9-тӥ июле 79 аресказ улонысь кошкиз Егор Егорович Загребин.

Удмурт Дунне
By Удмурт Дунне 14 июля, 2015 13:19

загребинУдмуртиысь калык писатель, Удмуртиысь искусство удысысь дано ужась, Россиысь культура удысысь дано ужась, Удмурт Республикалэн Кун премиезлэн лауреатэз, Россия Федерациысь Писательёслэн огазеяськонзылэн ёзчиез, Удмуртиысь Писательёслэн союззылэн азьвыл кивалтӥсез Е. Загребин вордӥськиз 1937-тӥ арын 4-тӥ июле Якшур-Бӧдья ёросысь Кутоншур гуртын.

1961-тӥ арын йылпумъяз Ленинградысь А. Островский нимо театральной институтэз. Удмурт театре бертыса, шудӥз сцена вылын, кивалтӥз театрлэн литературая ёзэныз. 1971-тӥ-1982-тӥ аръёсы Удмурт телевидениын режиссёр луыса ужаз, собере «Инвожо» журналлэн валтӥсь редакторез вал.

Ленинградын дышетскыкуз ик, ассэ драматург сямен возьматӥз. Ог 20 пьеса гожтӥз, ӟечъёсыз ялан возиськизы Удмурт театрлэн репертуараз.

Творчествояз возьматӥз калыкезлэсь кужымзэ, чеберзэ, дышетылӥз вордӥськем музъемдэ яратыны, тыршылӥз шаермылэсь историзэ, туннэ но толло нуналзэ герӟаса, валэктыны. Трос удмурт произведениосты, сценарий гожтыса, сцена вылэ вуттӥз. Берыктӥз ӟуч классикаез: А. Островскийлэн, А. Софроновлэн, М. Варфоломеевлэн геройёссы удмурт кылын вераськизы. Пьесаос кылдытъям сяна, Е. Загребин быгатыса гожъяз нылпиослы произведениос, серекъян-мактан веросъёс.

Е. Загребинлэн драматургиез но прозаез нимаз книгаосын но бичетъёсын потэмын. Произведениосыз берыктэмын ӟуч, чуваш, пор, мордва но мукет кылъёсы.

Егор Егорович пыриськиз СССР-ысь егит писательёслэн 5-тӥ совещаниязы. 15 ар ӵоже кивалтӥз Удмуртиысь Писательёслэн огазеяськонэнызы. Со ялан сюлмаськиз, кивалтӥсьёс но калык ог-огзэс мед кылозы-валалозы шуыса. Газет-журналъёсы трос гожъяськиз, калык пӧлы потаз, Удмуртилэсь искусствоосты азинтон, нациослэсь кусыпъёссэс умоятон политиказэ волятыны тыршыса.
Котьку висъяськылӥз вордскем шаерзэ яратэменыз, верамез понна кыл кутыны быгатэменыз, ужась калыкез гажаменыз. Удмуртиын улӥсьёс со понна яратӥзы писателез.

Гожъяськемез, калыкен ужамез Е. Загребинлэн вылӥ дунъямын. Со луиз Эшъяськон орденлэн кавалерез, Удмуртиысь калык писатель, Удмуртиысь искусство удысысь дано ужась, Россиысь культура удысысь дано ужась, Удмурт Республикалэн Кун премиезлэн лауреатэз, М. Петров нимо литературной премилэн лауреатэз.

Е. Загребинлэн творчествоез республикалэн улоназ мур пытьы кельтӥз. Улонэз — егит адямиослы адӟем карымон. Гожтыса кельтэм чуръёсыз — Удмурт Республикалэн данъяськонэз.
Ӟеч адями, Удмурт шаерлэн зэмос пиез сярысь тодэ ваёнъёс пыраклы кылёзы сюлэмъёсамы.

Удмурт Республикалэн Тӧроез,
Правительство,
Кун Кенеш

Удмурт Дунне
By Удмурт Дунне 14 июля, 2015 13:19
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<