400 аръем Бадӟым Пурга, 3 улӥсен Гозек но 100 муртъем хор

Удмурт Дунне
By Удмурт Дунне 6 июля, 2015 10:58
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Яр

Ваче син кенешон

Кылем арня пумын Ярын улӥсьёс пумиськылӥзы Кун Кенешлэн Тӧроеныз В. Невоструевен но депутатэн Р. Каримовен. Эскеремын сюлмаськытӥсь ужпумъёс.

Пумиськонэ ёрослэн йырыз пыриськиз на. Калык юалляськиз тыллы дунъёс, субсидия басьтон ласянь. Кивалтӥсьёслэн ужан нуналзы йылпумъяськиз выль лэсьтэм спорткомплексын. Табере Ярысь пиналъёс но рос-прос дасяськыны быгатозы ГТО-лэсь куронъёссэ быдэстонлы.

Эгра

400 аръем гурт

Эгра ёросысь Бадӟым Пургаын улӥсьёс кылем кӧснуналэ гуртсылэсь 400 ар тырмонзэ пусйизы.

Та гурт шаерысьтымы одӥгез вашкалаез луэ. Нимызъя учконо ке, бадӟым луыны кулэ кадь, нош со пичигес черкогурт. 1850-тӥ арысен 1941-тӥ арозь Бадӟым Пургаын черк ужаз, нош собере сое пытсазы. Та вакытэ черкез выльысь выльдо. 1860-тӥ арын усьтӥськиз школа, туэ со 155 ар тырмонзэ пусйиз. 1899-тӥ арын татын кылдӥз библиотека. Гуртлэн нуналэз дыръя трос куноос люкаськизы, соос вашкалазэ тодазы вайизы но шулдыръяськизы.

Сюмси

Огазеяз «Дорвыжы»

Пинал шаерчиослэн «Дорвыжы» слётсы Сюмси черкогуртын ортчиз.

8 ёросысь 10 команда арня куспын шаертодонъя быгатонлыкъёссэ эскериз, пӧртэм ӵошатсконъёсы пыриськиз. Слётлэн шорсюлмыз герӟаськемын вал туризмен. Шуг-секытъёсты котькинлэсь шаплы ортчизы Балезино ёросысь нылпиос, 2-тӥ интые потӥз Можга городысь команда, 3-тӥ луизы сюмсиос.

Грак

Гурт возисьёс

Грак черкогурт котырысь Гозек гурт ёросысь тужгес пичиез лыдъяське.

Та гуртын улӥсез 3 мурт сяна кылемын ӧвӧл. Тросэз Грак черкогуртэ улыны выжизы. Одӥгез соос пӧлысь — Тамара Михайловна Грахова вордскем интыоссэ малпаса, «Кустари» книга поттӥз. Историысь чуръёс гожтэм сяна, отчы трос туспуктэмъёс пыртӥз. Кылем арня пумын Гозек гуртэ трос калык люкаськылӥз. Соос гуртсылэсь 130 ар тырмонзэ пусйизы.

Шаркан

Хорын сю мурт

Арлы 2 пол Шаркан ёросын спортъя бадӟым ӵошатсконъёс ортчо. Кылем арня пумын Сосновкае люкаськылӥзы вань муниципал кылдытэтъёсысь спортсменъёс.

Шаркан ёросысь спортэз яратӥсьёслэн гужем вожвылъяськонзы 19-тӥзэ ортчиз. Сосновкаын улӥсьёс паймытӥзы куно пумитаны быгатэменызы. Ужрадэз усьтон дыръя гуртысь кырӟасьёслэн хорзы — 100 мурт (кивалтӥсьсы А. Шкляев) — Удмуртилэсь гимнзэ быдэстӥз. Ӵошатсконын, котькинлэсь трос очко люкаса, вормисе потӥзы «Сосновка», «Шаркан-1» но «Карсашур» командаос.

Дэбес

Сюрес вылын — тэшкылиос

Кылем пятница нуналэ Дэбес ёросын улӥсьёс Егитъёслэсь нуналзэс пусйизы.

Шулдыръяськонэ тэшкылиос но пыриськизы. Озьы 2 аресозь нылпиос пӧлын 8 метръем палас вылтӥ бызьылонъя ӵошатскон радъямын вал. Ужрадэ 18 пинал пыриськиз. Анай-атайёс нылпиоссэс, ческыт конфетъёсын гочатыса, телефонысьтызы шулдыр крезьгурен бурдъяса, сьӧразы ӧтизы, нош киосынызы валтыны уг яра вал. 1,5-2 аресъем пиналъёс пӧлын вормисе потӥз Егор Тронин. 8 метрез со 4 секунд куспын ортчиз. 1-1,5 аресъемъёс пӧлын вормиз Максим Артемьев, 10 минут 15 секунд ӵоже финише вуиз. Ужрадэ пыриськемъёслы ваньзылы грамотаос но небыт шудонъёс кузьмазы.

Кез

Мальдӥсь синпелетъёс

Кылем арын март толэзьысен шаерамы ортчиз Быдӟым ожын быремъёсты буре ваён памятникъёсыз тупатъян.

Синпелетъёссэс выльдыны мылкыд карисьёс Экологияя но биологияя элькун центре проектъёссэс ыстӥзы. Вуиз 38 уж: 12 ёросысь но Глазов, Ижевск, Можга но Сарапул городъёсысь. Кез ёросысь 2 школа пыриськиз конкурсэ. Синпелет котыре сяська мерттонъя проектъёс пӧлын нырысетӥ инты басьтӥзы Кезысь 1 номеро школаын дышетскисьёс. Кузьма гуртысь пиналъёслэн ужзы но сертификатэн пусъемын.

Балезино

Шурын  уг мисьтасько

Балезино муниципал кылдытэтысь депутатъёс, Чупчи шурлэн чылкытлыкез сярысь сюлмаськыса, выль решение кутӥзы.

Азьвыл аръёсы Балезино каргурт котырысь Чупчи шуре нимысьтыз пур лэсьтыло вал, мылкыд карисьёс отын дорысьтызы выж лёгетъёссэс миськылӥзы. Туэ со пурез ӧз пуктэ, шуре пӧртэм химия вуэ шуыса. Ваменэс адямиос кыл кутытон улэ кыскемын луозы.

Дасяз Валентина Кутузова

Удмурт Дунне
By Удмурт Дунне 6 июля, 2015 10:58
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<