Кошкемлэсь бертон дуно. Кызьы одӥгез автормы Анапае вуылӥз

Удмурт Дунне
By Удмурт Дунне 22 июня, 2015 16:33
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Пичиез пие бронхитэн ӵем висьылэ шуыса, эмъясьёс ӵектӥзы Анапа городын йӧнатӥськыны. Сьӧд зарезь дурысь городъёс пӧлысь, пе, татын гинэ омыр эмъясь.

Зыл-зыл нуналъёс

Анапаозь поездэн мынӥмы 2 уй но нунал. Нылпиосыным шуг-секытъёс ӧз кылдылэ. Вагонысь вань тэшкылиосын кылзы тупаз. Купеысь купее шудыса ветлӥзы. Монэ чик ӧз жуммытэ — сюдыны гинэ эн вунэты.
Анапае вуэммес валаса ик ӧм вуэ. Сочиын, Адлерын шутэтскеммы вань бере, малпай: татын но вож-вож писпуос, ӝужыт-ӝужыт гурезьёс но лыз-лыз зарезь, дыр. Янгышаськем. Анапа станцие потӥмы но, ныры ошиськиз. Инкуазь суред ӧз воштӥськы: оло вордӥськем Мӧнья гуртам вуи, оло Сьӧд зарезь дуре — вӧл-вӧл бусы, кытӥ-отӥ чиндыр-вандыр писпуос адско.

Турфирмаос пыр азьлапал ик улон сэрег ӧм утчалэ вал бере, нырысь ик милемлы шедьтоно луиз улон инты. Сочи палъёсын чугун сюрес вокзалын комната ӵектӥсьёс сьӧд-сьӧд сыло. Татын — буш. Берло валамы: таксистъёс нуо-ваё но, улон сэрег но ӵекто. Кузпалы соосын быдэс час кенешиз. Таксист, уксёлы чурытгес картэным эчешыса, жадиз, лэся. Комнатаезлы дунзэ уй-нунал понна 300-озь уськытэмез бере ӝогак вайиз милемыз Анапалэн Витязево ёросысьтыз 3 этажъем коттеджаз.

Коркаез но, комнатаез но кельшиз — Турциын, Египетын кадь чильк-вальк ӧвӧл, но ярам ини: душез, нимаз сьӧросэз, холодильникез, телевизорез, кезьыт тӧл пельтонэз вань. Нылпиослы кельшиз азбарез — батутэз, шудонъёсын тырмем сэрегез, электромобильёсыз гочатӥзы. Вань котыръёсмес интыяса, дыртӥмы кӧтмес тырыны, городэн тодматскыны. Кошкыны дасяськеммес шӧдыса, кузёмы индылыны ӧдъяз. Ӵукназэ но нуназезэ столовойын-кафеын, пе, сиське. Нош ӝытсэ татын пӧраське. Куазь туж пӧсь. Кафеосын сиён ӝог чырса.

Нырысь ик, валамон, Сьӧд зарезь дуре васькимы. Ярдурозь ог 200 метр ай, нош пыд улын луо ини. Пичиезлы пиелы со гинэ на кулэ вал кадь. Лать гинэ сюрес шоры ик пуксиз но песокен шудыны кутскиз. Э-э, Савелий, шуисько, тон татысь бадӟым вуэз ӧд адӟы на! Пие вуэз оломар кожа.

Сочиын зарезьын векчи медузаос лачак ке, татын алямын пеймыт-вож вутурын. Пляж кыстӥське 54 иськем. Калык лачак. Кин кызьы дӥсяськемын, кин кызьы ассэ возе. Тросэз шунды шорын пыжо но, дӥсьсэс воштытэк ик, ульчаостӥ ветло. Куд-ог дыдыос пиосты гочато — стрингиен поръяло. Мынам соку ик син азям пуксиз Египет. Туристъёслы отын куронъёс юнэсь. Пыласькон дӥсен ураме пот ай — улляса лэзёзы. Сочиын палэнысь вуэмъёсты дышетыны выро ик. Трос пол адӟылӥ — магазинэ пыласькон дӥсен пыремъёсты вуз карись потыны косэ.

Анапалэн тусыз Соль-Илецклэн кадь йӧтӥз — ӝужыт коркаос трос ӧвӧл, городлэн шорыз — 1 паськыт но туж кузь ульча. Со котырын ик улон берга. Июне туж тӧлаське. Таин сэрен ӵем дыръя зарезьын пыласькыны кышкыт луэ. Ми но сыӵе нуналэ тупамы. Тулкымъёс 8 метрозь ӝутскылӥзы. Тае, валамон ини, мон адӟытэк кыльыны нокызьы ӧй быгаты. Куинь воргоронъёсыным сюлтыр-калтыр васькимы зарезь котыре. Ми кадьёс лачак люкаськиллям. Куд-ог шӧртчиос тулкымлэсь уг кышкало. Чульк гинэ пушказ пыро. Возьмаськисьёслэсь вулэсь палэнскыны куронъёссэс пелязы ик уг поно. Тӧло дыръя угось ярдуре пото куальымъёс. Адямиос соосты лӧптыса бичало.

Маиз тунсыко — тӧло дыръя ульчаостӥ ворттылэ машина. Ваньзылы кылымон вера: туннэ зарезь тулкымъяське, пыласькыны уг яра! Соку ини мылкыд быре. Ма карод коркан? Египетын сямен, татын 100 пӧртэм экскурсиос ӧвӧл — тунсыкоосыз 2-3 гинэ. Магазинъёстӥ ветлыса, Ижын но кӧт тыре. Лыдӟиськыны ке, поездын книга-журналъёслэсь синъёс катьтэммизы. Дельфинарие мын вал — пиосылы со тунсыко ӧвӧл. Ижын учкизы вал дельфинъёсты. Аквапаркын калык тымиськемын. Кенешимы Анапаысь парке потаны.

Калыкез нуись-вайись транспорт ӵем ветлэ. Но со котьку адямиосын тырмемын луэ. Пичи нуныен шуыса уг жаляло — кызьы султӥд, пыр озьы мынод. Ярам, визьмо вылӥськем — автобусэ коляскаен чуртнаськи.

Парксы Ижысь Горький нимо парклэсь зол уг висъяськы: шурдыт берганъёссы асьмелэнлэсь бадӟымгес но тросгес. Соин-а, мар-а пиосы нырысь долкам кадь сылӥзы. Соослы њечыранъёс тунсыко ӧз потэ. Ыбылӥськомы, пе. Пӧрмыто вылэм — бадӟым небыт шудон утӥзы.

Озьы зыл-зыл ортчизы шутэтскон нуналъёс. Ас поннам малпасько: Анапалэн маиз гинэ меда тодам кылёз? Городэз но, зарезез но монэ ӧз паймытэ. Пиосы но асьсэды усто возизы. Аклиматизация шуон соос вылын ӧз шӧдӥськы — кӧтазы но ӧз йӧты, ӧз но кизьнылэ-зырымаське. Ма, оло, со ик вань шутэтскон?!

Улонзы одӥг ульчаын ортче.

Улонзы одӥг ульчаын ортче.

Кӧшкемыт кино

Доре бертыны потӥмы. Такси дыраз вуиз — чугун сюрес вокзалэ вуимы часлы вазьгес. Кузпалы шуэ: тани-тани ивортозы, кудаз поездэ пуксёно. Витиськом-витиськом — нокин номыр уг вера. «Анапа-Ижевск» гожтэмен поездэз но ӧм шедьтэ. Соку картэ дыртӥз кассае. Отысь пуля сямен вуиз. Кӧдэктыса шуэ: Анапаын 2 чугун сюрес вокзалзы, асьмелы мукетаз мыноно. Поездмы кошкытозь, кылемын на 30-40 минут. Кызьы песьтэръёсын-коляскаен таксиен бусыос, нюлэсъёс пыр потӥмы — али уг валаськы ни. Егоре зар бӧрдэ: мынам бертэме потэ-э-э… Пиёклэн атаез шып пуке — аслэсьтыз янгышсэ вала. Со ук шонертэм билет басьтӥз. Вокзалэ вуимы гинэ — ой, Инмаре — 1-2 минут талэсь азьло, пе, поездды кошкиз.

Ми нош ик песьтэръёсын-коляскаен синтэм-пельтэм пуксимы таксие. Ивортӥзы угось: мукетаз станциын поезд 8 минут сылоз. Но отчыозь вуон понна 90 иськемез ортчоно. Таксистмы гань-гань. Вуом, вуом — лӧпкытъя. Сюлэм тук-тук вазе. Мынытозямы тунаса йыры жадиз: поездэ пуксём-а, ум-а. Станцие вуимы. Сюлтыр-калтыр бызьыса вокзалэ пыриськомы. Оп… поездмы нош кошкыса вуттэм. Вокзалын одӥг адями но ӧвӧл. Выж миськись кышномурт шуэ: мукетаз станцие мынэ, отын поезд сылоз 40 минут.

Табере таксистмы сураськиз — кыӵе сюресэтӥ мыныны уг вала. Картазэ кема бергатӥз. Ай тамак пурк-пурк кыскиз на. 5-а, 10-а минут тазьы сылӥмы — куке-соку вырӟимы ик. Шӧдӥсько: дэреме котмиз кадь. Учкисько но — ал вылам пукись Савелиелэн памперсэз тырмем… Памперссэ воштыны нокызьы — вань котыръёсмы багажнике туйнамын. Ӧжыт улыса, пиелы воксё урод луиз: бӧрдэ, ӧске. 120 пала километрез ортчытозямы, ваньзэ саптаса.

30 минут ортчиз. Ми весь сюрес вылын. Вокзал но, поезд но уг адско. Таксистмы нукыртыны ӧдъяз: ой, пе, отчы но асьмеос ум вуэ, дыр. Ойдолэ пырак Краснодаре ширтомы. Отысен — сю процент — поезддэс шедьтоды. Соглаш кариськимы. Кин тодӥз вал ай, та городын 3-4 чугун сюрес вокзалъёссы шуыса!

Уг удалты ке, уг удалты ини. Краснодар вокзалэтӥ, пе, поездды уг ортчы — Краснодар II сюресэтӥ кошке. Билетмес гинэ но ӧз кутэ — сое, пе, воштоно вал Анапаысен ик. Ма карод — бертэм потэ. Выльысь билет басьтоно. Тӥни соку картме чупано кадь луи. Уксё ласянь чурыт кариськемез татын туж иназ луиз. Анапаын коньдонзэ тӧлъя-буръя мултэс ӧз лэзьы. Таксистлы 5 сюрс сётыны но, поезд билетъёслы но уксёез тырмиз.

Вокзалын 6 час солань-талань ветлыса, мырдэм но кызьы пуксимы поездэ. Кызьы купеын бертӥмы — кӧшкемыт кино кадь. Одӥг интымы буш вал бере, милемын кин но ӧз мыны. Уйин сайкасько — чиган кышномурт бабе. Ӵукна султӥсько — 2 метр ӝуждалаё воргорон вез-вез кылле ни. Агрыз станцие васькеммы бере ог-огмылы кыл сётӥмы: бертыны курадӟеммы сярысь нокинлы ум вералэ. Супыльна Егоре гинэ но верам кылзэ туннэозь ӧз тӥя на. Мон гинэ тани сьӧлыкасько…

Туннэ картэ нош сюрес вылэ чортэ. Крыме, пе, ветломы. Та сярысь малпаса, али ик кӧты шурдэ. Но туннэ мон визьмогес ини: поезд билетъёсмылэсь котькуд буквазэ, лыдпуссэ ачим эскерыса потӥ. Кызьы шуо: одӥг йыр умой, кык йыр — эшшо но умойгес.

Ольга Никитина

Удмурт Дунне
By Удмурт Дунне 22 июня, 2015 16:33