Ижын поттозы троллейбусъёсты?

Удмурт Дунне
By Удмурт Дунне 22 июня, 2015 14:01

Кызьы азинтӥське шаерысьтымы промышленность? Та но мукетыз пумысен вераз промышленностья но вуз каронъя министр Олег Радионов.

Троллейбус поттомы?

Удмуртиысь промышленность Россиын куд-ог удысъёсъя азьмынӥсь луэ. Таин валче туэ 4 толэзь ӵоже поттэм огъя ваньбур 142,5 миллиард манет тыр луиз. Олег Радионов верамъя, та, кылем арен ӵошатыса, 22 процентлы уногес.

Мувӧй 3,5 миллион тонна поттэмын. Кылем арысь та вакытэн ӵошатыса, со 99 процентлы уногес.

— Ар кутсконын кышкан вал, кыӵе меда азинтӥськоз металлургия. Но али корт ӵыжатон но солэсь арбери лэсьтон, сое вузан интыысьтыз вырӟиз, — шуэ Олег Радионов. — Али зол берганы, рынокын инты басьтыны кутскизы азьвыл вужере кылем предприятиос. Озьы Сарапулысь радиозавод 3 поллы, Ижысь механической завод 2 поллы уногес вуз поттыны ӧдъязы.

Шаерамы берло дыре зол азинтӥськиз машина но солы детальёс лэсьтон. Туэ 5 толэзь ӵоже бичамын 36 сюрс 893 автомобиль. Одӥгез но складын уг сылы — ог 2 миллиард манет тыр вузамын. Басьяськисьёс ӵемгес куро «Лада Грантаез» — 31 сюрсэз вузамын. Олег Викторович пусъемъя, эскерон вылысь поттэмын ни 21 «Лада Веста».

Кин тодэ, азьланяз Ижын, оло, поттыны ӧдъялозы троллейбусъёс но. Туннэ Китайысь специалистъёсын вераськон мынэ. Городысь калыкез нуллӥсь транспорт 80 процентэз воксё вужмемын ни. Нырысь ик асьме паркмес выльдыны, отӥяз мукет улосвылъёс понна ужаны луонлык кылдысал ке, та удысэз но вормысалмы, шуэ Олег Радионов.

Палэнэ уг кыльы газомоторной топливо сярысь сюлмаськон но. Шаерамы 5 сыӵе заправка вань ни. Басьтэмын газэн ужась 117 автобус но коммунальной услугаос сётонын кутӥськись 3 техника. Чакламын эшшо 33 техника басьтыны. Али «Газпром» огазеяськонэн вераськонъёс мыно заправкаосты 5-лы йылтыны. Ваньмыз умой луиз ке, 2016-тӥ арын соосты лэсьтон борды басьтӥськозы. Эсьма, бензинэн ӵошатыса, газ 3 поллы дунтэмгес сылэ, омырез но сокем зол уг кырсёмыты.

Ужбергатӥсьлы — сюрес

Шаерамы 14 миллиард манет тыр инвестициосты кыскыны пӧрмиз. Таос пӧлысь 6 миллиардзэ — промышленносте.

Россиысь Правительство ужпум пуктэ: улосъёсысь бизнеслы азинтӥськыны, транспортъя инфраструктураез умоятонлы сюрес сётоно. Таин валче шаерамы чакламын 6 паркъёс-площадкаос кылдытыны, шуэ Олег Радионов. Одӥг порма удысын бергасьёсты одӥг интые люкалозы. Кылсярысь, «Иж завод» индустриальной парк лэсьтон понна 25 миллиард манет кулэ. Сое пуктон кутскемын ни. Быдтэм уксёлэсь оглюкетсэ берыктозы федерал бюджетысь. Со паркын поттозы радиоэлектроника, роботъёс. Нимысьтыз саклык висъяны чакламын нылпи шудонъёс лэсьтонлы.

— Камбаркаысь химия ож тӥрлыкез быдтонъя заводэз выль сямен ужатыны чакламын. 2 инвестор сюриз ни. Огез ӵектэ химия но соин ужаны тупась арбериос лэсьтыны. Мукетыз чакла отын жуг-жагез быдтыны. Туннэ быръемын ӧвӧл на, кинлы заводэз сётозы, — шуэ Олег Радионов.

Бадӟым луонлыкъёс вань пиялалэсь но пулэсь арбериос лэсьтыны. Юн азинтӥськыны кулэ Ижысь автозавод: татын медо бад-ӟымесь машинаослы фараос лэсьтыны, светотехникаен вырыны.

Елена Сараматова

Удмурт Дунне
By Удмурт Дунне 22 июня, 2015 14:01