Кыӵе со — «Удмурт дунне» энциклопедия?

Удмурт Дунне
By Удмурт Дунне 5 июня, 2015 09:47
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

10-6-10«Удмурт дунне» газет аслаз юбилеезлы туж йӧно кузьым лэсьтӥз — поттӥз 100 аръем историезъя энциклопедия-справочник. Шаерамы таӵе изданиос ӧй вал на — «Удмурт дунне» газетлы -100 ар: Аръёс. Вакытъёс. Адямиос» — удмурт кылын нырысетӥез энциклопедия луэ.

Со сярысь вераськиськом газетлэн валтӥсь редактореныз Зинаида Рябининаен.

— Зинаида Кирилловна, книга калыке ӧз вӧлмы на, но сое киязы кутылэмъёс шуо ни, со дунъянтэм. Маиныз?

— Бен, та книга дуно кызьы ке газет лэсьтӥсьёс, озьы ик газет лыдӟисьёс понна, угось та книгаын — быдэс газетлэн, оло нош быдэс удмурт калыклэн берло 100 ар ӵоже улон гумырез, адӟонэз, угось ӵап газет пусйыса кельтэ ваньзэ. Книгае вакчиятыса пыризы газетын пӧртэм аръёсы потам материалъёс, историен герӟаськем ужъёс, справкаос, трос туспуктэмъёс. Ас поннамы ми сое даурмылэн куараез шуиськом, угось 100 ар ӵоже дунне вылысь нокыӵе мукет книга-газет сомында ӧз гожъя на асьме выжы калык сярысь.

Кунмылэсь но Удмурт шаермылэсь летописьсэ нуэменыз ӵош газет лэсьтӥз аслэсьтыз но историзэ. Солэн вакытъёсыз сярысь верало нимъёсыз — та дыр ӵоже со 8 пол воштӥськиз: «Войнаысь ивор» — «Удморт» — «Виль синь» — «Гудыри» — «Удмурт коммуна» — «Удмурт правда» — «Советской Удмуртия» — «Удмурт дунне». Но, кызьы шуо, газет — со одӥг-кык нуналлы. Отын номыр уродэз ӧвӧл — угось ивор нуналлы быдэ вужме. Даур ӵоже люкаськем подшивкаос утисько на архивъёсын-библиотекаосын гинэ, отын — пумтэм-йылтэм ивор. Соин милям потӥз тужгес валтӥсьёссэ выльысь улӟытэммы но, газетмылэсь историзэ огазе люкаса, пыраклы синпельлы кельтэммы — «Удмурт дуннелэсь» аспӧртэм энциклопедизэ кылдытэммы. Та книгаез дасяса, ми быдэстӥм, шуыны луоз, газет поттонын азьвыл тыршемъёс азьын аспӧртэм долгмес: ми утиськом тӥлесьтыд мытэм уждэс, азинтӥськом сое!

— Книга дасямын 3 люкетлэсь: «Историысь чуръёс», «Газет поттӥсьёс», «Внештатной корреспондентъёс». Куинетӥ люкетаз пумисько газетын воксё ужаллямтэ адямиос но…

— Со бордын ик солэн аспӧртэмлыкез но тужгес бадӟым узырлыкез – редакциын ужатэк но, кин ке ялан гожъяське, мукетыз дырын-дырын ивор ыстылэ — ваньзы соос милям матысь юрттӥсьёсмы луо, угось интыосысь иворъёстэк газет мӧзмыт потысал. Тазьы ми тыршим асьмелэн сьӧрлось авторъёсмылы гажаммес возьматыны.

Нош ваньмыз книгае пыриз 1735 адями! Татчы кельтэмын газетын 100 ар ӵоже ужамъёслэн нимтулъёссы! Сыӵе список лэсьтон борды басьтӥськиз вал азьвыл редактормы Алексей Шкляев, со туж ӟеч малпан. Список кылдытэмын трос аръёс ӵоже архивъёсын бугыръяськыса, юалляськыса, но туннэ но вераны ум быгатӥське на, татчы 100 процентэз сюриз шуыса, валаськоды, 100 ар ӵоже мар но ӧй вал… Кылсярысь, ми али ке но ум шедьтӥське ваньмызлэсь валтӥсь редакторъёслэсь личной ужъёссэс, туспуктэмъёссэс гинэ но. Списоке шедьымтэос вань, дыр, ай, вазиськисьёс луизы ке, азьланяз ми соосты одно пыртом та радэ. Утчаськон ужмес но уретыны ум малпаське, ивор ялан ватсаськоз, энциклопедимы выльдӥськоз, азьланяз ми малпаськом сое электрон форматэн Интернетэ интыяны.

— Туала вакытэ огшоры книга гинэ но поттыны шуг, нош татын — быдэс энциклопедия!

— Соин но со уката дуно. Угось историен герӟаськем издание кулэ каре трос тодэм-валамез, эскеронъёсты, утчаськонъёсты. Архивъёсын бугыръяськон, материал люкан, нырысь учкыса гинэ, лякыт потэ, нош ужаны кутскиськод ке, йыр борды кырмиськоно: куддыр одӥг адями сярысь ивор шедьтон понна арняос быро. Арлэсь кема йырзэс ӝуткатэк ужазы, шуыны луоз, редакторъёс-составительёс Лия Малых но Валентина Уразаева. Зэм, куд-ог тодосчиос талы паймизы: та выллем издание, пе, ар ӵоже вормонтэм кадь. Но ми тыршим, книгаез радъяны юрттӥзы «Удмуртия» издательствоысь эшъёсмы, соос ужзэс туж валаса лэсьто. Со сяна, кие кутымон книга поттон понна данак уксё кулэ. Оглюкетсэ висъяз Финляндиысь М. Кастрен нимо огазеяськон, туж бадӟым тау соослы, та огазеяськон 2008-тӥ арын милемлы юрттӥз ни вал «Удмурт кизилиос» книга поттыны. Озьы огъя кужымен ужмы пӧрмиз, малпасько — газетмылы ӟеч кузьым лэсьтӥм.

— Книгае пыремъёслэн гинэ ӧвӧл, огшоры газет лыдӟисьёслэн но сое адӟемзы потэ, луоз. Кытысь шедьтоно нырысетӥ удмурт газетлы сӥзем нырысетӥ удмурт энциклопедиез?

— Книга потэмын 1000 экземплярен, вазиськоно редакцие. Нош тодматскон (презентация) ортчоз 10-тӥ июне 17 часын Ижысь Эшъяськон юртын. Ӧтиськом отчы газетлэсь вань эшъёссэ, историен, журналистикаен тунсыкъяськисьёсты.

УД

Удмурт Дунне
By Удмурт Дунне 5 июня, 2015 09:47
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<