Ижысь 11 аресъем пияш нуналаз 3 книга лыдӟе

Удмурт Дунне
By Удмурт Дунне 23 июня, 2015 13:03
DSC_0097

25-тӥ июне Россиысь тужгес лыдӟиськись пиналъёсты ӟечкылалозы Москваысь Горд площадьын «Россиысь книгаос» фестивальын. Та нуналэз чидатэк возьма ини Гриша но.

Ижысь 11 аресъем удмурт пияш Григорий Мерзляков минут куспын 200-лэсь ятыр кыл лыдӟе, нуналаз — 3 книга, укмыс толэзь  — ӵоже — 677.

Озьы со Россиын ортчем «Тужгес лыдӟиськись дышетскись» конкурсын 6 пиналэн ӵош тужгес трос лыдӟиськисен лыдъямын. Ижысь М. Джалиль нимо библиотекае Гриша нырысьсэ лыктӥз,  2-тӥ классын дышетскыкуз, нош ар ортчыса, анаезлы шуиз: мыным одӥг библиотека ӧжыт.

— Озьы мон сое гожтӥ Нылпиослэн но егитъёслэн элькун библиотекаязы. Шумпотӥсько, пие трос лыдӟиське шуыса, котькуд анайлэн сямен, со мынам азьланезлы осконэ. Оло компьютермы ӧвӧлэн со сыӵе кыстӥське книгаос борды, оло, ачим сямен ик, лыдӟиськытэк улэмез уг луы. Но шудыны но, умой дышетскыны но вуттэ. Яратоно предметъёсыз — лыдӟиськон но суредаськон. — шуэ Гришалэн анаез Марина Викторовна.

— Мае али лыдӟиськод, — юасько книгаосын стеллаж дорын сылӥсь пияшлэсь.

— Толон лыдӟыса быдтӥ К. Берглэсь «Пингвин Тамино» выжыкылзэ, кутски Ю. Томинлэсь «Шёл по городу волшебник» книгазэ. Мыным кельшо пӧйшуръёс сярысь гожъямъёс, фантастика. Ӟуч веросъёс ярало, нош кылбуръёс кельшо удмурт кылын. Тужгес но тодам кылизы Г. Ходыревлэн чуръёсыз.

Ижысь  А. Гайдар нимо библиотекаысь удмурт литературая люкетаз Гриша ортчем дышетскон ар куспын 51 пол пырам. Одӥг пыремаз со 3 книга басьтэ, озьыен  пияш  150-лэсь трос удмурт книга лыдӟиз ини.

Таӵе лыдӟиськисьлы шумпотэ М. Джалиль библиотекаен кивалтӥсьлэсь ужзэ быдэсъясь Рамзия Гизатуллина:

— Тау Гришалы милемыз данъямез понна, табере шаерамы гинэ ӧвӧл, быдэс Россиын тодозы,  Ижын таӵе лыдӟиськисьмы вань шуыса. Гриша будэ книгаосын ӵош, малпасько, азьланяз но со татчы сюрессэ уз вунэты.

25-тӥ июне Россиысь тужгес лыдӟиськись пиналъёсты ӟечкылалозы Москваысь Горд площадьын «Россиысь книгаос» фестивальын. Та нуналэз чидатэк возьма ини Гриша но.

— Туж потэ Москваез адӟеме, мынам Удмуртилэн палэназ вуылэме ӧвӧл ай, — лушкем малпанзэ усьтэ  пияш.

 Галина Семёнова

Туспуктӥз Сергей Марков

 

Удмурт Дунне
By Удмурт Дунне 23 июня, 2015 13:03