Ижлэн юбилеяз вуозы Турецкийлэн хорез, Франциысь оркестр…

Удмурт Дунне
By Удмурт Дунне Июнь 9, 2015 14:44
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Одӥг городмы — одӥг сюресмы!

255 ар талэсь азьло, Иж шурез ӵыпыса, тымет дуре пуктэмын корт поттон завод. Татысен кутскиз Иж каргуртлэн, собере городлэн сюресэз. Кызьы пусъёзы дано юбилеез городын улӥсьёс но куноос — та сярысь журналистъёслы мадиз Иж городлэн йырыз Александр Ушаков.

— Городлэсь нуналзэ пусъёнэ туэ уката мыло-кыдо пырисько коммерциен вырисьтэм организациос, — вераз Иж городлэн йырыз Александр Ушаков, — Троссэ акциосты радъяло асьсэос городын улӥсьёс, общественной ужен вырисьёс. Праздниклы сӥзем ужрадъёсы пыриськыны быгатозы вань мылкыд карисьёс — возьматозы кырӟаны-вераны быгатонлыкъёссэс, спортын вормонъёссэс.

Городлэсь юбилейзэ пусъёнлы кутскон сётэмын ни 10-тӥиюне ик. Иж город администрациын сӥлы каризы тужгес усточи нылпиосты — 80 мурт быдэн 25 сюрс манетэн басьтӥз. Нош туннэ кутскон сётэмын луоз оркестръёслэн парадзылы. 19 час 45 минутысен Александр Невскийлэн соборез дорын учкисьёсты витёзы П. Чайковский нимо камерной хор, Удмуртиысь академической капелла, калык инструментъёсъя «Золотая мелодия» оркестр, Удмурт кун филармониысь солистъёс, Ижысь искусствоосъя нылпи школаослэн огазеям хорзы.

— Дорамы вуэмын Франциысь Шинон городысь оркестр но, — пусйиз Александр Ушаков. — Отысь усточиос асьсэос мылкыд каризы дорамы лыктыны. Соослы кулэ сцена, учкисьёс. Нош Ижын луоз соиз но, таиз но.

Ижысь пыӵал поттон заводэз кылдытӥз тодмо ӟуч инженер Андрей Дерябин. Ӵапак солы синпелет дорысен 12-тӥ июне ортчоно ужрадъёслы кутскон сётэмын луоз. 9 часын отын чакламын митинг, синпелет борды сяська тугоко тырон. Нош 10 часын калыкез витё ни «Пыраклы Россиен» монумент азьын — татын ортчоз Россилэн нуналэзлы сӥзем сӥё-дано ужрад.

— Отӥяз калык калленэн кыстӥськоз Шор площаде, — азинтӥз веранзэ Иж городлэн йырыз. — Отын кутскоз ужрадъёс пӧлысь одӥгез тужгес чеберез — «Одӥг город — одӥг история!» шествие. Ортчоз со 11 часын Пушкинской урам кузя. Отчы городысь котькуд ёросысь предприятиос, огазеяськонъёс пыриськозы. Зэм, ульча кузя ортчыны мылкыд карисьёс туж трос луизы, соин ик соос пӧлысь тужгес данооссэ, тунсыкооссэ коллективъёсты быръёно луим — ваньзэс лэзьысалмы ке, шествие куинь-ньыль час но кыстӥськыны быгатысал. Ми чаклам: 1 час 15 минутэн тырмоз.

Угось та вакытэ калыкез витёзы ни трос пумо площадкаос. Отын тунсыко луоз нылпиослы но, егитъёслы но, мӧйыослы но. Кылсярысь, пичиос понна Правительстволэн юртэз мышкысь ротондаын но Наговицин урамын «Тунсыко урокъёс» ортчытозы «Молодой человек» театрысь артистъёс.

— Арысь аре ик радъяськом Тазалыклэсь урамзэ, — пусйиз А. Ушаков. — Таиз уката яра мӧйыослы. Туэ со луоз К. Герд нимо музей бордысь Наговицин урамын. Городын улӥсьёс но, куноос но эскерыны быгатозы вирзӥбетсэс, вирысьтызы сакырзэ, кислородзэ, эмъясьёс визь-кенеш сётозы тазалыкез утён пумысен.

Ваньмызлы тунсыко луыны кулэ «Велоград» площадка — со интыяськоз Шор площадьысь котырес фонтан дорын. Татын асьсэлэсь быгатонлыкъёссэс возьматозы велосипедистъёс. Котькуд мылкыд карись ГТО сётыны быгатоз. Та площадкаын ик йылпумъянъёс лэсьтэмын луозы «Вормонэз дурисьёслэн кивоштӥсьёссылэн альбомзы» марафонлы. Солы кутскон сётэмын вал 9-тӥ мае. 50-лэсь ятыр фотографъёс-волонтёръёс, ож гимнастёркаосын пӧрмыса, Быдӟым Вормонлы 70 ар тырмонлы сӥзем туспуктэмъёс быдэс нунал ӵоже лэсьтылӥзы. Городлэн нуналаз соослэн ужъёсынызы адӟытон радъяськоз.

Концерт площадкаосын шулдыртозы городысь тужгес устоосыз коллективъёс. Нош 20 часын Шор площадьын учкыны-кылзыны луоз Турецкойлэсь хорзэ. Шулдыръяськонъёс йылпумъяськозы чебер фейерверкен. 22 часысен со ог 10-12 минут пала кыстӥськоз.

— Ужрадъёс, Шор площадьын сяна, городысь пӧртэм интыосын но чакламын, — ватсаз Иж городлэн йырыз . — Котькуд ёросын нимысьтыз площадкаос луозы. Нош та нуналэ город сьӧры потэмъёс праздниклэсь ортчемзэ учкыны быгатозы телевизорысь — 19 час 40 минутэ «Мынам Удмуртие» ТРК-ын нимысьтыз трансляция чакламын.

Элькунмы улӥсьёсын ӵош шулдыръяськонэ пыриськозы палэнысь куноос но — вуыны кулэ Беларусь Республикаысь Брянск городысь, Китайысь Синин городысь делегациос.

Элина Кумачёва

Туспуктӥз Александр Горбунов

Удмурт Дунне
By Удмурт Дунне Июнь 9, 2015 14:44
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<