Шулан дыр, Mister Гербер но 1200 литр ӝук

Удмурт Дунне
By Удмурт Дунне Июнь 24, 2015 13:48
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кызьы ортчиз удмуртъёслэн бадӟым шулдыръяськонзы

Кез ёросысь Югурт тамында калыкез ӧз адӟылы на вал: элькун Гербере люкаськизы 15 сюрс пала удмуртъёс но мукет выжы калыкъёс.

Усточиос, баьтыръёс, кенъёс

Гербер ортчон интылэсь кытынзэ возьматӥсь пулъёсъя вуим Югуртэ. Машинаез пуктыны нокытчы — быдэсаз бусыын корт валъёс сыло. Кызьы но озьы султӥм. Машиналэсь ӧссэ усьтӥ гинэ, пельёсам куараос шуккиськизы. Кырӟасез кырӟа, концерт нуисез бусы тыр вераське, крезьгур чузъяське.

SONY DSC

Гербере 15 сюрс пала адями люкаськиз.

Сцена дорозь 20 минут мыныны выри, дыр. Вань азбаръёс 30 гектар музъем вылэ пазьгиськемын. Берло кытчы мынэмме ик ӧй вала ни. Бусы шоры шуккем пул вылысь учкисько: вылӥе тубод — киуж вузан, мастер-класс ортчытъян азбаръёсы вуод, шонер мынод — батыръёслэсь нюръяськонзэс адӟод, улӥе васькод — эктыны дышетскод, сиёд-юод, мышлань чигнад ке, бадӟым концерт адӟод. Валамон. Гербер — удмуртъёслэн культураенызы тодматскон фестиваль кадь.

— «Шулдыр шулан  дыр» азбаре дыртэ! — ялэ ныл куара. Таиз тунсыко. Пичи сцена вылын трос пӧртэм удмурт шуланъёс чузъясько. Угось Кез ёросын али но узьыгумыен но мукет шуланъёсын шудо на. Кызьы аслаз ужаз гожтэ тодосчи И. Пчеловодова, 2004-тӥ арын Кез ёросын фольклор экспедиция тодматскиз узьыгумыен шудӥсь Евгений Худяковен. Со 1937-тӥ арын вордӥськемын. Гумыез туж аспӧртэмлыко лэсьтэмын, кузьдалаез 49 сантиметр.  Та паймымон крезьгуро инструментэн но чипчирганэн тодматӥз «Чипчирган» ансамбльлэн кивалтӥсез Ирина Пчеловодова, сюйлэсь лэсьтэм шуланъёсын шудӥз «Мугур» студиысь ӧнерчи Павел Дубовцев. Та выллем концерт Герберын нырысьсэ ортчиз. Сцена вӧзын ик Кез ёросысь киужъёсъя юртысь Вера Касимова кызьпу туйлэсь шулан лэсьтыны дышетэ. Мон но вӧзаз пукси, аслым пичи шулан лэсьтӥ но мукет азбаръёстӥ поръяны кошки.

SONY DSC

Пӧртэм ёросъёсысь воргоронъёс кужымзэс мертало.

Улӥе васькыса, вуи батыръёс доры. Пӧртэм ёросъёсысь воргоронъёс кужымзэс мертало: гира ӝуткало, машина питранэз куяло, коръёсты нулло. «Это испытание на время, батыри!», — вожвылъяськонэз малы ке ӟуч кылын нуо. Казакпиос понна висисьёс кесясько: «Ӝоггес, ӝоггес!».  Мон нош эктыны ӝоггес кошко ай шуыса, мукет сцена доры кошки.

Татын «Эктон корка» студия вань мылкыд карисьёсты пӧртэм удмурт эктонъёслы дышетэ. Тыпыртонлы гинэ уг, кадрильлы но, марлы но.

Берлогес та сцена вылын «Выль кен» вожвылъяськон радъямын вал. Пӧртэм ёросъёсысь командаос возьматӥзы кенэз куран сям-йылолъёсты. Одӥгъёсыз кензылэсь ужамзэ эскеризы, мукетъёсыз пирданэнызы ушъяськизы…

SONY DSC

Шаркан ёросысь Быгы гуртысь усточиос дэремъёссэс возьмато.

Бадӟым сцена вылын быдэс Гербер ӵоже мынӥз концерт. Огез бӧрсьы мукетыз  кырӟазы-эктӥзы гуртъёсысь ансамбльёс, дано артистъёс, мода возьматӥзы ёросъёсысь кибашлыослэн центръёссы.

Радъясьёс верало, ми Гербере ог 5 сюрс адямиосты гинэ возьмаськом вал, нош вуизы 3 поллы тросгес! Удмуртилэн вань ёросъёсысьтыз  сяна, лыктӥзы Ханты-Мансийск автономной округысь, Башкортостанысь, Татарстанысь, Свердловск, Пермь улосвылъёсысь. Вуизы Москваысь, Санкт-Петербургысь но. Оглом 43 делегация. Медаз ыше шуыса, соос борды Кезысь юрттӥськисьёс юнматэмын вал.

 

Малпанъёсты быдэсъясь выжы

Туэ Герберлэн валтӥсь тодметъёсыз — писпу выжы но Кам шур.  Кытчы гинэ эн учкы — котькытын музъеме йыринь-чукинь месэм писпуос, нош бусы шорысь ик потэ ошмес. Кезысен уго аслэсьтыз сюрессэ мытэ быдӟым Кам. Вашкала дауръёсы, пе, Кам батыр улэм. Соку удмуртъёс туж курадӟиллям: куазь кӧс улэм. Кужмо Кам батыр писпуэз выжыеныз ишкалтэм но музъемез ӵабъяны кутскем. Вӧсь луэм музъемлы, пазьгиськыса ик синкылиосыз потӥллям но, шурлы пӧрмыса, нюкъёс, гопъёс кузя жильырӥллям. Батырлэсь нимзэ ик сётӥллям кылдэм шурлы но.

SONY DSC

Туэ Герберлэн валтӥсь тодметъёсыз — писпу выжы но Кам шур.

Озьы ик кезъёс оско, писпу выжы борды йӧтскид ке, льӧль малпанэд соку ик быдэсмоз шуыса. Ӵапак одӥгез сыӵе выжы котырын трос калык люкаськем. Чиганпиос гинэ но оло валаса, оло шудыса кема бергазы малпанъёсты быдэсъясь выжы котыртӥ. Соос шоры учконъям, син азям тӧдьы футболкаен воргорон йӧтӥз. Дэремаз «Мister Гербер» гожтэмын.

Петыркарысь Пётр Шилов.

— Футболкады  тузӥ, — вазьытэк ӧй чида.

Татысь басьтӥ, шуэ. Герберын туж кельше, пе. Ачиз со, юромо отпуске потыса, Санкт-Петербургысь татчы апаез доры вуэм.

— Питерын 30 арлэсь ятыргес улӥсько ни. Али уйпал шоркарын удмуртъёслэн огазеяськонзы улӟе: пумиськонъёс но кенешъёс ортчыло, — шумпотэмзэ уг ваты Пётр Шилов.

Шунды аслэсьтыз сиоссэ ӧз жаля. Ӧз жаля аслэсьтыз  кузьымъёссэ элькунмы но. Вавож ёросысь Вадим Зарецкихлы, кудӥз вуоно арын Англиын гырисьёс куспын вожвылъяськонын Россилэсь данзэ утёз, кузьмазы ӵыж-выль трактор. Табере вожвылъяськонлы пыр-поч дасяськоз ни. Шулдыръяськонын та валтӥсез, дыр. Угось геры ӧй луысал ке, ортчысал меда Гербер!

Нош кызьы вӧсям ӝуктэк! 15 сюрс адямилы со тырмиз меда, юалоды тӥ. Пӧрасьёс дэмен шуо: «Тырмиз!». Бертыны потыкум, шур дурын губиос кадь сыло вал  бекыртэм пуртыос. Соос 20 вылӥллям, котькудӥз 60 литръем. Лыдъялэ — 1200 литр ӝук! Со сяна, куноосты утялтӥзы на турын чаен, окрошкаен, чорыг лымен. Майбыр.

Адямиос чидатэк возьмало ни вуоно арез. Кез ёрослэн йырыз Пётр Князев Герберлэсь синпельзэ, Кылдысинэз, сётӥз Сюмси ёрослэн кивалтӥсез Владимир Семёновы. Вуоно Гербер ортчоз отын.

Мария Векшина

 

 

 

 

 

Удмурт Дунне
By Удмурт Дунне Июнь 24, 2015 13:48
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<