Сильтӧлэз тодӥды, но таӵезэ ӧз вите. Кыӵе ыштонъёс?

Удмурт Дунне
By Удмурт Дунне 2 июля, 2015 10:38
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

29-тӥ июне ӝыт шаерамы кузёяськись сильтӧл. Удмурт Республикалэн Тӧроез Александр Соловьёв верамъя, зол шуккиз со 18 муниципал кылдытэтын улӥсьёслы.

Тӧл секундскын 20 метре вуиз. 150 гуртысь 35 сюрс адямиез воксё тылтэк кельтӥз со. 7 корка газ вуэмысь дугдӥз. Александр Соловьёв ивортэмъя, тужгес пӧсь йӧтӥз Алнаш но Кез ёросъёслы.

— Сильтӧл ми вылэ 17 час 50 минутэ омырскиз, — вера Алнаш ёрослэн йырыз Виктор Бобров. — Таӵеез улытозям ӧй вал на. 32 гурт кылиз тылтэк — вань езъёс кесямын. 16 гуртысь 576 юртъерлэсь липетсэ нуиз, куд-огезлэсь — мумыкореныз валче. Асангуртысь, Байтэрекысь, Вуж Шудьялась школаослэсь липетъёссэс кесяз. Контора, клуб юртъёс сярысь уг вераськы ни. Тӧл ортчем бере ик гуртъёсы потӥмы. Соку ик комиссия люкамы. Пуктэмын ужпум: нырысь ик тыл сётоно больницаосы, медпунктъёсы, школа-садъёсы но интернатъёсы. 30-тӥ числое таосаз улон пӧзьыны кутскиз ни. Езъёсты тупатъяны юрттӥськыны вуизы можгаос, гракъёс, уваос но каракулиноос. Асан совхоз-техникуме тыл ӧвӧлэн ву вуэмысь дугдӥз. Скважинаысь вуэз кыскыны отчы дизель генератор пуктӥмы. Тӥяськем езъёс туж трос ай. Соин ик гуртоослы чидано луоз ужан арня пумозь. Гидъёс сярысь но малпано на.

«Молодая гвардия» хозяйствоысь 15 гид-комплекс пӧлысь 9-эз липеттэк кылемын. Скал кыскисьёс фермаослэсь ӧсъёссэс ворсаса ӧй вуттысалзы ке, югдур эшшо но секыт луысал. Хозяйствоысь валтӥсь зоотехник Валентина Марданова верамъя, профнастилэн шобыртэм липетъёс пластилинэз комоке биням кадь луэмын.

 

Ярано коть, пудо но адямиос но бырыны ӧз шеде. Зэм, Виктор Бобров верамъя, Алнашысь одӥг кышномуртлэн пыдыз чигиськиз, вылаз шифер усьыса. Со али больницаын.

Пано 1 копия

Алнаш ёросын 32 гурт кылиз тылтэк — вань езъёс кесямын. 16 гуртысь 576 юртъерлэсь липетсэ нуиз, куд-огезлэсь — мумыкореныз валче

Гуртоос туннэ Алнаш ёрос администрацие юрттэт курыса лыкто. Ӝыныезлэн но уго коркаоссы страховать каремын ӧй вал. Ваньзылэсь куриськонъёссэс басьто. Пичи ке но юрттыны выром, шуэ Виктор Петрович. Таӵе югдурез уго нокин ӧз возьма, соин ик ёрос бюджетын коньдон чакламын ӧй вал. Комиссилэн чотамезъя, район ог 11 миллион манет тыр ыштон адӟиз. Урожай но начар луоз, дыр, шуэ Виктор Петрович. Нянь бусыос лёгам кадь выдэмын. Вӧсяськыны гинэ на кыле, ю-нянь мед ӝутӥськоз шуыса.

Пичи Пургала сильтӧл вуиз 19 час котырын. Школьной урамысь чеберъяса шуккем коркаос йӧзорен пасё-пасё кылемын, пулемётэн ыбылэм кадь.

— Корка липетъёсмес лэсьтомы ай, кенеръёсмес шукком. Бакча сиён жаль, — шуэ Пичи Пургалась Александра Бочкарёва. — Картошка пу кусоен турнам кадь тӥямын. Кешыр, гордкушман, кубиста — ваньмыз быремын. Мае сиыны кулэ 8 сюрс манет пенсиен? Пудо но сюдыны кулэ. Быдэс гуртэн тазьы чигиськиськом. Кылем арын но сильтӧл бере ёрос администрацие юрттэт курыса вазиськылӥмы. Но кылэм но ӧз каре, страховать, пе, кароно вал. Но кин бакчаоссэ страховать каре?

Туннэ шуге-леке вуэмъёс асьсэос дэмен кариськизы. Ульчаоссэс тӧлъя нуллэм жуг-жаглэсь тазато, усьылэм писпуосты вандыло, юбоосты пуктыло, ог-огзылы кышъяськыны юртто. Лапасъёссэс ӧз липе ке, толлы дасям турынзы зор улын сисьмоз. Шаерысьтымы Инкуазез эскеронъя центрысь синоптик Валерия Лискина ивортэмъя, быдэс арнязэ зороз на. 3-тӥ июле тӧл секундскын 8-13 метре вуоз. Озьыен, нош ик юн кариськоно! Нош шутэтскон нуналъёсы уйин 4-9 градус луоз, нуназе 12-17.

— Вазиськомы Россиысь МЧС-сэ, ыштонъёсты берыктыны мед юрттозы шуыса. Югдурез эскерисьёс матэктӥсь сильтӧл сярысь дыраз ивортӥзы. Калык нуназе ик возьмаз сое, но ӧз тоды, сокем кужмо луоз шуыса. Урожай быремын ке, хозяйствоослы юрттон сярысь но малпаськомы, — шуэ Александр Соловьёв.

Елена Сараматова

Туспуктӥз Алексей Краснов

 

Удмурт Дунне
By Удмурт Дунне 2 июля, 2015 10:38
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<