Удмурт фильмъёс устоосыз пӧлын

Удмурт Дунне
By Удмурт Дунне 17 июня, 2015 12:25

10-тӥ-13-тӥ инвожое Эстониысь Цийстре гуртын ортчиз вакчи фильмъёсъя 2-тӥез фин-угор фестиваль. Устоосыз пӧлы сюризы Удмуртиысь кино лэсьтӥсьёс.

Эстониысь Вырумаа музъем вылэ люкаськизы пӧртэм фин-угор шаеръёсысь егит кино лэсьтӥсьёс: финъёс, венгръёс, эстонъёс, удмуртъёс, поръёс, хантъёс, мансиос, саамъёс… Фестивале ыстэм киноосын возьматэмын выжы калыкъёслэсь сям-йылолъёсы, фольклорзы, туала улонзы… Фестивале ыстэмын вал 60-лэсь ятыр ужъёс.

Удмуртиысь та ужрадэ пыриськизы Денис Корнилов, Анатолий Добряков, Андрей Першин, Сидоров кузпалъёс, Дмитрий Калягин но Жон-Жон Сандыр. Шумпотымон, тросэз соос дипломъёсын пусъемын.

«Устоез фильм» луиз Ханты-Мансийск автономный округысь Сургутысь Ксения Андреевалэн «Жизнь в тайге» фильмез.

Тужгес устоез режиссёр – Ижысь Денис Корнилов «Анай» киноез понна.

Тужгес устоез оператор – Ижысь Анатолий Добряков «Сны с того берега» фильменыз.

Жюри нимысьтыз пусйиз на Марий Элысь Алёна Ивановалэсь «Кöтрем» («Дурись») видео-очерксэ, Удмуртиысь Сергей но Анастасия Сидоровъёслэсь «Крестьян но Вумурт» мультфильмзэс но Андрей Першинлэсь «Толэзьлэн тусыз», «Курка, ӵӧж но мукетъёсыз» удмурт выжыкыл анимациоссэ.

Фестивальын Венгриысь режиссёр, сценарист Даниэль Эрдели но Эстониысь сценарист Март Кивастик мастер-классъёс сётӥзы. Ужрадлэн берпуметӥ нуналаз возьматэмын вал 1929-тӥ арын Пичи Пурга ёросысь Улын Юри гуртын плёнка вылэ пуктэм «Соперницы» кино.

Вакчи фильмъёсъя фин-угор фестивальысь киноосты Ижын но возьматозы. «Dart» газетлэн кичӧлтэмезъя кино учкон ортчоз 24-тӥ инвожое 18 часын Генерал юртын, бергес — ӟуч субтитръёсын, «Дружба» кинокуаын.

УД

 

Удмурт Дунне
By Удмурт Дунне 17 июня, 2015 12:25