызисьёс ӧй вал, ваньзэ лыдъязы-чаклазы дунъясьёс, котькуд янгыш понна 10 секунд штраф ватсазы.
Этапъёсты котькинлэсь шаплы ортчиз «Палэп» эштосысь команда. 2-тӥ луиз Алнашысь егитъёслэн «Вместе» огазеяськонзы. 3-тӥ интые потӥзы ёросысь культура удысын ужасьёс.

Турслёт йылпумъяськыса ӧз вуы, мото куараос кылӥськизы. Вожвылъяськизы квадроциклэн но мотоен ворттылӥсьёс. Таиз но ӵошатскон ёросамы нырысьсэ радъямын вал. Юри дасям сюрес вылэ огдыре 5 мото потӥз. Тузон пурӟе, нош спортсменъёс сое уг ик шӧдо кадь, азьпала лобато.

си

Квадроциклэн ворттылӥсьёс ёросамы ӧжыт на, шӧдске, соин ик ӵошатсконэ лыктэмын вал Ижысь, Нижнекамскысь но Набережные Челныысь 4 спортсменъёс.

Таӵе ӵошатскон люкаськем калыклы кемалы вунонтэм кылёз. Квадроциклэн ворттылӥсьёс ёросамы ӧжыт на, шӧдске, соин ик ӵошатсконэ лыктэмын вал Ижысь, Нижнекамскысь но Набережные Челныысь 4 спортсменъёс. Соос турслётлы выль тулкым пыӵатӥзы кадь, азьланяз экстрим амалъя ӵошатсконъёсты Алнашын арлы быдэ ортчытыны мылкыд кылдӥз.

Егитъёс чидатэк витизы ӝытэз — «Элькуновидение. Егитъёс-2015» вожвылъяськонэз. Сое радъяз но ортчытӥз «Мынам Удмуртие» телерадиокомпания. Ужрадэ пыриськизы 14-18 аресъем 7 нылъёс но одӥг пияш. Дорамы вуылӥзы Грак, Можга, Шаркан, Якшур-Бӧдья, Сарапул, Пичи Пурга ёросъёсысь егит кырӟасьёс. Алнаш черкогуртысь 2 нылъёс пыриськизы: Анастасия Русских но Олеся Киршина. Жюри 5 усто кырӟасьёсты бырйизю Соос понна ик куаразэс сётыны быгатозы телевизор пыр учкисьёс. Жаляса верано, алнаш нылъёсмы финалэ ӧз шеде. Котькинлэсь трос куара люказ Пичи Пурга ёросысь Алёна Зянкулова. Егит кырӟасьёс сяна, калыклы капчи мылкыд кузьмазы удмурт эстрадаысь тодмо артистъёс.

си1

Калык трос люкаськиз.

 

Люкаськемъёсты Егитъёслэн нуналэнызы ӟечкыланы вуылӥзы Удмуртиысь мугорез кыдатон культурая, спортъя но егитъёсын ужан политикая министр Игорь Краснов но Алнаш ёросысь кивалтӥсьёс. Котькыӵе ужрадэ мыло-кыдо пыриськись егитъёслы таукаронъёс сётӥзы, нош аспал эшмылы, паралимпиецлы Владислав Лекомцевлы, гадь вылаз бырттӥзы «Патриот России» медаль. Удмурт егитъёслэн «Сайкыт инбам» фестивальзы чебер фейерверкен йылпумъяськиз.

Людмила Сурчакова

Туспуктэмъёс: Людмила Сурчакова, vk.com

Удмурт Дунне
By Удмурт Дунне 16 июля, 2015 10:29