«Бабаушкина дача» Тол бабай дорын

Удмурт Дунне
By Удмурт Дунне 2 июля, 2015 13:10

Кылем арня пумын Шарканысь Тол бабай дӥне 4 сюрслэсь ятыр куноос люкаськылӥзы. Таяз учыре отын ортчиз «Бабушкина дача» 20-тӥез крезьгуро фестиваль.

Та ужрад радъяськылӥз вал Вотка ёросысь «Болгуры» шутэтскон базаын. Отчы пыриськыны мылкыд карисьёслэн лыдзы арысь аре йылӥз, нош палаткаосын улӥсь туристъёслы ӟоскыт луиз, озьы фестиваль интызэ воштӥз. Шарканын та ласянь вӧл-вӧл. Удмуртиысь сяна, Шарканэ вуылӥзы Пермь, Киров, Челябинск улосъёсысь, Татарстанысь но Башкортостанысь куноос. Нош фестивальлэн нимыз потэмын Бабушкин фамилия бордысь. Ужрадлэн кивалтӥсез но продюсерез луэ Андрей Бабушкин.

пестро

Берло аръёсы Россиысь нимо-дано артистъёс вуылӥзы отчы: Андрей Козловский, Анатолий Киреев, Виктор Третьяков, Лидия Чебоксарова, Вера Вотинцева, Григорий Данской но мукетъёсыз.

Та ужрадэ ветлӥзы Ижысь 56 номеро гимназиысь удмурт классын дышетскись пиналъёс но анай-атайёсынызы ӵош. Пятница нуналэ ик Шарканэ трос калык люкаськиз. Палаткаос пуктон интыос ӝог быризы, нош калык ялан лыктэ но лыктэ. Куазь шунды тылсиоссэ уг жаля. Тужгес ӟырдыт вал суббота нуналэ. Калык солань-талань бызьылэ, кырӟаны мылкыд карисьёсты ог вить интыын дунъяло. Устоосызлы гинэ удалтӥз бадӟым сцена вылын ас быгатонлыкъёссэс возьматыны. Спортэз яратӥсьёс понна пичи футболэн но волейболэн ӵошатсконъёс, ыбылӥськыса шудонъёс радъямын вал, эктонэз гажасьёслы мастер-классъёс возьматӥзы, мылкыд карись воргоронъёс, пу пильылыса, ӵошатскизы.

«Бабушкина дача» фестивальлэн шорсюлмыз герӟаськемын кырӟанэн. Берло аръёсы Россиысь нимо-дано артистъёс вуылӥзы отчы: Андрей Козловский, Анатолий Киреев, Виктор Третьяков, Лидия Чебоксарова, Вера Вотинцева, Григорий Данской но мукетъёсыз. Таяз учыре куное лыктэмын вал Россиысь тодмо бард Олег Митяев, Пермьысь «Пятый квартет» группа. Калыкез шулдыртӥзы Пичи Пурга ёросысь Брангуртысь нимо-дано песянайёс. Куноосты ческыт пыжем нянен куноятӥз Тол бабай.

ужрадэ лыктэм коллективъёс вожвылъяськизы фестивальлэн валтӥсь кузьымез понна. 50 сюрс манет утӥз Ижысь «Ok life bend» коллектив. Одӥгез но фестиваль уг ортчы шаерысьтымы кырӟась песянайёстэк. Соослэн вожвылъяськоназы 6 коллектив пыриськиз. 2-тӥ но 3-тӥ интые потӥзы Шаркан ёросысь Быги но Кияса черкогуртысь коллективъёс, 20 но 10 сюрс манет тыр сертификат басьтӥзы, нош вормизы Глазов ёросысь Пӧжы гуртысь кырӟасьёс, соос 30 сюрс манетлы узырмизы.

— Фестивале нырысьсэ пыриськимы, малпамы вал, оло, кыӵе ке инты басьтомы ик шуыса, — вера Глазов ёросысь «Пестро саес» коллективен кивалтӥсь Надежда Владыкина. — Вормонмылы дурыныз шумпотӥськомы. Коллективамы 8 нылкышноос но гармонистмы ветлэ, тужгес арлыдоез — Александра Николаевна Золотарёва, солы 68 арес. Татын ми «Пӧжы гуртысь пежаос» композиция возьматӥмы, со ик вормыны но юрттӥз кадь. Нош висъям коньдонзэс счётамы пономы, туж потэ Москва палъёсы вуылэммы, концерт возьматэммы. Оло, куке-соку кылдоз ик малпанмес быдэстыны.

«Бабушкина дача» фестивале сомында калык люкаськемын вал, нош кудӟыса ветлӥсьёсты ӧй синйылты, асьсэ бервылзэс туристъёс утялтыса кельтӥзы, ӟеч ужазы волонтёръёс.

Валентина Емельянова

Туспуктэмез авторлэн

Удмурт Дунне
By Удмурт Дунне 2 июля, 2015 13:10