Мылкыд куре удмуртсэ. Малы Санкт-Петербургысь Максим Кузнецов удмурт кылэз дышетӥз?

Удмурт Дунне
By Удмурт Дунне 14 июля, 2015 08:15

Кылем арняе дорамы газетлы пыриз Санкт-Петербургын улӥсь Максим Кузнецов. Номыр аспӧртэмлыкоез ӧвӧл кадь: асьмелэнъёс котькытын уло. Но… Максимлэн выжыяз удмуртъёс ӧвӧл.

Максим юанъёсылы вольыт удмурт кылын валэктэ, уд но малпа, ӟуч шуыса. Тусаз но удмуртъёслэсь маиз ке вань кадь.

— Выжыосы татысь, ачим но Ижын вордӥськи. Мыным 2 толэзь вал, Санкт-Петербурге улыны кошкыкумы, — вера со. — Иже ӵужанае кылиз, солэн выжыосаз бигеръёс но ӟучъёс гинэ. Со дорын арлы быдэ куноясько.

Удмурт кыл мыным котьку тунсыко вал, но рос-прос сое дышетыны кутски 2011-тӥ арын. Интернет пыр герӟаськи Москваын улӥсь удмурт нылэн Ольга Урасиноваен, со дэмлаз удмурт кылэз дышетонъя учебник. Та книга шуггес потӥз, нокин индылӥсь вӧзам ӧй вал бере. Юанъёсылы Ольга ик валэктылӥз. Озьы ик удмурт кыллэсь чузъяськемзэ кылзӥськи Интернетэтӥ «Мынам Удмуртие» радио пыр. Гужемлы песяе доры вуисько ке, одно ик «Удмурт дунне» газетлэн редакцияз ветлӥсько. «Удмуртия» издательствое но пыратэк уг бертӥськы. Али ӝажыям кыллё Роман Валишинлэн, Егор Загребинлэн, Ульфат Бадретдиновлэн но мукет гожъяськисьёслэн книгаоссы. Зэм, мон зӧкъёссэ уг бырйиськы, лыдӟыны но пуштроссэ валаны капчигес мед луоз шуыса.

Удмуртъёслы Максим кылем арын ик тодмо луиз вал ини: кунояськиз «Мынам Удмуртие» телерадиокомпанилэн передачаяз куинь Светӥос дорын.

Та дыре пияш Санкт-Петербургысь кун университетын филология наукаосъя тодон-валан басьтэ — 1-тӥ курсэз йылпумъяз. Солэн верамезъя, туж паймымон туала улон, Россиысь калык кунсьӧр кылъёсын тунсыкъяськегес: француз, испан, итальян кылъёсты тодыны выре, нош вӧзын улӥсь калыкъёслэсь кылъёссэс дышетыны мылкыд карисьёс ӧжыт. Максимлы кылъёс капчиен сётӥсько. Мылкыд гинэ медло, пе. Солы туж кельшо фин-угор кылъёс: удмуртэныз сяна, со вепс кылын лыдӟиське, озьы ик тодэ водь но ижора кылъёсты.

Пияш 3-тӥ арзэ ини радио пыр удмурт диктант гожтэ. Туэ со 92 балл люкам, кылем арын 93 вал, нош солэсь азьло 75 баллэз вылэм. Кылем арын Максим ӟуч кылъя Россиысь олимпиадаын 2-тӥ инты басьтэм. Та вормонэз ик луонлык сётӥз Санкт-Петербургысь университетэ экзаменъёстэк пырыны.

Гужемез пайдаё мед ортчоз шуыса, туэ со нырысьсэ пыриськоно кариськиз Удмурт кун университетын радъяськись удмурт кылэз дышетонъя гужем школае.

Ангелина Снигирёва

Удмурт Дунне
By Удмурт Дунне 14 июля, 2015 08:15
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<