Калыккуспо праздник ортчиз Брангуртын

Удмурт Дунне
By Удмурт Дунне Июль 1, 2015 12:36
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Уж но кырӟан, перепеч но аръян

Брангуртысь песянайёс таяз арняе нош ик трос куно пумитазы. Шаерамы ортче калык культуралы сӥзем кыкетӥез Брангурт фестиваль.

Сюрс перепеч

Егитъёслэн кылынызы вераса, Бранфест (Брангурт фестиваль) сӥё-дано усьтӥськиз 23-тӥ июне Ижысь циркын. Татчы вуизы кунысьтымы 200-лэсь уно усточиос, озьы ик Индиысь эктӥсьёс но Китайысь крезьгуро инструментъёсын шудӥсьёс. Ваньзы соос вуылӥзы яратоно песянайёсмылэн доразы — Брангуртэ.

«Песянайёс дорын куноын» праздник кутскыны кулэ вал нуназе бере 15 часын. Ми отчы вуимы нуназе котыр. Пӧсь куазь шоры учкытэк, Брангуртысь культура юрт дорын эстӥське ни вал гур, Людмила Русаева куноослы пыже перепеч.

_DSC0943

Брангуртысь фестиваль люказ пичизэ но, бадӟымзэ но, удмуртэз но, индусэз но.

— Культура юртэнымы кивалтэ картэлэн сузэрез Татьяна Сарафанова. Со куремен, гур доры султӥ. Толон 500 перепеч лэсьтӥмы, туннэ — солэсь но трос. Перепечмы сӥльын, кубистаен, трос сугонэз, ческытлы йӧл но, вӧй но понӥмы, ӟег пызен кутӥмы. Но семьяелы шуи, табере кык ар перепеч мынэсьтым эн ни куре, уг ни пӧра, — серекъя Людмила Русаева.
Перепеч пыжисьёс вӧзын ик, саюлынгес, мусур дэмла мукетыз удмурт кенак — Лилия Беляева. Та нылкышно валля арын, нырысетӥезлы Брангурт фестивальлы, 4 фляга мусур пӧзьтэм вылэм, куноос ваньзэ юыса быдтӥллям. Туэ нош ик 4 фляга дасям.

— Юыны ческыт, выронэз синазькыль. 3 нунал мон сое пӧзьтӥ. Ольга Туктарева (Брангуртысь песянайёслэн кивалтӥсьсы) — племянницае, со куриз куноосты утялтыны. Соглаш луи, кызьы-о уд юртты? — шуэ Лилия Беляева.

18 дэрем

13 час котырын Брангуртэ вуылыны кутскизы ини ансамбльёс но вуз карисьёс. Киужъёсын, кудыосын, весьёсын лыктӥзы шаерысьтымы усточиос но палэнысь адямиос. Огъёсыз верасько бигер сямен. Кытысь тӥ шуыса юамелы кышномурт валэктӥз: Казаньысь. Элькун Герберады ветлӥмы но кельшиз, соин ик Брангурт фестивале но вуимы. Вуз карон — валтӥсь интыын ӧвӧл, мыным, пе, кельшизы удмурт кырӟан-эктонъёс но калыкты.

_DSC0222

Концертлы дасяськон.

Нош ансамбльёс пӧлысь нырысьёсыз радын лыктӥзы шарканъёс. Быги гуртысь «Апайёс» фольклор коллектив Брангуртын нырысьсэ. Кивалтӥсьсы Жанна Ермолаева верамъя, соос возьматозы «Ӵӧжы сиён» йылолэз, нош ӝытазе, бадӟым концертын, быдэстозы «Умой луысал» калык кырӟанэз.

— Кырӟаса лыктэменымы, сюреслэсь ортчемзэ ик ӧм валалэ. Тани клубын салкымын пукомы но гуртэ экскурсие потомы, — шуо быгиос.

Зэмзэ но, урамын туж пӧсь, адямиос, ву юаса, культура юртэ пыро. Соин ик Граняпай (Граня Байсарова) быдэс ведраен клубе вуиз, чиялэсь морс ваем. Покчиоссэ но, бадӟымъёссэ но ческыт, юзмыт вуэн утялтӥз.

Кык час котырын песянайёс ваньзы сямен клубе вуизы, куноосты пумитаны ваньмыз дась ни. Ог-огенызы со-та лабыртӥзы. Валентина Пятченко, бамзэ кутылыса, пуке. Толон-валлян Валя апаез муш лексем.

— Бамы пыктӥз, мар но ӧй даурты, мед ортчоз шуыса. Пыктэм ымнырын калык азе кызьы-о потод? Быдэс уйме ӧй изьы, туннэ умойгес ини, ато кырӟатэк кылё ни кожасько вал, — сюлэмшугзэ усьтэ Валентина Семёновна.

Нош Катя апай (Екатерина Шкляева) эшъёсызлы шуэ:

— Сузэре туннэ боры вайиз, кисьмам ини. Ярам, боры кема улэ, бичаны вуом, дыр, ай.

Со куспын клубе пыриз Пичи Пургалась реставраторлэн Татьяна Москвиналэн картэз. Василий Москвинэз адӟыса, Галина Конева ураме потӥз, соос, пе, удмурт дэрем вузаны вайизы, дыр. Песянайёс но, мон но кыштыр гинэ Галина Николаевна сьӧры вамыштӥм.

_DSC0112

18-тӥез дэрем.

Татьяна Москвинаен Галина Николаевна ӟечъяськизы-ӟыгырскизы. Со куспын Галина Конева аслыз кельшымон дэрем синйылтӥз.

— Мон тазэ басьто, пельпумъёсыз но кем, кузьдалаез но ӵапак, дыр, ато мыным ваньзэ вакчиятоно луэ, — шуэ песянай.

Татьяна Москвина пумитаз:

— Галина Николаевна, тон соосты сылалтӥськод-а, мар-а, весь басьтӥськод но басьтӥськод, мыным прибыль лэсьтыса.

— Одӥг ӟуч дэреме но ӧвӧл, тынэсьтыд 17-зэ басьтӥ ини, таиз 18-тӥез луоз, — дэремез кунулаз поныса, шуэ Г. Конева.

— Таизлэн басмаез бездэгес, нырысь кезьыт вуын миськы, — лушкемгес вера Татьяна Москвина.

— Ӵок, бездӥз ке, пудо сюдыны яралоз, — капчияк шуэ Галина Николаевна.

Со куспын лыктэм куноос Брангуртысь песянайёсты адӟизы но котыртыны кутскизы: яра-а тӥледын патретэ пуксьыны? Огез, кыкез, куинетӥез фотоаппаратъёсын вуизы. Песянайёс шуизы: бӧрысьгес, праздник тани кутскоз ини, куно пумитаны дасяськоно.

_DSC0715

Турнаськон.

_DSC0872

Вӧй шуккон.

 

Зарни адями

Калык пӧлтӥ бызьылӥсь Ольга Туктареваез адӟыса, Галина Конева шуэ:

— Тани та зарни адямиез Инмар милемлы лэзиз. Паймисько солэн ассэ жалятэк ужамезлы но нокинэ обидьытэк вераськыны быгатэмезлы. Ми — огшоры песянайёс, Ольга Николаевна ке ӧй луысал, ми нокытчы ӧй вуысалмы. Туэ но со сыӵе бадӟым праздникез дася.

— Нош кылемез фестиваль маин тужгес но тодады кылиз? — юасько Галина Николаевналэсь.

— Соку ми номыре но ӧм адӟе. Быдэс нунал перепеч пыжимы, собере сцена вылын кырӟамы, бӧрысь нош пыжиськимы. Озьы ке но тодамы туж кылиз. 8 сюрс манет тыр перепеч вузамы. Со коньдонэн яблокпу басьтӥмы, черк дорамы мерттӥмы. Маскара учыр вал. Вуылӥз ук Россиысь культурая министр В. Мединский. Татын солы нимысьтыз ӝӧк дасяло, нош со шыпак гинэ дорамы лыктӥз, сиськиз, со-та вераськеммы бере перепеч пыжыны куриськиз. Мон солы айшетме сётӥ, йыраз кышет керттӥ, валэктӥсько. Журналистъёс адӟизы ини, В. Мединскийлэсь интервью басьтыны кутскизы. Министрлэн юрттӥсезлы шуисько: со айшетсэ куштыны вунэтӥз. Пусть, пусть, клёво, пе, — тодаз вае Галина Николаевна.

Дэмен эктон.

Дэмен эктон.

Песянайёслэсь куно пумитаны дась луэмзэс эскерыны дорамы лыктӥз Ольга Туктарева. Вераз, мар вите фестивале лыктэмъёсты.

— Туэ песянайёс гур дорын уз сылэ ни. Праздникмы «Песянайёс дорын куноын» нимаське бере, соос куно пумиталозы, кырӟалозы. Дорамы лыктӥсьёслы тунсыко программа дасямы. Соос удмурт гуртэ лыкто бере, урам кузя васькыкузы ик, дышетозы удмурт кылэз, веръялозы удмурт сиён-юонъёсты, дышетом ньылен эктонмес. Кырӟам-эктэм сяна, тодматскозы гурт ужен но: пу вандозы, кеч кыскозы, нош ӝытазе бадӟым концерт луоз. Отчы 20 коллектив пыриськоз Удмуртиысь, Россиысь но кунгож сьӧрысь. Фестивале пыриськыны мылкыд карисьёс туж трос, со шумпоттэ, мукет ласянь, ансамбльёслы вераськом ини, одӥг номерен гинэ сцена вылэ мед потозы шуыса. Но нокинэ ӝоже ум кельтэ, ваньзы кырӟалозы, эктозы, перепеч сиёзы, шутэтскозы. Ма, ваньзэ уг вера, асьтэос учкоды, — шуэ Ольга Николаевна.

_DSC0662

Куноос кеч кыскизы.

 

Удмурт манерен

Нош учкыны вал мае. Та фестиваль возьматӥз, макем тунсыко но чебер калык культура, татын огкадь коллективъёс ӧй вал. Гурт улонлэсь шугзэ но ческытсэ ас вылазы шӧдӥзы Россиысь но кунгож сьӧрысь вуэм куноос. Калмыкъёс, поръёс кусоен турнаны пӧрмытӥзы ке, Москваысь усточиос туж могдос выризы. Паймытӥзы Индиысь пиос. Шӧдӥське, соос секыт ужлы дышемын. Оп! шуытозь, пуэз вандӥзы. Огезлы сокем кельшиз, лэся, татын, эктыса ик аръян шуккиз.

 

_DSC0696

Йӧл мертан.

Брангуртысь праздник кыстӥськиз ӝыт 10 часозь. Концертэз йылпумъязы Брангуртысь песянайёс «Италмас» кырӟанэнызы. Киысьтызы жингыртӥсь чингылиос борды итӥськиз выль черклэн гырлы куараез. Празднике лыктэмъёс та кырӟанэз бӧрдыса кылзӥськизы.

«Неказистой родилась, простоватой родилась» шуыса кырӟаз Галина Конева. Асьсэды та песянайёс огшоры шуо ке но, огшоры адямиос тамында муртэз шулдыртыны но, бӧрдытыны но ӧй быгатысалзы.
Туннэ, 26-тӥ инвожое, Ижысь Шор площадьын Брангурт фестивальлэн гала-концертэз ортчоз. Ольга Туктарева верамъя, отын соос выль кырӟанъёссэс быдэстозы.
— Кызьы тӥ ваньзэ вуттӥськоды, бакчадэс но мерттыны-урыны, кечтэс но кыскыны, гастрольёсы но потаны? — юасько бабушъёслэсь.

— Калленэн — удмурт манерен, собере, юрттӥсьёсмы трос, ӟеч калык но, Пургамы но уг кушто, — шуо песянайёс.

Галина Савина

Туспуктӥз Александр Горбунов

Удмурт Дунне
By Удмурт Дунне Июль 1, 2015 12:36
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<