«Гуртъёсты азинтон» программая сюрес, Глазовысь шпион но школаен катлы пумит коньдон бичан…

Удмурт Дунне
By Удмурт Дунне 22 июня, 2015 14:53

Глазов

Кайгу вылын ужбергатон

Зэмос шпион шараяськиз Глазов городын — тазьы шуыны луоз уйпал шоркарысь одӥг ужбергатӥсь сярысь.

Амало кышномурт кивалтэ вылэм улонысь кошкемъёсты ватонъя агентствоен. Ужасьёсыз ӝыны ар пала кылзӥськылӥллям ӝог юрттэт сётонъя станциысь эмъясьёслэсь телефон пыр вераськемзэс: кытысь гинэ кылӥськоз адями кулэм сярысь ивор.

Озьы кулон калэ вуэм яке улонысь кошкем мурт доры та агентствоысь адямиос вуо но матысь муртсэс ыштэмъёслы кужмысь кадь юрттэтсэс џекто вылэм.
Суд пуктэмъя, та кескич нылкышно янгыше уськытэмын гожтэтъёсын, телефон пыр вераськонын тайнаез тӥямез понна. Сое 4 арлы пытсэт сьӧры келяны пуктэмын вал. Но шудэз вылэм: шедиз амнистия улэ.

Яр

Валерия воректӥз
Ижысь тазалыкез юнматонъя «Берёзка» лагерьын 4 нунал ӵоже ортчиз нылпи творчествоя «Ӝуатӥськом кизилиосты» ӵошатскон. Конкурсын быгатонлыксэс возьматӥзы Яр ёросысь но 12 пиналъёс.

Ёросысь искусствоосъя нылпи школалэн кивалтӥсез Елена Трефилова лӧптэмын: ваньмыз сямен дышетскисьёсыз конкурсын кузьымъёс басьтӥзы.

Егит усточиос пӧлысь тужгес зол удалтӥз Валерия Киселёвалы. Валериялы дунъясьёс сётӥзы Москваысь культурая но искусствоосъя кун университетэ конкурстэк пырыны грант. Елена Павловна тау каре нылпиосызлы но соослэн анай-атайёссылы. Угось соостэк та вормонъёс ӧй луысалзы.

Шаркан

Сюрес воляз
Выль сюресъёслы шумпото шарканъёс. Тужгес но куанӥзы Шаркан черкогуртэз Бородуль гуртэн герӟась сюреслэн выльдӥськемезлы: тулыс но сӥзьыл угось отӥ машинаос ортчыны ӧз быгатылэ ни вал.

Та сюрес выльдэмын 2020-тӥ арозь чаклам «Гуртъёсты азинтон» федерал программа чотын. Отчы шедён понна поселениын одно ик луыны кулэ азинскись эштос, фермер хозяйство яке кыӵе ке мукет бадӟым предприятие: ӝутэм сюрес котыр ласянь пайдаё мед луоз.

Иж

Уж сюлэмъя медло
Городлэн юбилеезлы сӥзьыса, уж утчасьёслы ярмарка ортчиз. Отчы ог 1 сюрс 500 адями пыриськиз.

Уж ӵектӥсьёс пӧлын вал шоркарысь 36 предприятиос но организациос, оглом соос 903 уж инты дэмлазы. 270 палаез вакансиос кузёоссэс шедьтӥзы. Сюризы инженер, юрист, пӧраськись, слесарь, автоэлектрик, водитель луыса ужаны мылкыд карисьёс. Нош кин сюлэмызъя уж ӧз шедьты, таӵеослы визь-кенешен юрттэмын.

Сарапул

Ӝажыос узырмозы

Ёросын июнь толэзь сӥземын нылпи книгалы.

Ёросысь библиотекаосын пӧртэм пумо ужрадъёс ортчыло, отчы ӧтчало кивалтӥсьёсты, калык огазеяськонъёслэсь ёзчиоссэс, ёросысь дано адямиосты. Куноос лыдӟо пичи дыр книгаосысьтызы люкетъёсты. Нош мылкыд карисьёсыз со книгаоссэс кузьманы быгато библиотекаослы.
Озьы библиотекаысь ӝажыос трослы узыргес луозы.

Алнаш

Ял каро нылпиос

Туэ Алнаш ёросысь школаосын 29 лагерь сменаос ужалозы. Отын ял карозы 1 сюрс 351 нылпиос.

Ёросысь пиналъёслэсь гужем шутэтсконзэс радъяны элькун бюджетын 2 миллион 468 сюрс манет чакламын. Со сяна, 14 ареслэсь бадӟым пиналъёс ужан лагерьёсын тыршозы. Туэ сыӵе лагерьёс 6 школаосын усьтӥськозы. 225 быдэ вуымтэос эмъюм турынъёс бичалозы, школаос котыре площадкаос лэсьтозы, сяська кизёзы, ошмесъёсты сузялозы.
Гужем куспын 3 профильной лагерьёс усьтӥськозы. Со «Шундыпиос», «Оранжевый мяч» но «Блокпост». Гуртъёсын, азьвыл аръёсы сямен ик, ужалозы сводной отрядъёс.

Вавож

Нокинэ уд паймыты

Вавож черкогуртысь одӥгаз школаын анай-атайёслэсь коньдонзэс куронъёсты тӥяса бичало вылэм.
Анай-атайёсын огкылэ вуэмын вылэм — школа юртысь коридоръёсты выльдыны бичано быдэн 100 манетэн. Но та сярысь тодмо луиз ёрос прокуратураысь специалистъёслы, таос асьсэлэсь эскеронзэс радъязы. Соос пуктӥзы: школалы висъяськись коньдон, анай-атайёслэсь курытэк но, тырмоз ремонтлы.
Туала вакытэ таӵе учырен нокинэ уд паймыты ни: анай-атайёслэсь уксё куро, пиналъёссы яслие мынэмзы дырысен бадӟым классъёсы вуытозязы. Со понна нылпи сад я школа благотворительной счётсэ усьтыны кулэ. Счётысь коньдонлэсь кытчы кутӥськемзэ туж капчиен чакланы луэ. Таӵе счёт усьтэмын ӧвӧл, нош дышетӥсьёс уксё бичаны ёрмемын ке — озьыен, учреждение законлы пумит ужа.

Удмурт Дунне
By Удмурт Дунне 22 июня, 2015 14:53
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<