Москваысь Бронница бусыын удмуртъёс ортчытӥзы Гербер шулдыръяськонзэс.

Герберысь котькудӥз ӝутскем мылкыдын, одӥг малпанэн кошкиз: ми котьку ӵошен, ми котьку ог-огмылы юрттыны дась!

Кунмылэн шоркараз улӥсьёс ӟеч сямзэс уг вунэто — туэ дасэтӥ ползэ таӵе ужрад ортчытӥзы.

Герберын маиз но ӧй вал: кырӟанъёс, тапыртонъёс, шудонъёс, визьсынанъёс. Москваын улӥсь удмуртъёсты огазеян, та ужрадэз радъян бордын гижысь-пиньысь тыршемъёс грамотаосын но дипломъёсын пусъемын.

Бронница бусыын «ура!» черекъямъёс шуккиськизы Сергей Хуснияровен сэрен. Та пиосмурт кивалтэм улсын удмуртъёслэн спортъя командазы 3-тӥ инты басьтӥз Москваысь калык огазеяськонъёс но землячествоос пӧлын. Пусъёно: ӵошатсконэ пыриськиз 40 команда! Но Герберын, жаляса верано, мугорез куасалляны ӧзгес пӧрмы: жаль зориз. Озьы ке но люкаськемъёс шар пеллязы, ведраосын-бодыосын куара-ланга поттӥзы.

Герберысь котькудӥз ӝутскем мылкыдын, одӥг малпанэн кошкиз: ми котьку ӵошен, ми котьку ог-огмылы юрттыны дась!

Одӥг семьяын кадь улэм-вылэммы тужгес но ӟеч ад-ӟиськиз, Герберлы дасяськыку. Котькудӥз ас ужзэ тодӥз: ӝук пќзьтон, ӝӧк-пукон ваён, кырӟан-веран понна кыл кутон… Озьы огъя кужымен ужрадмы шулдыр пӧрмиз.

Маргарита Сельченкова

Туспуктӥз Владимир Камашев