«Ватка палась Ваняос» — мылкыдэз ӝутӥсь эмъюм

Удмурт Дунне
By Удмурт Дунне 23 июня, 2015 13:58

Обложка_полоска.indd«Удмуртия» издательствоын потэм «Ватка палась Ваняос» книгалэн авторез Владимир Михайлов — Россиысь Писательёслэн но Журналистъёслэн огазеяськонъёссылэн ёзчизы, 1987-тӥ арысен со «Удмуртия» кун телерадиокомпаниын радиожурналист луыса ужа.

Ӝыны часъем «Ладилэн азбараз» передачазэ Михайлов арнялы быдэ 10 арлэсь кема нуиз. Ӵапак та радиоверанъёсын чузъяськем серемес веросъёс но кылбурен гожтэм мадёсъёс пыризы «Ватка палась Ваняос» книгае.

Ачиз Владимир Михайлов книгаезлэсь пуштроссэ тазьы усьтэ:

— Удмурт калыклэн чеберлыко шыкысаз вашкала вакытысь туж бадӟым узырлык утиське. Маскара учыръёсыз, пӧртэм дыръёсы кылдытыса, калык весез выллем сузьйиз. Песянай-песятайёсмы, пельысь пеле, ымысь ыме мадьыса-кырӟаса, кыласа-бураса, соосты асьме дорозь вуттӥзы. Ассэ палэнысенгес учкыса, юмоке шедён, янгыше кылён югдуръёсты адями пальпотыса вера.

Вакчи мадёсъёсты автор, кылбур чуръёсы огазеяса, гожтэм но, оглом учкыса, кузьмадёс пӧрмытэм. Агай-вынъёс — Ватка палась Ваняос — ќжытак юмал сямогес возьматэмын но олокыӵе но тумошо учыръёсы шедьыло. Дуннеез котыръяса, я Устюге, я Муское вуыло, я армие кошко, я шунды сиосты кудыен корка пыртыло, я эксэез шу кисален сюдо… Но котьку та агай-вынъёс котырын капчи но шулдыр мылкыд шӧдӥське, соостэк котыр улон но тунсыко ӧй луысал, дыр…

Нош серемес веросъёсаз Владимир Михайлов туннэ улонысь адӟем-кылэм учыръёсты сузьем. Татын син азе яркыт пуксё огшоры адямилэн нуналысь нуналэ сюлмаськонъёсыз, маскара учыръёсысь амало потыны но серемез валаны быгатэмез. Тани, кылсярысь, Кочон Нина, латиноамерикан фильмъёсты яратӥсь нылкышно, гуртысь пудо-животъёсызлы но та фильмъёсысь геройёслэсь нимъёссэс сётъя. Яке Куашкам гуртысь Мокей Лякоп вылӥ кивалтӥсьёслы гожтэт пӧра но серем пыр бышкылэ соосты…

Владимир Михайловлэн «Ватка палась Ваняос» книгаез серекъян-шоккетонэн, югыт пальпотонэн но капчи мылкыдэн тырмытэмын. Со, эмъюм выллем, шуг-секыто улонамы мылкыдэз ӝутыны юрттэ.

Сергей Матвеев,

«Удмуртия» издательствоысь редактор

Удмурт Дунне
By Удмурт Дунне 23 июня, 2015 13:58