Максим Вылегжанин Ижын зарядка ортчытӥз

Удмурт Дунне
By Удмурт Дунне 18 июня, 2015 13:03
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Максим возьматӥз, кызьы дӥсяськыку гинэ но луэ зарядка лэсьтыны.

Сочиысь Олимпиадаын 2-тӥ инты басьтэм куасэн бызьылӥсь, дуннелэн чемпионэз Максим Вылегжанин Ижын улӥсьёслы туннэ зарядка ортчытӥз. Киров нимо парке трос егитъёс люкаськизы.

— Валес вылысь султӥськод, кыстӥськиськод — нунал кутскиз, — таӵе кылъёсын Максим Вылегжанин зарядказэ мытӥз. — Собере дӥсяськиськом но потӥськом ульчае. Бызиськом, бускельмылы киынымы шонаськом, сюрес вылысь комокъёс вылтӥ тэтчаськом, тубатэтӥ тубиськом…

Номыр шугез ӧвӧл. Максим возьматӥз, кызьы дӥсяськыку гинэ но луэ зарядка лэсьтыны. Озьыен, мугордэ сайкатыны но мылкыддэ ӝутыны. Вань люкаськемъёс Максим сьӧры шумпотыса тэтчазы, киынызы-пыдынызы шоназы. Нош зарядка бырем бере чемпионэз котыртӥзы: кинлы автограф кулэ, кинлэн дано спортсменэн туспуксемез потэ.

— Спортлы сӥзем ужрадъёс Ижын йыло, шумпотымон, великен ворттылон сюресъёс лэсьтылыны кутскизы шуыса, — вера Максим Вылегжанин. — Туннэ кадь ужрадъёс бере адямиослэн спортэн вырыны мылкыдзы ӝутске. Со умой.

Та зарядкаен Ижын «Егитъёслэн нуналзы» фестиваль усьтӥськиз. Валтӥсь ужрадъёс ортчозы 24-тӥ инвожоысен- 29-тӥ инвожоозь пӧртэм интыосын: Шор площадьын, Киров но Горький нимо паркъёсын, Эшъяськон монумент вӧзын, Арсенал азьын.

DSC_0037

«Егитъёслэн нуналзы» фестиваль дыръя Киров нимо паркын тросэз ужрадъёс спортлы сӥземын луозы.

Киров нимо паркын тросэз ужрадъёс спортлы сӥземын луозы. 27-тӥ инвожое, кылсярысь, быдэс нунал фитнес-фестиваль мыноз. Мылкыд карисьёс быгатозы йогаен, гимнастикаен вырыны, шонер сиськон сярысь но мугордэ кыдатон сярысь тросгес тодыны. Мукет нуналаз семьяос куспын эстафета радъяськоз. 29-тӥ инвожое латин эктонъёсъя мастер-класс но кизилиен ӵош зарядка ортчозы.

«УД»

Туспуктӥз Мария Векшина

Удмурт Дунне
By Удмурт Дунне 18 июня, 2015 13:03