Кылем кӧснуналэ шаермы люкиськиз одӥгеныз йӧно удмурт воргоронэн Егор Егорович Загребинэн.

Удмурт Дунне
By Удмурт Дунне Июль 14, 2015 13:33

загребинКылем кӧснуналэ шаермы люкиськиз одӥгеныз йӧно удмурт воргоронэн Егор Егорович Загребинэн.

«Гожъяськисьлы чырсаны уг яра»

Егор Егорович студент дыръяз ик драматургия удысэ кыстӥське. Ӵапак Ленинградын дышетскыкуз, со гожтэ «Тулыс зор» нырысетӥ пьесазэ. Шаермылэн шоркараз вуыса, егит артистъёс та пьесая спектаклез калыклы возьмато. Учкись ужзэс шуныт пумита.

Артист луэм сяна, Загребин театрлэн литературая люкетэныз но кивалтӥз. одӥг интыын кема ӧз чидалля. «Чырсаны кутскисько, нош гожъяськисьлы чырсаны уг яра», — шуылоз вал со.

Театрысь кошкыса, со ужаны кутске Ижысь телестудиын режиссёр луыса. Уно передачаос дася, командировкаосы пота. ялан калык пӧлын. Пьесаосызлы выль материал люка, тунсыко адямиосын пумиськылэ. Озьы кылдӥзы Егор Егоровичлэн уно пьесаосыз.

Телестудиысь со нош ик Удмурт театре берытске. Нош ик кивалтэ литературая люкетэн. Уйёсы но шутэтскон нуналъёсы гожъя пьесаос, мукет кылысь произведениосты театрлэн куремезъя берыктылэ удмурт кылэ.

Собере Егор Егоровичез Удмуртиысь Писательёслэн огазеяськонзы юнматэ «Инвожо» журналлы валтӥсь редакторе. Вань сюлэмзэ, быгатэмзэ поныса, тыршиз со. Ужасьёсыныз кенешылӥз, дэмланъёс но ӵектонъёс сётъялляз, лыдӟисьёсын ӟеч кусып возьылӥз.

Берло аръёссэ Егор Загребин Удмуртиысь писательёслэн кивалтӥсьсы вал. Та удысын но со мыло-кыдо тыршиз, шуг-секытъёс тырмылӥзы ке но. Югдур тужгес но урод вал коньдон ласянь.

Озьы ке но Егор Егорович быгатылӥз шуг-секытысь кызьы ке но потылыны. Куддыръя кивалтӥсьёсын но керетылӥз. Вал солэн сыӵе сямыз: нокинлэсь ӧз кышкалля.
Ӵем поталляз ёросъёсы я кивалтӥсьёс, я юбилярлэн ӵыжы-выжыосыз доры, я пӧртэм праздникъёсы-юбилейёсы. Котьку но котькытын быгатыса вераськылӥз, ӵемысь серекъятылӥз. Куараез кужмо, гудыри кадь вал.

Егор Загребин ог 20 пьеса гожтӥз. Ваньмыз сямен ик соос Удмурт театрлэн сцена вылаз пуктэмын. Калык соосты уз вунэты, куд-огез выльысь но выльысь пуктэмын луозы.

Егор Загребин ӟеч прозаик но вал. Солэн инкуазь сярысь «Нюлэс куараос» нырысетӥ книгаез ик лыдӟисез паймытӥз. Автор зэмос тодосчи кадь вала но шӧдэ инкуазез, яратэ но куректэ со понна. Та книга — инкуазь сярысь зэмос поэзия! Со ноку но уз вужмы, «Удмуртия» издательство сое выльысь мед поттысал но вань школаосы, библиотекаосы мед келясал. Прозаен гожтэм мукет книгаосыз но туж тунсыкоесь.

Егор Загребин — зэмос публицист но. Солэн газетъёсын, журналъёсын но книгаосын печатлам статьяосыз туж лэчытэсь. Гожтэ-а азьвылгес улон сярысь яке туала югдурез-а сэрттэ-пертче, со котьку но лыдӟисьлэсь мылкыдзэ бугыртэ, солэн сюлэмаз но йырвизьмаз пыдло пыре но малпаськытэ.

Серекъян но лулӟылон

кыӵе тунсыко адями вал ачиз Егор Егорович! 40 ар ӵоже эшъяськытозямы, ми сомында вераськимы, серекъямы, лулӟылӥмы. Я улон сярысь, я литература но искусство сярысь, я кыӵе ке мукет удысъёс сярысь. Со котьку но паймытъяз трос тодэменыз, философ выллем малпаськеменыз, улонын олокыӵе но учыръёсы сюрылэменыз.

СССР-ен Михаил Горбачёв кивалтыку, ми соин Можга ёросэ концерт возьматъяны потамы. Кык кузя. Отысен ик адӟи мон, кыӵе тунсыко артист вал Егор. Арганэн но шудэ, такмакъёс но кырӟа, юморескаос но лыдӟе.

Нош ик одӥг учырез верало. Тае со мыным ачиз мадиз. Соку Егор писательёслэн огазеяськонэнызы кивалтӥз. Со вакытэ огазеяськонзылэн машинаез но вал, вужгес маке.

Одӥг пол мынӥськом, пе, шофёреным Ижысь ипподром дортӥ. Огаз ураме кожыны машинаослы лэземын ӧвӧл, пе — пус пуктэмын. Нош соослы ӵапак отчы мыноно.

— Мын, эн кышка. Адӟиськод ук: нокин ӧвӧл, — ӵектэ Загребин.

— Нош кутӥзы ке? — кышка шофёр.

— Уз кутэ, эн кышка, — буйгатэ Егор.

Шофёр кылзӥське, коже со ураме. Олокытысь милиционер потэ.

— Татӥ ветлыны уг яра, тон синтэм шат, вай документъёстэ! — кеське милиционер шофёр шоры.

Соку машинаысь бадӟым мугоро, костюмен, галстукен Загребин потэ.

— Тон мар, тодмамысь дугдӥд? Усьты синъёстэ! — кеське Загребин милиционер шоры ӟуч сямен. Соиз кӧдэктэ, собере могаса вераськыны кутске:

— Вождэс эн вае, пожалуйста, эн вае. Мынэ, кытчы мынӥськоды вал, — погонэн адями писателез туж бадӟым кивалтӥсь кожа.

Та учыр но возьматэ, кыӵе быгатӥсь артист вал Егор Загребин.

Нош кыӵе ӟеч мушкась вал со. Котькуд аре инвожо толэзе Егор отпуске потылӥз. Зарезь дуре уг кошкы — бертэ вордӥськем палъёсаз, мушъёсыз доры. палдэмзэс возьма, кутэ, мукет умортоосы интыя.

— Пересьмисько, мушъёс тросэз пегӟо, кутэме уг луы ни, — ӝожтӥськиз Егор мыным одӥг ӝытэ. Собере шуак бӧрдыны кутскиз. Мон нырысьсэ адӟи Егор Егорычлэсь бӧрдэмзэ.

— Мон кулӥ ке, кин мушъёсыным выроз? Ваньмыз быроз ук. Мынам песятае но, атае но муш вордӥзы.

— Тынад пиед вань ук, — вази мон.

— Мушъёсын со уз выры. Пиелы наука дуногес, — синкылиосыз пыр мур лулӟиз писатель.

Та учыр вал дас ар талэсь азьвыл. Тӥни сыӵеен тодам вайисько мон Егор Егорович Загребинэз. Серекъясь но шумпотӥсь, лек тусо но мур малпаськись, ӝожомись но… Сӥзьыл куазь выллем. Калыкын таӵе веран вань: адями, пе, улонысь ӵем дыръя вордӥськем толэзяз ик кошке. Озьы луиз Егор Егоровичен но. Со вордӥськемын 4-тӥ пӧсьтолэзе. Арня но ӧз ортчы…

Анатолий Григорьев

Удмурт Дунне
By Удмурт Дунне Июль 14, 2015 13:33
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<