Литератураын выль нимъёс: «Кышет», «Лудӵӧж» но «Ӟечбур, выжыкыл!»

Удмурт Дунне
By Удмурт Дунне Июнь 3, 2015 11:54
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
22-22-3

Е. Сараматова, Л. Малых, Г. Савина

«Удмурт дунне» газет 100 ар тырмонэныз валче улонэ пыӵатэ «Газетлы кузьым — книга» проектсэ. Солы луыса югыт дуннеез адӟизы журналистъёсмылэн Лия Малыхлэн «Ӟечбур, выжыкыл!», Галина Савиналэн «Кышет» но Елена Сараматовалэн «Лудӵӧж» книгаоссы.

— «Газетлы кузьым — книга» проект улсын потэм книгаос — со журналистъёслэн газетмес 100 ар тырмонэныз аспӧртэмлыко ӟечкыланзы, — вера «Удмурт дунне» газетлэн валтӥсь редакторез Зинаида Рябинина. — «Советской Удмуртиын» ас вакытаз трос писательёс кыдазы, али но газетын писательёсты дурись кебит ужаны кулэ. «Газетлы кузьым — книга» проект кылдытэ «Удмурт дуннелэсь» библиотеказэ.

Али «Удмурт дуннелэн» библиотекаезлэн ӝажыосыз вылэ вуизы 3 ӵыж-выль книгаос. Соосын тодматскон љыт валлян ортчиз Ижысь Генерал юртын.

Лия Малых презентацие Вероника нуныкаеныз лыктӥз. Угось «Ӟечбур, выжыкыл!» книгазэ со Никаен ӵош гожтӥз.
— Книга кылдӥз Никаен вераськонъёсысьтымы, ӵошен шудонысьтымы, — вера Лия Яковлевна. — Паймисько, макем со визьмо малпаське. Одӥг пол садикысь бертӥськом, кырӟась тылобурдоосты адӟыса, Ника шуэ: «Учкы ай, тылобурдоос крезьгуро вайёс вылын пуко», сыӵе верамъёсысьтыз ик гожъямъёсы вордскизы.

Али Ника будэ ни, соин ӵош, кызьы вера Лия Малых, будэ ачиз но. Азьланяз соос нунокеныз бадӟымгес нылпиослы сӥзем книга поттыны малпало. Аслэсьтыз потон дырзэ возьма «Моко но Боко» бичетэз но.

Галина Савиналэн веросъёсысьтыз геройёс, учыръёс — ваньмыз зэмос улонысь басьтэмын. Одӥг чурез но юромо малпамын ӧвӧл, шуэ автор.

Л. Малыхлэн «Ӟечбур, выжыкыл» бичетэзъя пуктэм инсценировка.

— Мон верос гожтон сярысь малпанме, нуныез кадь, 9 толэзь нуллӥсько-нуллӥсько но, дырыз вуэ ке, поттӥсько, — вера Галина Савина. — Сюлме усись учыръёс улонын трос. Али веросъёсы оглом 30 пала люкаськемын ни.

Мукетыз автормы Елена Сараматова, верос гожъякуз, шутэтскисько, шуэ. Журналистика ужын угось весь бызьылоно, материал утчаса, лэчыт ужпумъёсты ӝутоно луэ, нош лул-сюлэмысь мылкыдъёсты кисьтыны луонлык сётэ верос гожтон.
— Геройёсыным ӵош мон бӧрдӥсько но, шумпотӥсько но, — вера егит автор. — Кызьы зор инкуазез миськыса кельтэ но, собере шоканы ик капчигес луэ, озьы ик мон но веросъёсме гожтэме бере чылкытасько.

Елена Сараматова вань веросъёсыз пӧлысь висъяз тужгес но пичизэ, книгаез но соя нимамын — «Лудӵӧж». Лыдӟисьёслэн юанзы кылдӥз, малы?

— Школаысь бертыкум, мон пилиськем йӧ вылысь бадӟым лудӵӧжез адӟи. Сое пӧйшурасьёс ыбиллям. Сӧ-сырмем тылобурдоез бадӟым куакаос кокчало. Мон, йӧ улэ кошкемелэсь кышкатэк, улляй куакаосты но, лудӵӧжез куртка улам ватыса, гуртам бертӥ. «Улэп на-а ӵӧжед?» — исаса кадь юазы мынэсьтым гуртын. Учкисько но… кулэм. Ас поннам малпай ини: ыбыса со лобӟыны ӧз быгаты, нош али солэн лулыз вылӥе лобӟиз. Озьы ке но ӵӧжен пӧзьтэм шыдэз мон сиыны ӧй быгаты.

Зэм но, та вакчи верос Елена Сараматовалэн быдэс творчествоез сярысь вера: лирической герой — котькин но котьмар понна сюлмаськись, малпанъёссэ пушказ возись быдэ вуымтэ нылмурт.

Котькудӥз автор — аспӧртэмлыко, тае пусйиз «Удмуртия» издательствоысь чеберлыко литература ёзысь редактор Сергей Матвеев но.

— Котькуд авторлы нимаз презентация лэсьтоно вал, — шуэ со. — Пичи-а со, бадӟым-а, но котькуд потэм книга — со литература ни. «Удмурт дунне» газет кулэ проектэз улонэ пыӵатэ.

«Газетлы кузьым — книга» проект азьланьтӥське. Али асьсэлэсь черодзэс возьмало на мукет книгаос. Соос пӧлын Е. Миннигараевалэн, Г. Захаровалэн, Л. Тихоновалэн, М. Векшиналэн книгаоссы, толон редакцие вуиз Л. Кривошеевлэн мадёсъёсын рукописез. Котькуд гожъяськись быгатэ вазиськыны редакцие: газетын ужасьёс радъялозы, эскерозы но книгазэ поттозы.

Мария Векшина

Туспуктӥз Денис Корнилов

Удмурт Дунне
By Удмурт Дунне Июнь 3, 2015 11:54
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<