Герберез ортчытыны кезъёс дасесь

Удмурт Дунне
By Удмурт Дунне 19 июня, 2015 09:12
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

022359,день города,гербер в Козьем парке,удмурты,национальность,костюм,традицияКезлэсь 3 иськемлы палэнэ пуксем Югуртын 20-тӥ июне быдэс шаермы пусъёз Гербер шулдыръяськонэз. Ужрадэз радъянэ пыриськиз тодмо режиссёр, актёр Ольга Александрова.

Гербер шулдыръяськон кутскытозь, кылемын 1 нунал. Кезын уж огыр-бугыр пӧзе. Нуналлы быдэ 11 час 30 минутысен ёросысь культурая юрт азьысь площаде пиналъёс пазьгисько. Кутске Герберлы репетиция. Соосты пумен вошто шоро-куспо арлыдъем муртъёс. Кезъёс гинэ 160 кузя концерт возьматыны кулэ уго. Соос сяна, калыкез шумпоттозы шаерысьтымы тужгес даноосыз ансамбльёс. Таос вӧзын кезъёслэн бездыт адӟиськемзы уг поты. Соин ик пеймыт луытозь быгатонлыкъёссэс волято. Куазь шоры но уг учко.

— Пиналъёслы гинэ дӥсь вурыны луонлык шедьтӥмы. Солы 100 сюрс манет кошкиз, — шуэ Кез ёрос администрациысь культурая ёзэн кивалтӥсь Татьяна Иванова. — Мукетъёсызлы костюмъёс ваёмы дась вуремъёссэ. Балезино, Глазов, Дэбес ёросъёс, удмурт шӧмо дэремъёсын юрттом, шуизы. Таиз арня вискын дӥсьёсты ёросъёсысь вайыломы, мерталомы, кытӥ кулэ, тупатомы.

Артистъёс Югуртысь сценаос вылын репетицизэс ортчытъяло. Возь быдэсак турнамын. Отын «Труженик» хозяйство люцерна будэтэ вал. Ог 30 гектарез табере лёгаськоз. Возьысь 500 тонна пудо сиён поттыны луэ вал, шуэ хозяйствоен кивалтӥсь Василий Порсев. «Труженик» понна та ӧжыт ӧвӧл. Бусымес лёгатыны жаль ик, но Герберез ортчытыны та быдӟа дан усем бере пумитъяськыны умой ӧвӧл, шуэ Василий Михайлович.

Туннэ бусыын йыг-дым вазе. Юрттӥськисе ӧтемын Кезысь профучилищеысь лэсьтӥськисьлы дышетскись студентъёс но.

— Ёрос администрациысь воргоронъёс гинэ но киязы тӥр но молот куто. Ваньмы валаськомы уго: дыртоно, пуконъёсты ги-нэ но рос-прос шукконо. Юрттӥськисе гуртоос асьсэос но ӵектӥсько, коньдон но, пе, кулэ ӧвӧл, ужмы гинэ мед адӟиськоз. Ваньзы сюлмасько, Кезлы быдэс шаер азьын возьыт медаз луы шуыса, — вера Татьяна Иванова.

Туннэ Герберлэн 20 азбаръёсыз пӧлысь ваньмыз дась ни. Липет улэ пыртэмын ни сьӧросъёс. Бадӟым саклык висъяське ӵошатсконъёс но шудонъёс ортчытъян азбарлы. Татчы пумен вутто бадӟым машинаослэсь покрышкаоссэс, лусъё коръёсты. Вашкала мадёсъя, Батыр кужмо писпуэз выжыеныз валче ишкалтэм бере Кез котырын Кам шур пӧзьыны ӧдъям. Соин ик ӵошатсконъёс но кужмо батырен герӟамын луозы. Мылкыд карисьёсты кор нуллытыны малпало. Конкурсъёсын вормисе потэмъёсты кузьымъёсын пусъёзы. Со сяна, секталозы чылкыт ошмес вуэн.

Герберлэн режиссёрез Ольга Александрова вань шутэтскон нуналъёсы Кезын ужаз. Уйпалъёслэн быгатонлыкъёссылы синмаськиз. Одӥг номерзэс но ӧй кушты — ваньмыз умой малпамын, волятыны но тупатыны гинэ кулэ на куд-ог шеко интызэ, шуэ. Озьыен, крезь шудэм улсын улӟозы удмуртъёслэн инмаръёссы. Инбам улын сайкалоз Шунды-мумы, гудыръям-чилекъям улсын потоз Гудыримумы. Шуныт зор бере инбамын ӝужалоз Вуюись.

— Лыктэм куноосты паймытыны ми дасесь. Кезмы сярысь выль кырӟан но гожтӥмы ни. «Милям Кезмы» нимаське. Быдэсак удмурт кылын чузъяськоз. Кылъёссэ но гурзэ гожтӥзы ёрос культурая юртын ужась кузпалъёс Екатерина но Николай Ардашевъёс, — шуэ Татьяна Иванова.

Елена Сараматова

Туспуктӥз Александр Горбунов

Удмурт Дунне
By Удмурт Дунне 19 июня, 2015 09:12