Наштаськем ымныр, корт Щелкунчик но лобась кый

Егитъёслэн нуналзы туэ Ижын 5 нунал кыстӥськиз. Пӧртэм интыосын ортчизы концертъёс, спорт шудонъёс но фестивальёс.

Инстаграмысь туспуктэмъёсты учкыса, малпалод, ӝыны Ижкар холи буёлъёсын пазяськыны ветлэм: вотэсын яркыт буёлъёсын наштаськем ымныръёс — селфиос — лачак луизы. «Динамо» стадионын ортчем «Ижхоли» ужрадэ сюрслэсь ятыр адями люкаськиз. Холи буёлъёсын пазяськон вуэмын Индиысь, отын тазьы тулысэз пумитало. Шаерамы та ужрад 2 ар куспын тужгес но яратоноез луиз.

Туспуктэм: vk.com/izhholi

Indie Love крезьгуро концерт йылпумъяз «Егитъёслэн нуналзы» фестивалез. Эшъяськон монумент вӧзын Ижысь группаос но кырӟасьёс калыкез асьсэ творчествоенызы тодматӥзы. Концерт 10 час ӵоже мынӥз — Ижысь сомында кырӟасьёс люкаськизы. Учкисьёслы мӧзмыны ӧз кылды. Угось гань-гань крезьгуро The Flying Foxes группаез воштӥз задор инди-рок быдэсъясь Silent Woo Goore, Мускоысь рок быдэсъясь Alterday но мукет кырӟасьёс. Котькудӥз соос пӧлысь аспӧртэмлыко. Нош ку но кытын дунтэк кылзӥськыны кылдысал на Екатеринбургысь «АлоеВера» но «Обе две» группаосты? Тау, Indie Love!

Иж тымет дурын крезьгуръёс но эктонъёс улсын огез бӧрсьы мукетыз тӧдьы басма улысь потазы пианино, Щелкунчик, шыръёслэн корользы… Ferrum Festын лэсьтэм вань скульптураос туэ П. Чайковскийлэн юбилеезлы сӥземын вал. Кортлэсь дурем скульптураосъя фестиваль Ижын кыкетӥзэ радъяськиз ни. Кылем арлэн емышъёсыз Иж тымет дурын интыяськемын. Туэ кортэн вырисьёс нош ик шумпоттӥзы выль ужъёсынызы. Иж тымет ярдуртӥ поръякуды, выль скульптураосын тодматскыны быгатоды.

Шулдыръяськем сяна, егитъёс та нуналъёсы быгатӥзы спортэн вырыны, шонер сиськон сярысь тодыны но нылпиосын ӵош инме 100 лобась кыйёсты лэзьыны.

Dart