Кызьы пӧрмоно выпускное?

Удмурт Дунне
By Удмурт Дунне 23 июня, 2015 07:45
22-19-1

Туэ шаерамы школаез йылпумъязы 6 сюрслэсь ятыр пиналъёс. Та пӧлысь ӝыныез — нылъёс.

Кыӵе дэрем тупа «толлы» но «гужемлы»

Туэ шаерамы школаез йылпумъязы 6 сюрслэсь ятыр пиналъёс. Та пӧлысь ӝыныез — нылъёс. Дыдыослэн али туж пӧсь вакытсы. ЕГЭ сётэм сяна, выпускной ӝытлы пӧрмытсконо.

Сутэм йырси

Нырысь пыраломы парикмахерскойёсы. Тросаз дэмланы дырто: тустылы кыӵе йырси тупа шуыса уд валаське ке, нырысь эскерон вылысь причёска лэсьтэ. Дуныз Ижын 500-1000 манет. Талы уксёез жаляно ӧвӧл. Угось, адями шоры учкыку, синъёс нырысь чукало йырси но дэрем борды.

Ижысь Парикмахеръёсты дасянъя центрысь дышетӥсь Надежда Кадрова удысаз 15 ар берга ини.

— Берло кык арзэ чакласько: егит нылъёслэн йырсиоссы туж быремын, — вера Надежда Кирилловна. — Кызьы утялтӥськоды шуыса юасько но, ваньзы шуо, утюжокен, пе, шонеръяськомы. Тросэзлэн йырси пумъёссы вайяськемын, кӧс луэмын. Уноез дыдыос мелирование карыны куро. Туннэ со модаын ӧвӧл. Йырси уродмемен, вылды, али паськыт вӧлмемын йырси лякылон. Макем кузь, зӧк пунэт нуллэмед потэ, сокем дуногес наращивание. Но лябӟем йырсиез таӵе амалэн йӧнатыны уз пӧрмы — мурт йырси лякыку чигиськылэ. Та сяна, тросэзлэн мурт йырсиез нуллэмзы уг луы — лыдыны кутско. Умой — шиньон. Таиныз капчи: дэмӟытӥд, куштӥд.

Надежда Кадрова верамъя, туннэ кильтро лыдъяське… шунды улын пыжем йырси. Со понна пӧсь сиос улын кыллёно ӧвӧл. Нимысьтыз буёлъёсын маялляськон нимаське шатуш: сьӧд йырси ӵужпыръем луэ.
Парикмахерскойёсын дун-ъёс синъёсты вӧсь каро: наращивание 7 сюрсысен кутске. Ӝыт причёска — 1 сюрс манетысен. Йырез улэп сяськаосын чеберман — 1 сюрс 500 манетысен. Дунъёсты рос-прос уг гожто. Угось йырсиез бабыллян азьын ӵем дыръя ӵекто сое йӧнатыны пӧртэм маскаосын, вӧйёсын. Таин сэрен дунъёс но будо.

Лякем синлыс

Ымнырез буян но дунтэм ӧвӧл. Йырси тупатӥсьёс сямен ик, таосыз но пробной макияж лэсьтыны дэмлало. Дуныз — 800-ысен 1 сюрс манетозь. Ӝытлы рос-прос буяськон сылэ ини 2-3 сюрс манет. Та дунъёс пӧлы пыртэмын ӧвӧл синкашъёс. Соосты буям понна тыроно нимаз 200 манет, ишкем понна — эшшо 200 манет.
Гижыосты огшоры гель-лакен шобыртон усёз ог 500 манет тыр. Будэтэмед, вылаз чебер суред лэсьтэмед потэ ке — потты эшшо 500 манеттэ.

Луоз будэтыны синлысъёсты но. Дуръёсаз гинэ синлыс лякылон — 500 манет. Быдэсак ке — 1 сюрс. Но наращивание ласянь сак луоно. Йырси, гижы, синлыс лякылыса, нылашлэн ас чеберез медаз ышы. Ижысь тодмо стилист Олег Ажгихин мылкыдзэ кисьтэ:

— Мыным туж уг кельшо «лякылэм» апокъёс. Паймод: мае быгато — ваньзэ будэто-кузёмыто, ява. Вунэто, лэся — туннэ чеберлыкъя конкурсъёсын, дуннеысь подиумъёсын дунъяське нылмуртлэн инкуазен сётэм чеберлыкез. Зэм, та узырлыкез весь утялтоно-чаклано луэ. Нош нылашлэн ваньмыз лякылэмын ке, со мунё но тӥни!

500 пумо ымдур

Пичи Пурга ёросысь Вуж Мӧнья гуртысь Ирина Никитина дэремлы лыктӥз Иже. Нылашлэн котькуд минутэз лыдъямын: ЕГЭ-лы но, пе, дасяськыса вуттоно, дэрем но тужгес чеберзэ шедьтоно.

— Эшъёсы мынэсьтым визьмоесь вылӥллям, — вера Ирина, — толэзь азьлапал ик Интернет пыр дэремъёс 700-900 манетэн басьтӥллям. Мон али магазинъёстӥ ветлӥсько но паймисько — тужгес дунтэмез ӝыт дэрем 2 сюрс 500 манет сылэ. Эшъёсылэсь кылзӥськоно вылэм. Шуизы вал: ветлы Можга городэ. Отын дунъёс Ижынлэсь ичигес.

Ижысь имиджмейкерлэн, 93-тӥ школаысь дыше-тӥсьлэн Наталья Овчинниковалэн выпускной ӝыт шоры учконэз аслаз. нылъёслы та ужрадлы, сюанлы сямен ик, рос-прос дасяськоно, шуэ. Дэрем, туфли, йырси — ма, ымдур гинэ но — ог-огзылы мед тупалозы.

— Нылъёслэн бадӟым йыр висёнзы — дэрем, — вера Наталья Владимировна. — Угось школаез йылпумъяку, 3 пӧртэм дӥсь кулэ луэ — аттестат басьтонлы, ӝытлы но дискотекалы. Нуназе (коктейльной) дэремъёс пыдес дорозьгес луо. Соос тупалозы аттестат басьтонлы. Ӝыт дэремъёс кузесь — дӥсяно соосты балэ. Отын Королева быръем бӧрсьы яралоз воштӥськыны: брюки, огшорыгес дэрем тэтчаны-тапыртыны уз люкетэ.

Кыӵе буёло дэрем быръёно? Наталья Овчинникова дэмла нырысь ик нылашлэсь туссэ эскерыны. Соос 4 пумо: сӥзьыл, тол, тулыс но гужем. Сӥзьыллы (горд йырси, вож, курень синъёс) тупалозы лызалэс-вож, мак сяська, кукуруза тысь, шундыберган буёло дэремъёс. Толлы (сьӧд-сьӧд яке инкуазен сётэм тӧдьы-тӧдьы йырси, сьӧд, курень синъёс) туж мынозы сапфир, рубин яке изумруд буёлъёс. Тулыслы (тӧдьы, ӵужалэс йырси, чагыр яке вож синъёс) — шампанской, пӧзьтэм курегпуз, крокус, фиалка сяська буёлъёс. Гужемлы (пеймыт йырси, лыз, пурысь синъёс) тупалозы чагыр, лызпыръем-тӧдьы, бездыт-льӧль буёлъёс.

— Туала арын чеберен лыдъясько гольык пельпумъёсын дэремъёс, — визьма имиджмейкер. — Та сяна, али модае пыризы паськытаса кошкись саесъёсын дэремъёс. Таӵе дӥсез тужгес кельшыто Япониын улӥсьёс. Асьме дорын сокем ик уг адскыло на. Ма карод — шаермы модалэсь 2 арлы бероме.

Весьёсын, суйпоскесъёсын кильтыръяськон ласянь йырын возёно одӥгзэ: ӝужыт но паськыт мугоро нылъёслы тупалозы бадӟым чеберъяськон арбериос, лапег но чиед дыдыослы — пичи. Дӥсяды ке зарни пельугы — чиньыосысь вань азвесь зундэсъёсты куштоно.

Причёскаосты ке учконо, али паськыт вӧлмемын 4-ен-5-ен пунэтъёс, соосты орхидеяен яке векчи розаен чеберъян. Вунэтоно ӧвӧл ымдуръёсты. Горд буёл 500 пумо луэ, шуо. Озьыен, та пӧлысь аслыд тупасьсэ шедьтоно. Ӧд быгатэ? Помадаез воштоз блеск.

— Пыдкутчан ласянь но вераме потэ, — шуэ Наталья Владимировна. — Чакласько: тросэз нылъёс нырысь чулка дӥсяло, собере — босоножки. Тодэлэ: босоножкиен ветло гольык пыд! Соин балэ мыноно ӧвӧл — нуназе аттестат басьтыны гинэ ке шат дӥсяны яралоз. Но гижыосты нырысь чылк-чылк утялтоно. Ӝытлы кулэ шпилька вылын югыт курень туфли. Таиныз уд янгышалэ — котькыӵе буёло дэремен со тупалоз.

Ольга Корепанова

Туспуктӥз Александр Горбунов

Удмурт Дунне
By Удмурт Дунне 23 июня, 2015 07:45