Улонысь кошкиз Владимир Алашеев. Тодэ ваёнъёс.

Удмурт Дунне
By Удмурт Дунне 25 июня, 2015 13:55
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
22-26-2

Владимир Алашеев

«УД»

Улонысь кошкемез пумысен «Удмурт дунне» газетлэн редакциез мур куректэмзэ вера Владимир Евсеевич Алашеевлэн  семьяезлы, ӵыжы-выжыосызлы.

Владимир Евсеевич «Советской Удмуртия» газетэн эшъяськиз, Удмурт кун университетын дышетскыкуз, гужемъёсы практиказэ редакциын ортчытъяз. 1977-тӥ арысен Алашеевез газетэ корреспондентэ куто, 1983-тӥ арысен 1990-тӥ арозь со кивалтэ  гурт  удысъя отделэн. Гожъя зарисовкаос, критической корреспонденциос, тодматэ азьмынӥсьёсын, выль ужан амалъёсын. Солэн кичӧлтэмезъя 1980-тӥ аръёсы шаерысьтымы дояркаос пӧлын газет бамъёс пыр радъяськиз ӵошатскон. Партиен но правительствоен пуктэмын вал скаллы быдэ йӧл кысконэз 3 сюрс килограммозь вуттыны. Толэзьлы быдэ дояркаос ивортылӥзы конкурсэ пыриськемзы, газетлэн юрттэт сётэмез сярысь, шараязы ӵошатсконысь тырмымтэосты. Озьы азязы пуктэм ужпумъёсты 1 сюрслэсь ятырез скал кыскисьёс быдэстӥзы.

Та аръёсы ик странаямы вӧлмиз бригадной подряд амалэн ужан. «Советской Удмуртия» газетын ужасьёс, Владимир Алашеевлэн кивалтэмез улсын гуртъёсы потаса, бригада амалэн ужась коллективъёс пӧлын котырес ӝӧкъёс ортчытъязы, отын ӝутэм ужпумъёсты газет бамъёсы вуттылӥзы.

Газетлы 100 ар тырмон юбилеез пусъемен валче туэ 11-тӥ июне потэм номерын  «Советской Удмуртиын» ужамъёслэн тодэ ваёнъёссы сётэмын. Владимир Евсеевич, материалзэ пыртыса, 8-тӥ июне ӵукна ик редакцие вуиз. Командировкае, пе, потӥсько, дыртыса киын гинэ гожтӥ тодэ ваёнме. Гожтэмзэ лыдӟыса ик потӥз. Яралоз ке, печатлалоды, пе.

Тау, Владимир Евсеевич, вазиськемдылы. Изён музъемды небыт медло.

 

OLYMPUS DIGITAL CAMERA

 

Иван ЛЕБЕДЕВ, Удмурт элькунлэн Тӧроезлэн пресс-службаезлэн кивалтӥсезлэн воштӥсез, ӵош ужам эшез :

Пытьыез кемалы кылёз

Кемалась вал со. Кылем дауре. 1983-тӥ арын, диплом басьтыса, ужаны «Советской Удмуртие» куриськи. Тани тынад кивалтӥсед — Владимир Евсеевич Алашеев, шуиз редактор. Гурт удысъя отделын кӧня ке ар ӵоже артэ ужаса, валай: Володя — быгатӥсь воргорон, тужгес но — адямиосын кусып тупатон ласянь. Командировкаосы уртче потаськом вал бере адӟылӥ сое гуртын туж тросэз тодэ шуыса.

Огкыл шедьтылӥз райком секретарьёсын но, предъёсын но, фермаын-бусыын ужасьёсын но. «Тон адямиен кыдёкысен вераськыны кутскы, соиз-таиз сярысь мадиськы, огшоры юан сёт, озьы героед пумен ачиз усьтӥськоз», — дышетылӥз монэ кивалтӥсе.

Володя туж сюлмаське вал эшъёсыз сярысь. Ёросэ соин потӥськод ке, тодӥськод ни: ваньмыз умой луоз, пумиталозы но, машинаез но оскымон азе пуктозы, кӧлон инты но радъялозы.

Трос учыр тодэ лыктэ. Но соос улонысь, кудӥз сярысь шара туж ик уд но вера. Мынам йырам-сюлмам эше ӟечен гинэ тодэ кылёз. Тау тыныд, Евсеич!.. Музъем вылэ кельтэм пытьыед кема возиськоз.


romanov

Геннадий РОМАНОВ, «Удмурт дунне» газетысь корреспондент, ӵош ужам эшез: 

Малпанмы ӧз быдэсмы

Володя Алашеев «Советской Удмуртия» газетэ ужаны лыктӥз Удмурт кун университетэз быдтэмез бере.

Коллектив егит специалистэз умой пумитаз но гурт удысъя отделэ корреспондентэ пуктӥз. Нош собере ми сое волейболъя командаямы пыртӥм.

Володя — Алнаш палъёсысь, солэн Евсей атаез но «Советской Удмуртие» гожъяськыса улӥз. Алашеевен ёросъёсы, гуртъёсы туж ӵем командировкае поталлямы, уката ӵем, валамон, Алнаше но Кез палъёсы. Кезысь Сири гуртын уло вал Володялэн варманай но варатаез.

Владимир Евсеевичен ми газетын ӵош ужам, сое партилэн удмурт обкомаз басьтытозязы. Нош телевидение выжемез бере шумпотыса экранысь передачаоссэ учкылӥ, уката шаерысьтымы дано адямиос сярысь. Со передачаоссэ гань-гань, дыртытэк, зӥбыт мылкыдын ортчытъяз. Улонын но со сыӵе ик вал. Берлозэ ми пумиськылӥм газетлэн 100 ар тырмон юбилеезлы сӥзем ужрадъёсын. Соку ог-огмылы кыл сётӥм выльысь пумиськыны, но малпанмы ӧз быдэсмы…

Удмурт Дунне
By Удмурт Дунне 25 июня, 2015 13:55