Кудымкарын «ЧУДный карнавал-2015» ортчиз

Удмурт Дунне
By Удмурт Дунне 14 июля, 2015 08:21

чудь11-тӥ-12-тӥ июле Кудымкарын ортчиз фин-угор калыкъёслэн культуразылы сӥзем «ЧУДный карнавал-2015» фестиваль.

Коми-пермякъёс доры куное вуылӥзы Пермь улосвылысь, Комиысь, Марий Элысь, Ханты-Манси автономной округысь но асьме шаерысь делегациос. Фестивале пыриськизы пӧртэм удысъёсысь усточиос — вӧлӥсь скульпторъёс, художникъёс, фольклор коллективъёс, пӧраськисьёс.

Та фестиваль радъяськылэ 2009-тӥ арысен. Солэн валтӥсь ужпумез — огазе бичаны фин-угор калыкъёслэн лулчеберетэнызы тунсыкъяськисьёсты, возьматыны, маин висъясько фин-угор культураос но ма соосты огазея. Таяз арын фестивале пыриськисьёс тодматскизы семья, выжы кусыпъёсын герӟаськем сям-йылолъёсын, соослы сӥзем мифъёсын, легендаосын. Коми-пермякъёс понна семья кусыпъёслэсь кужымзэс возьматӥсь геройёс луо Кудым-Ош но Костэ, Пера батыр но Зарань. Та образъёс ик луизы фестивальлэн символъёсыз.

Анастасия ШУМИЛОВА

 

Удмурт Дунне
By Удмурт Дунне 14 июля, 2015 08:21