Школаосын азьланяз дышетозы на-а удмурт кылэз?

Удмурт Дунне
By Удмурт Дунне 2 июня, 2015 13:48
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Нырысь вал Кыл, табере -Кат!

6-29-1

Удмурт кылъя учебникъёс ӟечесь, но законлы уг тупало?

Выжы калыкъёслэсь кылъёссэс утён сярысь вераськизы кылем арняе Кремльын. Путин пыриськиз Калык кусыпъёсъя но Ӟуч кылъя советъёслэн кенешазы. Ваньмыз сак кылзо, ас малпанзэс верало, шонерен лыдъяло, но улонын пӧрме мукет сямен.

«Исключительной» ӝук

Та кенешъёс кыкез ик ужало Президент бордын. Со туж шонер, лыдъяло политикъёс, угось Россиын 200-лэсь трос выжы калыкъёс уло, нош вераськон кылъёс солэсь но тросгес, со дыре ик таосыз но чуто, ӟучез но уг азинскы.
Путин пусйиз: Россиын кыл политика пыкъяське Конституцилэн нормаосыз, озьы ик Россиысь калыкъёслэн кылъёссы но кун кылъёс сярысь законъёс вылэ.

Номыр вылез ӧвӧл, озьы-а? Конституция кутэмын 1993-тӥ арын, Удмуртилэн Конституциез — одӥг арлы гинэ бергес, сояз но, таяз но правоосмы тӧдьы вылтӥ сьӧдэн гожтэмын. Мар сярысь вераськонэз кадь? Вылаз ик, 2012-тӥ арын Россилэн Президентэз 602 номеро указаз пыр-поч вераз ни, калык кусыпъёсты ӟечомытоно шуыса. Кутэмын 2020-тӥ арозь Национальной политикая стратегия. Зэм, уж вылын со озьы уг пӧрмы. Уг тодӥськы, марлэсь кышкало эскерись ёзъёс, но мыным потэ, соос, федерал чиновникъёс луыса вылысь но, тужгес бадӟым кивалтӥсьмес уг кылыло-адӟыло. Законъёс сярысь веранэз ӧвӧл ни.

Тулыс монэ гинэ ӧвӧл, лыдӟисьёсмес но, удмурт азьветлӥсьёсты но онгро-мытӥз Роскомнадзорлэн «Удмурт дунне» газетэз «укыр удмурт луэмысьтыз» пыкылонэз. Вераськон мынэ удмурт газетын рекламаез одно 2 кылын печатлан сярысь. Ог-огмылэсь 2 толэзь ӵоже лулсэръёсмес коскатэммы бере административной уж… ӝутымтэ! Малы? Озьыен, газет но, редактор но янгыш ӧвӧл? Та йыртэман (правонарушение) понна уж уг ӝутӥськы, пе… Соку малы ӝук суралтонэз вал?!

Асьсэлы ватсаса плюс пуктон вылысь яке удмуртлы интызэ возьматэмзы потэмысь? Ну, ми тыршим кадь валэктыны, ми ас интыямы но милям ваньмыз интыяз шуыса. Озьы туннэ нуналлы юан пытсаськиз кадь, но ужпум сэрттымтэ-пертчымтэ! Кун Кенешысь депутатъёс паймо: кызьы-озьы, пе, милям вань Конституцимы! Но федерал чиновникъёс ласянь Удмуртилэсь Конституцизэ гажамзэс мон чик ӧй шӧды, соос чӧлско федерал законъёс вылэ гинэ. Нокин но уг пумитъяськы, ми соосты гажаськом. Но школаын дышетскись пинал но тодэ: кунысьтымы валтӥсь закон луэ Конституция!

Бен, луыло пӧртэм учыръёс. Татын нош ик кылзэ, мар шуиз Путин: кыл ласянь политикаез кылдытонын но быдэсъянын уг яра ведомствоослэсь но удысъёслэсь гинэ мылкыдзэс лыдэ басьтыны («Недопустим ведомственный, отраслевой подход к формированию и реализации языковой политики»). Со пусйиз: кыл ласянь политикаын кулэ ваньмызлы тупась модель кылдытыны, приоритетъёсты висъяны, калыклэсь (граждан обществолэсь), улосъёслэсь тунсыкъёссэс лыдэ басьтыны. Та пумысен кылзэс вераны кулэ кунысьтымы вань калыкъёс!

Нош ми та дырозь кытчы но ӧм вазиськылэ, ваньмыз юромо синзэс кынё кадь: кылдэ ӧз юалэ ук, мар кулэ на? Азьвылгес гожъялляй ни Москваысь валэктон куреме сярысь. Отын нырысь укыр паймизы но… кунсьӧр кылъёсты «исключительной учыръёсы» уже кутон сярысь валэктон ыстӥзы. Паймыса жингыртӥ. Югдурез пыр-почгес валэктон вылысь, комиссилэсь решенизэ ватсаса, выльысь юан келям. Чидатэк возьмам, пыр-поч валэктон басьтом ни шуыса. Но та рад валэктӥзы эшшо вакчигес: решение ке уг кельшы, вазиськелэ судэ!

Но мынам потэ ик вылэм «Россия Федерациысь кун кылъёс сярысь» законъя Юстицияя министерстволэсь пыр-поч валэктонзэ адӟеме.

Кин уг вала — не поймёт…

Милям «уженымы» огвакытэгес ик жингыртӥзы Дышетӥсьёслэсь тодон-валанзэс будэтонъя институтысь специалистъёс: юрттэ, пе, удмурт кылъя ды-шетӥсьёсмылы! Кивал-тӥсьёс тышкасько, программаоссэс одно ӟуч кылэ берыктыны косыса, ды-шетӥсьёслэн мылкыдзы копак куашкамын, мар карыны уг валало…

Жингыртӥськом ныры-сетӥ верам адресъя — Шаркан ёросысь Карсашур школае. Удмурт кыллы дышетэ Ольга Захарова. Школаын кемалась ужа ни. Со паймемын, Прокуратураысь проверка бере ваньзэ программаоссэ ӝегатскытэк ӟуч кылэ берыктыны косӥллям. Кыӵе муген? Эскерисьёс верамъя, ваньмыз мед тодозы, малы дышето удмурт кылъя но литературая урокъёсын. Сотэк, пе, шымыртӥськоды удмурт кылэз тодӥсьтэм анай-атайёслэсь правооссэс.

— Ӟуч семьяослэн пиналъёссы ветло-а бен урокъёсады? — юасько.
— Одӥг но сыӵе анай-атайёсы ӧвӧл…
— Нош удмурт анай-атайёс пӧлысь ужатозяды кӧняез дышетон программадэс, журналдэс учкылӥз-эскерылӥз?
— Огез но ӧз…
Директор Вера Митюшкина эскерисьёслэн пыкылонэнызы соглаш.
— Бен, янгыш ужаськеммы, табере кызьы шуизы, озьы ик лэсьтом, — кӧсыт вераз со телефон пыр.
Паймыса юан келямы элькунысьтымы Прокуратурае. Отысь таӵе валэктон вуиз:

…2015-тӥ арын Россия Федерациысь Генеральной Прокуратуралэн косэмезъя Кияса но Шаркан ёросъёсысь Прокуратураос эскеризы дышетон сярысь законодательстволэсь, со пӧлын — Россия Федерациысь гражданъёслэн кун кылын образование басьтыны правозылэсь, быдэсъяськемзэ.

Эскерон дыръя Шаркан ёросысь прокурор шараяз «Об образовании в Российской Федерации» федеральной законысь (№ 273-ФЗ) 14-тӥ статьязэ тӥян учырез: Шаркан ёросысь Карсашур школаын «Удмурт кыл» но «Удмурт литература» дышетон дисциплинаосъя программаос юнматэмын удмурт кылын гинэ — со луонлык уг сёты удмурт кылэз тодӥсьтэм нылпиослы, соослэн анай-атайёссылы программалэн пуштросэныз тодматскыны.

Карсашур школалэн уставаз гожтэмын, татын дышетон ӟуч кылын нуиське шуыса. Озьыен, пиналъёсты дышетон, документациез нуон (со пӧлы пыро ужан программаос но) нуиськыны кулэ ӟуч кылын.

Та учыръёсъя прокурор Шаркан ёросысь дышетонъя управление представление гожтӥз — соя выль дышетскон арлы удмурт кылъя но удмурт литературая предметъёсъя дышетон программаос куронъёсъя тупатэмын луыны кулэ.
Прокурорлэн актэз законъя лэсьтэмын — со чакламын гражданъёслэсь дышетон удысын но кылэз кутонын правооссэс дискриминацилэсь утён вылысь».

Кӧня сылэ «Удмурт кыл»

Туннэ школаослэн (учреждениослэн) уставъёсазы шуэмын: дышетон нуиське ӟуч кылын. Умой луысал гожтыны: дышетон нуиське ӟуч но удмурт кылъёсын. Но удмуртсэ пыртӥзы ке — нош ик сьӧлыкалозы, малы ке шуоно со ужпумез быдэсъяны уз быгатэ. Ну ӧвӧл луонлыкъёс пиналъёсты анай кылынызы дышетыны, угось озьы ке, вань предметъёс (математика но, химия но) анай кылын нуиськыны кулэ. Соин «Удмурт кыл» луыны быгатэ предмет сямен гинэ — арняяз одӥг-кык час. Зэмзэ вераса, химиез удмурт кылын сётымтэысь, туннэ нокин уг бӧрды, вылды, но вот ӝоген удмурт кылъя урокъёс гур азе берытскыны быгатозы — соиз зэм. Угось та проверка бере шарае потӥз мукетыз но. «Удмурт кыл», «Удмурт литература» но мукет национальной кылъёсъя учебникъёс пиналъёсмес анай кыллы дышетыны уг тупало, шуыны луоз. Малы ке шуоно соос ӧвӧл пыремын федерал перечене. Валамон, со уг вера, асьме учебникъёс уродэсь шуыса, но законъя соосъя дышетыны уг яра, угось федерал экспертиза пыр потымтэ. Нялтас вераса, Россиысь школаосын дышето 59 выжы калыкъёслэсь кылзэс. Соос пӧлысь перечене пыремын куинез гинэ: бигер, хакас, якут. Ку отчы шедёзы мукетъёс, верась ӧвӧл, угось перечене шедён понна кытысь ке миллионъёс шедьтоно — шорлыдын 10 учебниклы 2 миллион манет. Нош туала учебник вӧзы одно кулэ на методикая пособие но электрон учебник!
Но валамон ук, со понна йырыз висьыны кулэ ӧвӧл удмурт кылъя дышетӥсьлэн, директорлэн. Валамон ук, туала кризис вакытэ, куке шатыр каре экономика, вань мукет висьытӥсьгес ужпумъёс!

Кыӵе дышетӥсьлэн, директорлэн таӵе учыръёс бӧрсьы анай кыл понна йырзэ висьытэмез потоз? Солы лякытгес куштӥськыны, эсьма, бушам урокъёсты ЕГЭ-лы дасяськыны кутыны.

* * *

Кремльын кенешонын бадӟым саклык висъяськиз ӟуч кылэз утёнлы, азинтонлы но. Валамон, ми котьку данъяськиськом соин, ӟуч кылтэк туннэ асьмеос палэсмуртъёс кадь луысалмы. Но со дыре ик Россиысь культура понна дуно луо кунысьтымы вань калыкъёслэн кылъёссы, пусъемын вал отын. «…Ми тодӥськом, кытчы вуттэ куд-ог кунъёсын этносъёслэсь анай кылзэс шымыртон, палэнтон, общество люкиське «полноценной» но «неполноценной» муртъёслы, керетонэ-кайгуэ вуттэ. Выжы калыкъёслэсь кылзэс утён сярысь Россиын кадь нокытын ноку ӧз сюлмаськылэ», — пусйиз Владимир Путин. Ватсаны номыр…

Зинаида Рябинина

Удмурт Дунне
By Удмурт Дунне 2 июня, 2015 13:48