М. Коноваловлэсь фамилизэ нуллӥсь ӧвӧл. Писательлэн вордӥськем дырысеныз тырмиз 110 ар.

Удмурт Дунне
By Удмурт Дунне 23 июня, 2015 13:52
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Татьяна Иванова,

Можга педколледжысь дышетӥсь

коновалов

Писатель М. Коновалов

5-тӥ июне Михаил Коновалов писательлы вордӥськемез дырысен тырмиз 110 ар. Юбилейлы сӥзьыса, нокыӵе бадӟым ужрад ӧз ортчы. Но Михаил Коновалов сюлэмъёсамы туннэ ке но улэ. Можга ёросысь вордскем Акаршур гуртысьтыз синпелетэз дорысь сяська керттэт уг бырылы.

Революцилы пумит, пе

Михаил Алексеевич куанер семьяысь потэмын. Анаез но атаез пыр муртъёс вылэ ужаллязы. Выныз сярысь Екатерина апаез вералля вал:

— Начальной школаын ми асьме гуртын дышетским. Милемыз дышетӥз Елабугаысь пономарьлэн нылыз Юлия Васильевна Казаринова. Со аслаз шӧртчи сямыныз, лэся, дышетскисьёсызлы литератураез яратон мылкыд пыӵатыны быгатӥз. Урокъёс бырем бере ӵем лыдӟылӥз художественной произведениос. Мишалы кельшо вал Т. Шевченколэн кылбуръёсыз. Школаысь библиотека узыр ӧй вал. Соин ик Миша огпол гинэ ӧз лыдӟылы «Тарас Бульба», «Робинзон Крузо», «Хижина дяди Тома» книгаосты.

Апаеныз ӵош 1918-тӥ арын Миша Елабугаысь учительской семинарие дышетскыны мынэ. Но соослы отын кема визь люканы уг кылды. Колчаклэн армиез Кам тапала выжемен сэрен семинария ужамысь дугдэ, дышетскисьёс доразы бертоно луо.

1920-тӥ арын февраль толэзе Сарапулын удмурт дышетӥсьёсты дасян курсъёс усьтӥськизы. Миша татчы нырысетӥ дышетскисьёс пӧлы шеде. 1921-тӥ арын курсъёсты Ижевске выжто но педтехникум кылдыто. Собере Ижысь но Можгаысь педтехникумъёсты огазеяло. Озьы М. Коновалов йылпумъя Можга педтехникумез.

1926-тӥ арын М. Коновалов Можга городын удмурт школа кылдытэ но отын ужаны кутске. Берлогес Кибъяысь но Учаысь школаосын дышетэ.

1931-тӥ арын ноябре «Удмурт коммуна» газетлэн редакцияз ужаны кутске.

1932-тӥ арын Удмуртиысь писательёслэн оргкомитетсы кылдэ, М. Коновалов солэн председателез луэ.

1934-тӥ арын Кедра Митреен но Григорий Медведевен ӵош советской писательёслэн нырысетӥ всесоюзной съездазы ветлэ. Татысен А. Горький доры приёме вуылэ.

1935-тӥ-1937-тӥ аръёсы Юкаменскысь районной газетлэн редакцияз ужаз.

1937-тӥ арын февраль толэзе сое арестовать каро, контрреволюционной организация кылдытэм шуыса.

Михаил Коноваловез пытсан сярысь постановлениез УАССР-ысь НКВД-лэн наркомез но республикалэн Прокурорез 1937-тӥ арын 15-тӥ феврале юнматӥзы. 4 нунал ортчыса, писателез четлыке донгизы. 28-тӥ мае 3403 номеро уголовной уж мытэмын. Нимыз: «Коноваловлэн контрреволюционной группаез». 16-тӥ июле со йылпумъямын, 26-тӥ июле янгыше уськытон документ гожтэмын. 1937-тӥ арын 22-тӥ сентябре М. Коноваловез 5 арлы лагере келян понна документ гожтэмын.

1938-тӥ арын 9-тӥ мае Кемерово улосвылын М. Коновалов бырыны шеде. Солы вал 33 арес.

1956-тӥ арын реабилитировать каремын.

«Вурысо бам» но «Гаян»

1932-тӥ арын М. Коноваловлэн «Пролетар кылбурет удысын» журналын «Лизӥ» веросэз потӥз.

1933-тӥ арын «Вурысо бам» романэз нимаз книгаен печатласькиз. Михаил Алексеевич гожтэ: «Вурысо бамез» мон одӥг ар гожъяй. Трос дыръя кык-куинь толэзьёс ӵоже ак но бак но гожтылыны ӧй быгатылы. Со творческой сылон-утчан, эскерон вакыт вал. Со сярысь мон трос эшъёсын вераськылӥ, тужгес но шуг-секытъёс сюрылӥзы положительной типъёс бордын ужан дыръя. Мон соку валай: асьмеос та дырозь ударникез, большевикез, выль кылдӥсь муртэз, солэсь мылкыдзэ, кужымзэ ум валаське на».

1936-тӥ арын «Гаян» романэз лыдӟисьёс доры вуэ. Таиз ужез пумысен критик А. Ермолаев тазьы шуэ: «Пугачёвлэн трос отрядъёсыз пӧлысь одӥгез удмурт отряд вылэм. Писатель вера, исторической материалъёсъя, пе, тодмо удмурт отрядэн Водзимонье гуртысь Туймат кивалтэм. Туйматлы Гаян ним сётыса, автор сое романэзлы главной герой каре. Огъя вераса, «Гаян» удмуртъёслэсь Пугачёвлэн отрядаз нюръяськемзэс шонер возьматэ. Та роман — нырысетӥез документальной материалъёсъя гожтэм удмурт историко-литературной произведение».

Ачиз Михаил Алексеевич «Гаян» бордын ужан вакытэз сярысь тазьы гожтыса кельтӥз: лумбыт ужаськод но ӝыт выльысь 1770-тӥ аръёсы тэтчоно. Нош туннала впечатление зӥбе… Вӧзам ик Жанна (пичи нылыз) «дивизия, перёд» шуыса кырӟа. Урамын малпаськиськод Пугачёв сярысь, нош вӧзтӥ ик ортче автомобиль, автобус яке пионеръёс кошко.

кон

А. Устюжанина (шорысез) Жанна нылыныз но правнукеныз.

Коновалова луиз Устюжанина

Михаиллэн кузпалыз Анисия Андреевна Устюжанина вордӥськемын Алнаш ёросысь Елкибаево гуртын ӟуч бадӟым куанер семьяын. Дышетскемын Можгалась педтехникумын. Мишаен тодматско татын. Вордӥське Жанна нылзы. Анисия Андреевна Удмурт пединститутын вылӥ образование басьтэ, улонзэ герӟа дышетӥсьлэн уженыз, ӟуч кылъя но литературая урокъёс нуэ. Но «калык тушмонлэн» кузпалыз трос шуг-секытъёсты адӟоно луиз. Соин но улон интызэ ялан вошъяз. Ужаз Можга городысь 1 номеро школаын, педучилищеын, Елабугаысь но Глазовысь школаосын. Туж секыт дыръёсы но кизэ ӧз лэзьы, котьку но котькытын туж тыршыса ужаз. Бӧрысь кивалтӥсьёс солэсь ужзэ дунъязы. Анисия Андреевна УАССР-ысь сиё-дано дышетӥсь, дышетон удысысь отличник луиз. Пенсие потыса, улӥз Можгалан Жанна нылыз дорын.

Мон шумпотӥсько, Анисия Андреевнаен ас вакытаз тодматски, вераськи, куд-ог юанъёсылы валэктон шедьтӥ шуыса. Михаил Алексеевичез со котьку шунытэн тодаз вайылӥз. Коновалов кузпалзэ поселение но улыны ӧте вылэм. Анисия Андреевна мыныса вуттымтэ — писателез быдто. Туспуктэмен ыстэм гожтэтэз гинэ но нылкышнолы берытске, фотокарточка вылын мурт киын гожтэмын: «Папа пожелал долго жить».

Михаил Алексеевичлэн Жанна Баранова нылыз улэ Можга городын. Тазалыкез ляб ни. Но со туннэ ке но бадӟым тау каре атаезлэн апаезлы: Екатерина ас вакытаз Жанналы Коновалова фамилизэ Устюжанина карыны юрттӥз. Фамилиме воштон луонлык сётӥз дышетскыны, тодаз вае Жанна Михайловна. Екатерина Алексеевна ик визьмо племянницазэ куриз вылӥ образование басьтыны шаермылэн палэназ. Озьы Жанна Ленинградысь Герцен нимо пединститутын дышетскиз. Дышетӥсьлэсь дипломзэ басьтыса, Жанна Михайловна Можгала ужаны вуэ: нырысь нылпи юртэ, собере Можга педучилищее. Татын со ужа 30 ар. Дышетэ студентъёсты педагогика но психология предметъёсъя. Россиысь сӥё-дано дышетӥсь, дышетон удысысь отличник луиз. Кузпалыныз ӵош ныл но пи будэтӥз. Соосызлэн быдэн 2 пиоссы. Дано выжызэс огзы но уг вунэто. Кыӵе гинэ ужрад уд ортчытӥськы, соос котьку пӧламы. Писательлэн 95 ар тырмонэзлы Акаршурын синпелет пуктӥзы. 100 ар тырмонэзлы радъямы бадӟым конференция. Али но педколледжын бадӟым уж нуиське, Коноваловлэн нимыз вужере медаз кыльы шуыса. Синпелетсэ утялтон но со доры сяська керттэт понон сяме пыӵаз ни.

Удмурт Дунне
By Удмурт Дунне 23 июня, 2015 13:52
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<