А. Загребин Россиысь антроплогъёслэн но этнологъёслэн ассоциацизылэн азьмуртэз луиз

Удмурт Дунне
By Удмурт Дунне 23 июля, 2015 10:34
АВ Головнев и АЕ Загребин

Конгрессын кылдӥз Антропологъёслэн но этнологъёслэн ассоциацизы.

Историяя, кылъя но литературая Удмурт институлэн директорез А. Загребин Россиысь антроплогъёслэн но этнологъёслэн ассоциацизылэн азьмуртэз луиз.

Таяз толэзе Екатеринбургын быдэс Росииысь антроплогъёс но этнографъёс люкаськылӥзы. Туала дыре пӧртэм калыкъёслэн культураоссы асьсэ понназы гинэ уг азинско, соос пӧртэм калыкъёсын сурасько. Та ик луиз конгресслэн валтӥсь ужпумез. Озьы ик татын ӝутэмын вал мукет юанъёс: калыкъёс вискын ӝутскем споръяськонъёсты сэрттон-пертчон, калыкъёс куспын герӟетъёсты эскеронын выль амалъёсты кутон, Евразиысь но мукет интыосысь калыкъёслэн асьме пала лыктон мугъёссы.

Научной ужъёсын тодматскем сяна, тодосчиос туспуктэмъёсын адӟытонъёссы вуылӥзы. Одӥгез Ямалын но Чукоткаын калыкъёслэн туннэ улонзы сярысь вера, кыкетӥез воксё мукет дуннеез усьтэ — Англиез.

Конгресслэн программаяз озьы ик пыриз адямилы сӥзем киноосты возьматон. Отысь адӟыны луиз Алексей Федорченколэсь «Ангелы революции» киносуредзэ. Автор туэ «Кинотаврын» та киноеныз тужгес устоезыз режиссёрен лыдъямын вал.

Конгрессын кылдӥз Антропологъёслэн но этнологъёслэн ассоциацизы. Отчы пыризы Россиысь 174 тодосчиос. Соос огкылэ вуизы: огазеяськонлэн исполкомез луоз Мускоын, кытчы люкаськылоз 21 тодосчи. Ассоциацилэн президентэз луиз Историяя, кылъя но литературая Удмурт институлэн директорез Алексей Загребин. Со понна тужгес но трос куараос сётэмын вал.

Вуоно арын антропологъёслэн но этнографъёслэн конгрессы ортчоз Ижын.

«УД»

 

Удмурт Дунне
By Удмурт Дунне 23 июля, 2015 10:34