Мӧзмонэз буйгатӥсь гучык

Удмурт Дунне
By Удмурт Дунне Июль 25, 2015 12:13
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

8Туала литератураын ялан кыӵе ке утчаськонъёс мыно, писательёс текстлэн кылыз я пуштросэз вылын шудэмъясько.

Но, кызьы шуэ ӟуч писатель, критик А. Генис, книга удалтэмын ӧвӧл ке, сое экспериментальной шуо, нош ӟеч литературалы нокыӵе определениос кулэ ӧвӧл. Соин ик туала литература ӧрын пыласькем бере ӵемысь ог гучык ке но юэм потэ пӧрмем, зэмос литератураысь. Таӵе вакытъёсы юртто классикъёс, нош туала писательёс пӧлысь кин классик луоз — дыр гинэ возьматоз. Но одӥг книга сярысь мон али ик верасал: Александр Чудаковлэн «Ложится мгла на старые ступени» романэз — зэмос классика.

Книгалэн героез — Антон — бертэ дораз, Казахстанысь пичи каре, татчы Совето Союз вакытэ кунмылэн пӧртэм интыосысьтыз адямиосты ссылкае келяллязы.  Кин ке, секытэз чидатэк, адями ымнырзэ ыштэ, кин ке вань шуг-секытъёс пыр потэ, кужмогес луэ. Писатель синмаськыса суреда берпуметӥоссэ. А. Чудаков понна та адямиос но соослэн улонзы — зэмос Россия, кудзэ ми али ыштӥм.

Та книга — тодэ ваёнъёсын бичет. Со кыӵе ке вуж, песянаен куэм шобрет выллем. Валтӥсь сюжетэз татын ӧвӧл, со пӧрмытэмын пичи сюжетъёслэсь. Котькудӥз сюжет, герой, веран — ас интыяз, ӵош соос пӧрмыто паськыт паймымон текст, со шока азьвылэзлэсь мӧзмонэн, улонлэсь пӧртэм палъёссэ возьматэ. Героен ӵош лыдӟись поръя тодэ ваёнъёсын шыкыстӥ. Антонлэн семьяез, ӵош дышетскем эшъёсыз, бускельёсыз — котькудӥз герой улэпкын син азе пуксе. Котькуд пичи историын выль валтӥсь герой — Антонлэн песятаез, эшез, дышетӥсез, вуж юрт, ульча, кыӵе ке кыл, историысь учыр, вашкала арбери… Чудаков сокем быгатыса соос сярысь маде, таӵе быгатонлыкез понна сое А. Чеховен ӵошатыны луоз. Нош кыӵе кылын гожтэмын та книга! Капчи но улэп, котькудзэ веранэз ас вераськонэ пыртэм потэ. И. Бунинлэн кылыныз ӵошатыны луоз. Авторлэн кыллы синмаськемез шӧдӥське котькуд чурын: тани пичи Антон умме усе но нунал ӵоже чузъяськем кылъёс пӧлысь быръе тужгес чеберзэ (кочедык, шизофреничка…) Пичи дырысеныз ик яратэ сыӵе учыръёсты, кытын луонлык кылдэ «книгаын сямен» мар ке вераны яке ас понназ малпаны.

Котькуд адямилэн аслаз тодэ ваёнъёсыз. А. Чудаковлэн книгаез Россиысь калыкъёслэсь огъя тодэ ваёнъёссэс суреда. Та выллем гинэ быдӟым книгаос быгато герӟаны асьмелэсь бадӟым кунмес, кытын уло сомында пӧртэм выжыос.

Анастасия Шумилова

 

 

 

Удмурт Дунне
By Удмурт Дунне Июль 25, 2015 12:13
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<