Экстремизмен нюръяськон но калык кусыпъёсты юнматон сярысь вераськизы

Удмурт Дунне
By Удмурт Дунне Июль 2, 2015 11:32
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Россиын юнматэмын экстремизмен нюръяськонлы но калык кусыпъёсты юнматонлы сӥзем программаос. Кыкез но чакламын 2025-тӥ арозь. Со вылэ пыкиськыса, асьсэлэсь программаоссэс кылдытыны кулэ улосъёс но.

Лыдпусъёс малпаськыто

Элькунамы дауръёсын 100-лэсь ятыр пӧртэм калыкъёс эшъяськыса, ог-огзэс валаса, уло. Асьмелэн вань Эшъяськон юртмы, ужа Нациосын ужан политикая министерство, кылдытэмын 32 калык огазеяськонъёс. Мар лэсьтыны луэ на калыкъёслэсь кусыпъёссэс юнматон понна? Та юанлы валэктон утчазы Кун Кенешысь котырес ӝӧк сьӧрын. Отчы люкаськылӥзы парламентысь депутатъёс, министерствоосысь но ведомствоосысь валтӥсь специалистъёс, общественной огазеяськонъёслэн ёзчиоссы. Кенешонэз нуиз Кун Кенешысь Национальной политикая, кышкытлыклэсь утиськонъя, регламентъя но Кун Кенешлэсь ужзэ радъянъя ялан ужась комиссилэн кивалтӥсез Энвиль Касимов.

Вераськон ӟырдыт пӧрмиз. Чузъяськизы кӧня ке пумо докладъёс, котькудаз — малпаськонэ уськытӥсь лыдпусъёс, ужпумъёс. Умой валаськиз: элькунмы Россиысь шыпыт улосъёс пӧлы пыре ке но, шугъяськытӥсез ӧжыт ӧвӧл. Озьы калык пӧлын юалляськонъёс возьмато: та вакытлы республикаысьтымы ог 66 процентэз улӥсьёс пӧртэм калыкъёс куспын шунытэсь кусыпъёсты пусъё. Но 34 процентэз таин соглаш ӧвӧл. Ог 80 процентэз котькыӵе выжысь калыкъёсын огкадь верасько. Но ог 20 процентэз нырысь учко, кин сылэ азязы. Озьыен, котькуд витетӥез пумита тусъя.

Нациосын ужан политикая министрлэн нырысетӥ воштӥсез Павел Орлов верамъя, мукет калыкъёсын огкыл шедьтыны пумит кариськисьёс уката трос егитъёс пӧлын.

— Туэ ар ӵоже пӧртэм калыкъёслэн кусыпъёсынызы герӟаськем 14 йыруж пусъемын, законэз тӥясьёс пӧлын бадӟым люкетэз — 16-30 аресъемъёс, — вераз МВД-ысь экстремизмен нюръяськонъя центрлэн кивалтӥсезлэн воштӥсез Михаил Шутов но. — Пӧртэм калыкъёсты ог-огзы вылэ узатыса, тросэз Интернетэ видеороликъёс тыро. Куд-огез калыкъёслэн осконзы вылын шудэ. Озьы туэ ни шаерамы секта кылдытӥсь воргорон ӝегатэмын.

Михаил Шутов ӧз ваты: Украиналэн армияз но Удмуртиысь кӧня ке мурт ожмаське, бадӟым люкетэз — студентъёс, но вань азьвыл военнойёс но. Таос, пе, Россие бырытсконо кариськизы ке, уголовной кыл кутон улэ кыскемын луозы, угось Киев палан нюръяськон озьы ик экстремизмен лыдъямын.

Калыкъёслэн кусыпъёссылы сӥзем кенешон.

Калыкъёслэн кусыпъёссылы сӥзем кенешон.

Учконо-а, ӧвӧл-а синме?

— Адямиослэсь йырзэс поромытыны секытгес луысал, пӧртэм калыкъёслэсь сям-йылолъёссэс, культуразэс тодысалмы ке, — оске Павел Орлов. — Угось шаерамы лыктӥсь котькуд калыклэн аслаз валанъёсыз. Кылсярысь, Кавказысь потэмъёс уг ярато синме меӵак учкыса вераськисьёсты — асьсэды вылэ пуктӥсь, тушмон луыны дась луись муртъёс гинэ, пе, озьы выро. Таӵе учыръёс бордысь но ӵемысь пото валамтэос.

Мар кароно югдурез тупатон понна? Одӥгез амал: социальной сетьёсын ялан нуоно валэктон уж, телевидение пыр ӵемгес возьматъяно, газет бамъёсын ӵемгес гожъяно пӧртэм калыкъёслэн улон-вылонзы, сям-йылолъёссы сярысь. Эшшо кулэ книгаос, дышетон удысэ пыӵатоно калыкъёслы сӥзем пӧртэм программаос…

— Пӧртэм выжыысь калыкъёсын шонер вераськыны ялан дышетоно кун но муниципал ёзъёсын ужасьёсты но, — мылкыдзэ вераз Павел Орлов ик.

Нош Историяя, кылъя но литературая Удмурт институтлэн директорез Алексей Загребин ӝожмемзэ вераз этнология удыслы кадръёсты дасянын югдур сярысь. Удмурт кун университетысь этнология кафедра борды, пе, берло 3 ар куспын гинэ 4 мукет кафедраосты ватсазы ни. Таин но, шӧдске, уг буйгало — нош ик ветло оптимизация ортчытон сярысь вераськонъёс.

Аслэсьтыз чурыт малпанзэ вераз «Удмурт Кенеш» огазеяськонлэн тӧроез Игорь Семёнов. Асьмелэн, пе, кун кылъёс сярысь законмы гинэ но вужмемын ни — вылезлы проект дасямын, но Кун Кенешысь депутатъёс сое эскерыны-кутыны сокем ик уг дырто кадь. Юнме меда асьсэдыз удмурт шуисьёслэн лыдзы берло дыре ог 50 сюрслы кулэсмемын?

Шуныт кыллэн кужымез

Котрес ӝӧк сьӧры люкаськемын вал калык огазеяськонъёслэн кивалтӥсьёссы но. Соос но вераськизы ог-огмес гажанлэн кулэлыкез сярысь. Куддыр со, мукет выжыысь калыкъёслы сяна, бускельёсмылы, ӵош ужась эшъёсмылы но уг тырмы. «Урарту» армян огазеяськонлэн кивалтӥсез Мнацакан Аракелян тодаз вайиз Ярын луэм учырез. Улонысь кошкиз Быдӟым тыложысь ветеран. Кузпалыз бӧрдэ, пе, ватыны нокин уг юрттӥськы шуыса. Кавказысь вуэм семья гинэ палэнтӥ ортчымтэ. Шат сюлэмъёсмы сокем чурытомемын?

— Мон эмъясе дышетскемын, — шуиз М. Аракелян. — Соин ик туж умой тодӥсько: адямилэн 60 процентэз сямыз выжысь выжые кыле. Нош 30 процентэз юнма, 6 арес тырмытозяз, отӥяз со 10 процентлы гинэ воштӥськыны быгатоз на. Нош кин покчи пиналъёсмес 6 аресозь визьма? Нылпи садысь воспитательёс, воспитательёслы юрттӥськисьёс, выж миськисьёс. Нылпи садъёсын ужаны кулэ вылӥ тодон-валанъёсын психологъёс!

Трос ӵектонъёс люкаськизы котрес ӝӧк сьӧрын. Соос вылэ пыкиськыса, дасямын резолюция. Со келямын луоз министерствоосы но ведомствоосы, интыосысь аскивалтон ёзъёсы, калыккуспо огазеяськонъёсы. Соос но, оло, ӵектозы на калыкъёслэсь кусыпъёссэс юнматон амалъёсты. Бӧрысь соос пыртэмын луозы элькунамы экстремизмен нюръяськонъя программае.

Элина Кумачёва

Удмурт Дунне
By Удмурт Дунне Июль 2, 2015 11:32
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<